Jäqui'ves Tesalonicaĉantyidyes 3 - Tsimane

Pablo jéyacsi: "Cọdyemac Jenꞌ tsundyes"

¹ Vojity yụ q̂uinꞌ jéyac: cọdyemac Jenꞌ tsundyes paj qui mọꞌ tseꞌejĉoiꞌ Jenꞌsiꞌ p̂eyacdyeꞌ muꞌ, paj qui paiꞌ tiĉunꞌbite muntyiꞌ in yojdyemꞌ miꞌin jiquej u tiĉunꞌbitinte.

² Chimeꞌdye cọdyemac Jenꞌ paj qui muꞌ ñutsjityin tsun muꞌinyaꞌ ac̣hiꞌyityyaꞌ muntyiꞌ in, ĉaĉaij na jam räj muntyiꞌ in anicjetety Ayoꞌ in.

³ Ayoꞌ tsun anic jịꞌcätsaquity p̂eyacdyeꞌ, muꞌ raꞌ soꞌminac ferdyeꞌ judyeyaꞌ raꞌ ñutsjityinac Sọyoꞌ.

⁴ Tsun anic chị́yete Ayoꞌ, muꞌ nash ñútyinactyiꞌ paj qui yejĉoij miꞌin chäquibutiĉaꞌ miꞌin tsunsiꞌ p̂eyacdyeꞌ soꞌmeyacsiꞌ jiquej.

⁵ Yụ cọdyete muꞌ Ayoꞌ paj qui ñútyinac paj qui mạꞌjitidyestum bäꞌyi miꞌin, yódyemꞌ muꞌ Jenꞌ mạꞌjisinꞌ u, meꞌdye raꞌ miꞌin chimeꞌ mạꞌjeyacsi. Chimeꞌdye cọdyete yụ paj qui dyichyedyeꞌtum bäꞌyi miꞌin, yódyemꞌ muꞌ Cristo dyich buꞌyi u, meꞌdye raꞌ miꞌin chimeꞌ dyich buꞌyi bäꞌyi.

Jemoñeꞌ cäts carijtaqui miꞌin

⁶ Vojity, Jesucristoscheꞌ tịj muꞌ Ayos tsun, tsun jéyac paj qui miꞌin jam penꞌdyetucsi muꞌin vojity in toꞌomuntyiꞌ in, muꞌin jam damꞌ mạꞌjeꞌ carijtaquity in, mijam chäquibuntyiꞌ in mọꞌ jiꞌchäyitidyeꞌ tsun, mọꞌ soꞌmeyacsiꞌ jiquej tsun, jam raꞌ penꞌdyetucsi miꞌin muꞌin meꞌtyity in.

⁷ Miꞌin chịj junꞌ chuc tupuj bäꞌyi miꞌin, jemoñeꞌ cäc̣häꞌchubutiĉaꞌ tsunsiꞌ dyijyedyeꞌ miꞌin, yojdyemꞌ tsun bäꞌyi jiquej u, meꞌdye raꞌ miꞌin chimeꞌ. Tsun jam toꞌoj bäꞌyi miꞌintum jiquej,

⁸ mijam fibiꞌyaꞌ säcsi tsun, yaꞌij tsun mọꞌ tsạꞌ buꞌyedyes. Fer carijtaqui tsun mạij judyeyaꞌ tsedyedyeꞌ paj qui jam cọdyetyeyac mọꞌ tsạꞌ buꞌyedyedyes tsun.

⁹ Meꞌ jiquej tsun, tupuj tsanꞌ tsun cọdyetyeyac tsạꞌ buꞌyedyes tsun, ĉaĉaij na meꞌ yụꞌtac tsun Jenꞌyaꞌ, jam qui namꞌ cọdyetyeyac. Meꞌ buꞌyi carijtaqui tsun tsạꞌ buꞌyedyes tsun, paj qui miꞌin chimeꞌ cäc̣häꞌchubutiĉaꞌ dyijyedyeꞌ tsunsiꞌ miꞌin, paj qui meꞌ bäꞌyi miꞌin.

¹⁰ Miꞌintumdyemꞌ jiquej tsun, tsun bajaꞌ jéyac: "Tyi chuc jam mạꞌjeꞌ carijtaquity in paj jam säcsi chimeꞌ in", jéyac jiquej tsun.

¹¹ Q̂uinꞌ na seꞌvaqui tsun pạrej ca muꞌyaꞌ in miꞌinĉantyiꞌ in toꞌomuntyiꞌ in, ĉụiꞌ ca mọmoꞌ bäꞌyi in, mijam ca mạꞌjeꞌ carijtaqui in, meꞌ camꞌ mạꞌjeꞌ in jiꞌc̣hamꞌdyi miꞌinĉan in.

¹² Jesucristoscheꞌ tịj muꞌ Ayos tsun, tsun fercheꞌ jéyacsi muꞌin meꞌtyity in paj qui jam meꞌ bäꞌyi in, jemoñeꞌ jämꞌ bäꞌyi in paj jämꞌ carijtaqui in tsạꞌ buꞌyedyedyes muꞌin.

¹³ Vojity, jam raꞌ shọijtiñeꞌ miꞌin rụij buꞌyedyeꞌ.

¹⁴ Muꞌyaꞌ jụijyaꞌ miꞌinĉantyiꞌ in jam mạꞌjeꞌ chiquety p̂eyacdyeꞌ tsunsiꞌ in, jam raꞌ penꞌdyetucsi miꞌin paj qui tsị́caijve in.

¹⁵ Jam qui na ramꞌ fạ́cacsi miꞌin muꞌin meꞌtyity in, meꞌ ramꞌ fạraꞌjeyacsi mọmoꞌ miꞌin jämꞌsiꞌtum p̂eyacdyeꞌ, jeñej ĉụiꞌtyiꞌ vojity miꞌin.

Jadyiquis voryetacdyeꞌ Pablos

¹⁶ Yụ cọdyete Ayoꞌ tsun, muꞌ soꞌmisinꞌtyiꞌ maꞌjodyeꞌ ĉojtyiꞌĉandyes tsun, paj qui muꞌ räjĉan soꞌminac maꞌjodyeꞌ ĉojtyiꞌĉandyes miꞌin, meꞌ tsanꞌ ñịbedyes jịꞌĉojtiñeꞌ jụijyaꞌ miꞌin, meꞌ tsanꞌ jam. Paj muꞌ Jesucristo Ayoꞌ tsun penꞌdyetunac räjĉan miꞌin.

¹⁷ Yụ Pablo ọij q̂uinꞌ voryetacdyeꞌ sáñeꞌ yụ ĉụiꞌsiꞌyaꞌ un yụ. Meꞌ yiqui sánaqui yụ ĉụiꞌsiꞌ voryetacdyeꞌ yụ räj sánacdyeꞌcheꞌ yụ.

¹⁸ Yụ cọdyete Jenꞌ paj qui muꞌ Jesucristo Ayoꞌ tsun soꞌminac ñịbeꞌjitidyes muꞌ räjĉan miꞌin.