2 TIMÒTĪ 1 - TÖHET LĪPÖRE (Re-edited) Bible (BSI)

¹ Pôl, tanīnöṙô Kristū Yēsū, kūö lōn ngam Tēv sā ngam kinlēḵngô aṅ im nômö, ngam mī-in Kristū Yēsū.

² Löö in Timòtī, hanāngen chu nö kūön: Inlōnti, neūkölōn, lanāmö aṅ im Tēv ngam Yöng, Kristū Yēsū inrē ngam Mā hī.

Nöinyö Tö Ngam Inreuslö Alāha

³ Ha-öiny ngam Tēv chin, ngam lahök la-en chu löktökūö yik muvöhngö chu, i hanëtö el kuilōn, öt ṙākenre chin fēken meh i nup ṙô chu vë-elkui, peuheū harap.

⁴ Paṙūtalōn hòṅ meukkūö meh, fēken nuk mak mat meh, pò chu hòṅ tööḵngen tö ṙanāmölōn;

⁵ Pò chu ngaich fēḵlöngö tö ngam ötinnyatkö-elmat mikah in meh: ngam mū-urĕh nö ik yōm meh kikānö, Lois, aṅ ik yöng meh kikānö inrē ang Yūnisi; nyatlö chin inrē tö meh.

⁶ Angū-ö lökten chin fēḵlen meh hòṅ meh ahūlökūö ngam inlōnti aṅ im Tēv, ngam mī-in meh nö lökten i ṙinëptö në eltī chu.

⁷ Pò ngam Tēv nö öt kē-ĕkūö hī tö ma-alaha pinhë-eṅkūö: kanô-òṅ pöri hanānngen inrē, ötinhôngen chöngö inrē.

⁸ Lökten man um sirōngkūö tö ngam ineūkö ngam Mā hī, um rēhĕn tö chu chu-ö haköv Ò: hol ngam talöök inhānga pöri harëtöre sā ngam minhôiṅyö aṅ im Tēv;

⁹ Ngam mahayööken, ngaich havëten hī nö im töhet la-en, öt asā nup la-en hī, sā ap lōn Ò pöri, ap inlōnti inrē, ngam kinë-eṅkūö hī in Kristū Yēsū misī, nöng örheūheu,

¹⁰ Ngaich hameuktu tö ngamuh lökten i inmeuktö ngam mahayööken hī Kristū Yēsū, ngam ma-asökngö ngam kinpaha ngaich kētö nômö, ötchinhūngö inrē nö el hanātö, lökten im tölöök inhānga.

¹¹ In e chin chu-ö vīlöngö ma-ahānga, tanīnöṙô, mahaköphöti inrē.

¹² Angū-ö lökten chu inrē kihngen tö në; ngaich sön chū-ö öt sirōngkūö; pò chu akahakūö töp chūökre ṙātö ellōnre, ngaich akahalōn chū-ö tö Ò nö kô nö aṅtö yip kahëtö chu in Ò ip sakāmö.

¹³ Haköp ngam insā tölöök ṙô nup ahang meh in cha, i mikah, hanāngen inrē ngam mī-in Kristū Yēsū.

¹⁴ Aṅtö ngam tölöök tökētu nö in meh lökten i ngam Töhet Fanöinylö ngam mī-i yöng in hī.

¹⁵ Akahalōn man tö ngih, tö cha nö ṙòkhöre yip aṅ Āsi nö havööngökūöre tö chu: hēḵ Finchelös, Hermòchinis inrē.

¹⁶ Kētö neūkölōn an yēḵ ngam Mā nö i patī Ònīsifòres: pòn ṙōlheuh anga-aṅ nö ha-aṅlen chu, ngaich rö-ö nö sirōngkūö tö inlöökö chu;

¹⁷ Hē ò pöri nö i Rōma, harëtöre anga-aṅ nö chöhö chu, ngaich kôtökūö tö chu.

¹⁸ Kē-ĕti an yēḵ ngam Mā nö in ò, hòṅ ò nö kôtökūö tö neūkölōn ngam Mā ip Sakāmö angū-ö; akahalōn man inrē tö tumkangen ò nö meukṙen nö i Efisös.