Ébéru 8 - Tii Iitihi: Élele Iitihi na mwo Coho

Pa apwoâpwailo ubwo tenye @ wo Iésu Kériso

¹ Weengi a âne ana é pii: Pwo pa *apwoâpwailo ubwo tenye, na e he miiden, [ke pa apipépwooti tenye] ne ânebuhe Padué. Wo Padué na te nihe pwojunuun, ke e neeng me e tebwo pwo juin [beme e pihuôhi ati ni naado].

² Ke e pwo a penem den, ne ha a duaan na junihe iitihi ne ha a ju mwa ko pwoiitihi. Be a naado na e pacuwohi wo Padué, kehe time uce ana e pwo wo pa apulie.

^3-4 Pwo a âpipati na e ne, ke weengaa a penem de lépwo apwoâpwailo ne éni pwo bwohemwo. Be mepie e mwo teko mu éni pwo bwohemwo wo Kériso, ke wieli time o uce jan me pa apwoâpwailo. Be wo lépwo béén, ne éni pwo bwohemwo, ke ni apwoâpwailo âcehi ni *patén de Moosé. Ke a penem delé, ke me lé pwoâpwailo, ke me lé ne ni âpipati.

⁵ Kehe icehi ana ati ninaa, ke te ju a déme a ju *mwaiitihi na e jeda he miiden. Be wo Moosé li e pacuuli a mwaiitihi pwo ko mwaanu, ke e huôhi ne ten wo Padué pie: Go pwo ati ni naado âcehi ana é caa habwii tem ne pwo ali juwole. Exode 25.40

⁶ Be a penem na e ne te Kériso wo Padué, ke te nihe pwonaado ne kon [koja a bwo pwoâpwailo âcehi ni patén de Moosé]. Be wo Iésu, ke pali e pébé céiikenye ali *piapwo [li mwo ju wâé, na e pwo tenye wo Padué]. Ke a piapwo naa, ke te junihe pwojunuun koja ni patén, ke e pébé céiikenye ni *adéihi na te nihe wâé.

A piapwo na mwo coho

⁷ [Ânebun, ke wo Padué, ke e pwo a piapwo ne te a bele ten, *Isaraéla, ko ni patén de Moosé.] Ke mepie a bécéiuhe piapwo ânebun naa, ke mepie e caa te *pajuujuhi a bwo niimihinaado te Padué, ke wieli time e bo uce pwo mwo ace béalohen.

⁸ [Kehe icehi ana a piapwo ânebun, ke time uce hején be] e cihe okéé ne ko a bele ten wo Padué, ke e pii pie: O tuie a benaamwon na geme bo piténekeme me lupwo bele Isaraéla me *Juda. Ke geme bo pwo mwo ace piapwo celi mwo coho.

⁹ Li geme pwo ali piapwo me ni caa telé, li é pawielé mu ha amu *Aigupito. [É péélé wie beme é celuimilé.] Ke geme pwo a piapwo. Kehe time lé uce piténedehi, ke lé pineuhi ni pwooti. Ke é ne a jéing ne kolé. Kehe time o uce piwien

¹⁰ me a piapwo na mwo coho na me gemu bo pwo, wogemu me Isaraéla, lépwo apulie tong. É bo ne ni patén dong ne he ni pwonimelé. É bo tii a pwooti tong ne he ni bwo temehinaado telé. Ke é bo Dué helé, ke bo woélé a bele tong.

¹¹ O time lé uce tahimwo ni béélé beme lé temehiéo. Be lé tai temehiéo ati, lépwona pwonaado ne kolé ke nina piticenaado ne kolé.

¹² É bo pineulé ko ni ta pwo telé. Ke o time é bo uce niimihi ni bwomu telé na ta. Jérémie 31.31−34

¹³ Ke me e pii kon pie, a piapwo na mwo coho, ke a bwopiinen pie, caa ukéiu a piapwo ânebun. Be a naado na caa ukéiu, ke o caa tieden.