Exodo 13 - Tsimane

Yụꞌtacdyeꞌ tashchety naꞌity in

¹ Ayoꞌ jajiti muꞌ Moisés:

² —Miꞌin Israeltyiꞌ vóshiꞌ miꞌin jemoñeꞌ soꞌmitiĉaꞌ miꞌin räj tashchety sonꞌ ạvaꞌ miꞌin, muꞌin raꞌ yụ́dyes carijtaqui in. Chimeꞌdye cuꞌdyety ạvaꞌ mọꞌin tashchety mọꞌin yụ́dyety raꞌ in.

Feshta jam dujrity pan

³ Moisés jéyacsi muntyiꞌ in: —Räjĉan raꞌ dyijtutiñeꞌ miꞌin ọij mạyedyeꞌ ĉaĉaij na mọꞌ mạyedyeꞌ muꞌ Ayoꞌ därsiꞌyaꞌ ferdyeꞌ muꞌ jiꞌshupjunac Egiptoĉantyiꞌ jiquej, yóĉandyemꞌ ñịbeꞌ cạvetiñeꞌ úñedyeꞌĉan jiquej u. Mọꞌdyes jam raꞌ jebetinte dujrity pan.

⁴ Ọij q̂uinꞌ mạyedyeꞌ utsdye ịvaj Abib, miꞌin shuban Egiptoĉantyiꞌ.

⁵ Mọꞌdyes räjĉan raꞌ yómodyeꞌ jämꞌtiñeꞌ feshta miꞌin utsdye ịvaj. Ayoꞌ raꞌ canac miꞌin jämꞌsiꞌĉan jac, yoj jibunacdyemꞌ vóshiꞌ jiquej u miꞌin, mọꞌĉan raꞌ jam jedyeꞌ jayejjoiꞌ mijam yiris jedyeꞌ jayejyiꞌ. Q̂uinꞌ muꞌĉan tacaꞌ bäꞌyi cananeo in, muꞌin hitita in, muꞌin amorreo in, muꞌin heveo in, judyeyaꞌ muꞌin jebuseo in. Meꞌ tsanꞌ meꞌ Jenꞌ qui namꞌ ĉụiꞌsiꞌcheꞌ tịj muꞌ yuꞌtyiyibunac p̂eyacdyeꞌ vóshiꞌvun miꞌin, yiꞌ mọꞌ soꞌminac raꞌ jac. Aty na raꞌ muꞌĉan bäꞌyi jụijyaꞌ miꞌin, utsdye raꞌ ịvaj jämꞌtiñeꞌ feshta Jenꞌdyes.

⁶ Yävätidyeꞌ mạyedyeꞌ jam raꞌ jebetinte dujrity pan, junꞌ quiꞌ chuc chaꞌshetiñeꞌ mọꞌ yävätidyeꞌ mạyedyeꞌ jämꞌtiñeꞌ raꞌ feshta Ayodyes.

⁷ Mọꞌ raꞌ yävätidyeꞌ mạyedyeꞌ in jam raꞌ jebetinte dujrity pan aty muꞌĉan jụijyaꞌ miꞌin, yoquiꞌ buꞌyiꞌdyemꞌ mọꞌ jac u miꞌin itŝiꞌ raꞌ méquis jiꞌdujraquis, mijam raꞌ pan jiꞌdujraquistumtyiꞌ.

⁸ Aty raꞌ chaꞌshetiñeꞌ mọꞌ mạyedyeꞌ, jéyaqui raꞌ ạvaꞌ miꞌin: "Tsun jämꞌtyejaꞌ q̂uinꞌ ọij feshta ĉaĉaij na muꞌ Ayoꞌ därsiꞌyaꞌ ferdyeꞌ muꞌ jiꞌshupjun tsun Egiptoĉantyiꞌ jiquej.

⁹ Ọij feshta jeñej unches cac̣htacdyeꞌ meꞌ tsanꞌ jáfiches, meꞌ buꞌyiꞌ mọꞌ, mọꞌ raꞌ jiꞌdyijvitidyes paj qui räjĉan p̂eijbija Jenꞌsiꞌ p̂eyacdyeꞌ muꞌ, ĉaĉaij na muꞌdye Ayoꞌ därsiꞌyaꞌ ferdyeꞌ muꞌ jiꞌshupjun tsun Egiptoĉantyiꞌ jiquej.

¹⁰ Meꞌ raꞌ miꞌin chaꞌshetiñeꞌyaꞌ mọꞌ tupudyeꞌ räj yómodyeꞌ jịjcaiꞌ, meꞌ raꞌ jämꞌbajtiñeꞌ feshta miꞌin."

Tashchety ạvaꞌ in

¹¹ "Ayoꞌ raꞌ canac miꞌin muꞌĉan cananeosĉan jac in, yoj yidyemꞌ muꞌ jiquej u, ĉaĉaij na ĉụiꞌsiꞌcheꞌ tịj muꞌ yuꞌtyiyibunac p̂eyacdyeꞌ vóshiꞌvun jiquej miꞌin, judyeyaꞌ miꞌindyes chimeꞌ. Yi muꞌ jéyacsi: Yụ raꞌ soꞌmeyac mọꞌ jac yódyesdyemꞌ jiꞌjäqueyeyacsiꞌ q̂uinꞌ u."

¹² Aty raꞌ muꞌĉan jụijyaꞌ miꞌin, jemoñeꞌ soꞌmetinte Ayoꞌ räj tashchety sonꞌ ạvaꞌ miꞌin, muꞌdyes raꞌ carijtaqui in, judyeyaꞌ räj cuꞌdyety tashchety ạvaꞌ mọꞌin, meꞌ buꞌyi raꞌ yụꞌtac muꞌdyety.

¹³ Muꞌ na tashchety ạvaꞌ bóricotyiꞌ, tupuj bóricodyes soꞌmetinte Jenꞌ yiris banꞌsis oveca, mọꞌyaꞌ raꞌ yaꞌityetinte banꞌtyity bórico. Jam meꞌ yaꞌityetiñeꞌ jụijyaꞌ miꞌin, ijac raꞌ muꞌ bóricotyiꞌ ạvaꞌ mọꞌ, ĉonꞌjetinte raꞌ miꞌin ucunꞌĉan. Räj tashchety ạvaꞌ miꞌin jemoñeꞌ yaꞌitac chimeꞌ in.

¹⁴ Jämꞌdyeyaꞌ cudyinacyaꞌ ạvaꞌ miꞌin yi jínac in: "¿Jedyeꞌ buty cạiꞌ ọij jämꞌtaĉaꞌ q̂uinꞌ tsun?" Vorjeyacsi raꞌ miꞌin: "Ĉaĉaij na därsiꞌyaꞌ ferdyeꞌ muꞌ Ayoꞌ jiꞌc̣hoñin tsun Egiptoĉantyiꞌ jiquej, yóĉandyemꞌ ñịbeꞌ cạveꞌ úñedyeꞌĉan u tsun.

¹⁵ Muꞌĉantyiꞌ ayoꞌ yäcäjyejoij muꞌtyiꞌ ĉojtyiꞌ, jam junꞌ mạꞌjeꞌ farajjin tsun, mọꞌdyes qui muꞌ Ayoꞌ räj ijacsebi tashchety ạvaꞌ muꞌin Egiptoĉantyiꞌ in, chimeꞌdye tashchety cuꞌdyety ạvaꞌ mọꞌin. Mọꞌdyes qui q̂uinꞌ tsun räjĉan soꞌmeja Ayoꞌ judyeyaꞌ räj jiꞌcoꞌshayejaꞌ tashchety ạvamꞌ cuꞌdyety mọꞌ. Meꞌdye q̂uinꞌ chimeꞌdye tsun yaꞌityeja tashchety ạvaꞌ tsun.

¹⁶ Meꞌ shupquiꞌ ọij feshta jeñej unches cac̣htacdyeꞌ, meꞌ tsanꞌ jáfiches, mọꞌ raꞌ jiꞌdyijvitidyes junꞌ chuc muꞌ Ayoꞌ därsiꞌyaꞌ ferdyeꞌ muꞌ jiꞌc̣hoñin tsun Egiptoĉan jiquej", meꞌ raꞌ jéyaqui ạvaꞌ miꞌin.

Dyicbaꞌbadyeꞌ quich buꞌyis chimeꞌ buꞌyiꞌdye tŝij

¹⁷ Aty muꞌ ayoꞌ farajjeyacsiyaꞌ muꞌin Israeltyiꞌ vóshiꞌ in, muꞌ Jenꞌ mijam muꞌ chụiꞌ cạcseban, mijam sapaꞌjeyacsebi filisteos jac muꞌin, yocve jịjijcayacsi paj qui jam chutidyeꞌ cạveꞌ in, vatyquej raꞌ yoqui in caꞌñibun Egiptoĉan in.

¹⁸ Meꞌdyes qui yocve jiꞌtacsi, cäjyaꞌ jịjcaij in Mar Jäijnäsve jịjcaij in. Aty shuban Egiptoĉan in fer buꞌban in, yojdyemꞌ väc̣häꞌtyity u in, meꞌ tyeban in.

¹⁹ Chimeꞌdye muꞌ Moisés cạpte Josévunsiꞌ jin muꞌ, ĉaĉaij na yétaqui jiquej tsạꞌdyemꞌ muꞌ. Jambiꞌdyemꞌ säñi muꞌ, jäꞌmij muꞌ jéyacsi chätidyeꞌ muꞌ paj tsäquiꞌyis p̂eyacdyeꞌ yụꞌtyeyete in, yi muꞌ: "Aty raꞌ muꞌ Jenꞌ jiꞌc̣honnacyaꞌ Egiptoĉantyiꞌ miꞌin jemoñeꞌ yụ́smun jin cabubudyiĉaꞌ chimeꞌdye miꞌin", jéyacsi muꞌ José jiquej tsạꞌdyemꞌ.

²⁰ Muꞌin Israeltyiꞌ vóshiꞌ muꞌ yacchuiꞌ in mọꞌ bäꞌyedyeꞌ Sucot, Etamĉan qui jịjcaij in, muꞌĉan taĉan dyäqui in c̣hẹiꞌyaꞌ mọꞌ cäjyas jac.

²¹ Ayoꞌ tashi penꞌdyetucsi mạij quich buꞌyisĉan dyicbaꞌbadyeꞌ, tsedyedyeꞌ qui namꞌ chimeꞌ buꞌyiꞌdye tŝij, mọꞌ qui mạijchucsiꞌ, tupuj qui miꞌi tsedyedyeꞌ chimeꞌ in.

²² Räjĉan mọꞌ mạij dyicbaꞌbadyeꞌ buꞌyiꞌ tashiꞌ, tsedyedyeꞌ qui namꞌ tŝij buꞌyiꞌ, meꞌ penꞌdyetucsiꞌ.