Roma 4 - Tii Iitihi: Élele Iitihi na mwo Coho

Pa acéihi wo Abérama

¹ Nye o pii pie woté ne ko *Abérama, pa watihenye? De ace cemen ko ni penem na e pwo?

² [Te tice.] Be time uce é mu ko nina e pwo, celi me caa pace apulie celi e *mwomwon ne he pwahamii Padué. Ke time uce jan me e pipii den.

³ Be caa te tii ne he ni tii iitihi pie: E céihi ne ko Padué wo Abérama, ke é mu ko a céihi ten, ke wo Padué, ke e pwo me pa apulie na e mwomwon ne he pwahamiin. Genèse 15.6

⁴ Mepie e penem wo pace céiu apulie, ke a mwani na e hegi, ke time uce a âpipati, kehe te a cuhieng ne ha a penem den.

^5-6 Kehe icehi ana time uce piwien ne ko pa apulie na nimen me wâé nang ne he pwahamii Padué, be te tice penem celi jan me e pwo. Kehe te ju a céihi ten cehi ne ko Padué. É mu ko a céihi ten, ke wo Padué, ke e pwo me e mwomwon ne he pwahamiin. Wo pa daame *Davita, ke e pwonyebi ha a pipwodéén de ni apulie na lé wonaa, ke e pii pie:

⁷ *Adéi ni apulie na e pétaabwon ni ta pwo telé wo Padué, ke e pineuhi ni huô telé na ta.

⁸ Adéi nina time e uce piniimihi ni ta pwo telé wo Padaame. Psaume 32.1−2

Time uce a tegoop @ ana e pwo me wâé genye

⁹ A pipwodéén [na e pii wo Davita] ke he te a de ni *Juif cehi? Ûhu! Te a de ati ni bele. Be li e caa mi pii pie: E céihi ne ko Padué wo Abérama, ke é mu ko a céihi ten, ke wo Padué, ke e pwo me pa apulie na e mwomwon ne he pwahamiin. Genèse 15.6

¹⁰ Kona he éniile celi wo Padué, ke e pwo me e mwomwon wo Abérama, ne he pwahamiin? Wieli é alecehe a *tegoop ten? Ûhu, time uce é alecehen, kehe te é ânebun.

¹¹ Be wo Padué, ke e te pwo me e mwomwon ne he pwahamiin, he mwo te time uce pwo a tegoop ten, mu ko a céihi ten. Ke é alecehen, ke e hegi a inen ko a tegoop ten. Ke me wonaa, ke e â pa caa te ati nina lé céihi ne ko Padué, na time uce tegoop jélé. Ke wo lépwonaa ati, ke wo Padué, ke e caa pwo me ni apulie na lé mwomwon ne he pwahamiin.

¹² Ke te pa caa mwo te lépwona tegoop jélé [wo lépwo Juif] hemepie lé céihi pwohewiieng. Be weeng, ke e céihi ne ko Padué, ânebuhe a tegoop ten.

A piapwo te Padué ne te ni acéihi

¹³ E pii te Abérama me ni piebehieng wo Padué pie: «É bo ne tewé a bwohemwo ati.» Time uce é mu ko ana e piténedehi ni patén wo Abérama. Kehe e wonaa ten wo Padué, be e caa pwo me e mwomwon ko a céihi ten.

¹⁴ Be hemepie a adéihi naa, ke me a de nina lé piténedehi ni *patén de Moosé, ke wieli o te piticenaado ne ko a céihi, me ali e pii wo Padué.

¹⁵ Ûhu! Ni patén, ke e te ju pébé cehi a cuhinaado [te lépwona lé mulie ne he ni patén. Be pwocoon me lé âcehin ati]. Be hemepie te tice patén, ke wieli o te tice bwopwonen me nye caada ni patén.

¹⁶ A adéihi na e pii [wo Padué] ke e âbé mu ko a *pipwoééhe tice ja kon den, wonaa mu ko a céihi te Abérama. Ke lé â mu hen ne ni piebehieng. Ke time uce a de lépwonaa cehi na lé âcehi ni patén; kehe te a de ati nina lé céihi ne ko Padué, pwohewii Abérama. Ke e â caa tenye ati,

¹⁷ pwohewii ana e pii ten [wo Padué] ne he ni tii iitihi pie: É pwo me wogo pa caa te ni bele na hiwon. Genèse 17.5 E caa tenye wo Abérama, be e céihi ne ko Padué. [Be e temehi pie, e bo pacuwohi a *piapwo ten ânebun.] Be weeng na e pamulipi mwo nina lé caa mele, ke weeng mwo, na e ne ana mwo coho na mwo time genye uce téele tooli ne éni pwo bwohemwo.

¹⁸ Éa, e te mu ucéihi wo Abérama ali e pii ten wo Padué, ke e te uca. Be e te céihi ne ko Padué, he li e pii ten pie: O te junihe hiwon ni piebehiko. Genèse 15.5 É mu ko anaa, na e â caa te ni bele na hiwon. Genèse 17.5

¹⁹ Ke mang a céihi ten. Kehe icehi ana a naado na pwocoon, be e o caa pwo 100 ko ni jo hen, ke caa e mwonu me e mele. Ke wo Sara, ê mwoden, ke caa time uce jan me pwo naîn.

²⁰ Kehe icehi ana time uce pinekepé ne ten ko a piapwo te Padué. Ke e te pipamwoiueng ko a céihi ten, ke e te pipaunu Padué.

²¹ Be e te temehi pie, te junihe pwojunuu Padué, me e pacuwohi ali e caa mi pii ten.

²² Ke weengaa kuti, na wo Padué, ke e pwo me pa apulie na e mwomwon ne he pwahamiin. Genèse 15.6

A pwooti me denye mwo

²³ Ni pwooti naa, ke time uce ni de Abérama cehi.

^24-25 Kehe te ni pwooti me denye mwo. Be e te muko alihi ni céihi tenye wo Padué, ke e bo hegikenye. Weeng na e ne Iésu, Padaame henye, beme e mele ne ko ni ta pwo tenye. Ke e pwo me e mulie cemwo mu ha amele, beme e pwo me wogenye ni apulie na nye mwomwon ne he pwahamiin.