Ébéru 2 - Tii Iitihi: Élele Iitihi na mwo Coho

E pébé a pwaaden @ na te nihe pwonaado ne kon Nemwo pwo me piticenaado ne kon

¹ É mu ko anaa, ke wâé heme genye engen ehi, cehi ni pwooti na genye téne. Be koli genye bo piâ ité kojan.

² Be é ne ko ni *patén de Moosé, ke e habwii pie a juuju, ke e pwo me lé pwocuhinaado ati wo lépwona time lé uce ju âcehin.

³ Kehe icehi ana [wo Padué, ke] e caa ne tenye a pwaaden na te nihe pwonaado ne kon! Ke genye o woté ko ace bwo cela tenye ko a cuhinaado, hemepie time genye uce âcehi a pwaaden naa?! Be te wo Padaame Iésu li e mi patemehi a pwaaden. Ke wo lépwona lé téneeng, ke lé *pajuujuhi ne tenye.

⁴ Ke wo Padué mwo, ke e pipajuujueng ne ko ni *inenaado na pwojunuun: ni naado na lé o téetihi ne ni apulie. Ke e muko ne ni âpipati, na e pwaadeniin bé na a *Jenen Iitihi, âcehi ana nimen kon.

E pwo me piwahin nang me denye

⁵ É ko pacihekewé ko a Mwametau na e o bo tuie. Ke o time uce ni âcélo na e bo nelé me lé pihuô nelang wo Padué.

⁶ Be e pii ten wo pa céiu apulie, ne ha a céiu duaan ne he ni *tii iitihi pie: Woo pa apulie, beme go o niimieng, [go Padué]? Ke é mu ko ade na eânimem de pa nahi apulie ?

⁷ Go pineeng ole koja lépwo âcélo ha a cuwo benaamwon. Go ne ten a kuron he daame. Go pwo me pipaunueng.

⁸ Go tai ne haahi ni an [me e pihuô ne ko ati ni naado]. Psaume 8.5−7 Be te tice ace céiu naado celi e o mu ité koja ni pihuô ten. Kehe icehi ana é jenaa, ke genye te ju alihi ehi, pie mwo time uce cuwo ati ni pwooti naa.

⁹ Ke genye alihi mwo pie, e caa neole Iésu haahi ni âcélo, ha a cuwo benaamwon. Be e mu he ni picani, ke e mele me denye, ati ni apulie, é mu ko a *pipwoééhe tice ja kon de Padué. Ke é mu ko ana e pwo wo Iésu, ke caa ne ten a kuron: a bo lépwo daame. Ke genye alihi pie pipaunueng [pwohewii a pwooti naa, ne he ni tii iitihi].

Pa cuwo ati ni naî Padué

¹⁰ Wo Padué, ke e ne ati ni naado me den, ke e tee ko wéa kolé. Pwo ni béé naî Padué mwo, na te nihe hiwon jélé [wogenye kuti]. Ke wâé ten, me genye tai mu ha a bwo ubwo na a wâé ten, na e pipwaadeniin bé a bwo mu he ni picani te Iésu me a bwo mele ten. Ke é mu ko anaa kuti, ke wo Padué, ke e ne te Iésu a atebwo na hején, ke jan ne kon. Be wo Iésu, ke Padaame na e *celuimi ati ni naî Padué, ke e pipéélé nge [ha *a ju mulip].

¹¹ Te wo Iésu kuti, na e pwo me pwéélang ni pwonimenye, ke e péékenye, wogenye ni apulie ten, nge céii Padué [pa caa ten] beme céiu pa caa tenye ati me weeng. É mu ko anaa kuti, na time uce tanim nang me e pii konye pie ni âjiénen.

¹² Be weeng na e pii te Padué pie: É bo pipatemehi a niim te lépwo âjiénung. É bo pwonyebi ko ni nyebi tem, heme lé pitapitilé . Psaume 22.23

¹³ Ke e pii mwo pie: Woéo mwo, ke é bo céihi ne ko Padué. Ésaïe 8.17 Ke a céiu mwo: Woéo-ni, me ni béén na e nelé tong wo Padué, beme ni naîng. Ésaïe 8.18

E pé a éé apulie pwohewiikenye

¹⁴ Wogenye ni naî Padué, ke tai etenye ati, a éé apulie na e bo mele. Ke e pé a éé apulie wo Iésu, beme e pwohewiikenye. Ke e caa mele me denye, beme e pétaabwon a junuu *Caatana, pana e pwo me genye mele.

¹⁵ Ke me wonaa, ke e tuwokenye koja a bwo mwotikenye ko a mele, na genye teko mu hen ânebun, ati he ni tan.

¹⁶ Genye temehi ehi pie, time e uce âbé wo Iésu beme e picani te ni âcélo. Kehe e âbé picani te ni piebehi *Abérama.

¹⁷ Ke e pipwohewiikenye, ne ha ati ni bwomunen. Be [mepie time uce wonaa, ke wieli o time uce jan me] pa apipépwooti ha awiemenye me Padué. Ke e caa *apwoâpwailo ubwo tenye, na e piténede Padué, ne ha a bwo penem den. Ke e pipwoééhenye [wogenye na tice niihenye]. Ke e pwo a âpwailo, beme pineuhi ni ta pwo tenye.

¹⁸ Ke te jan me e picani tenye, hemepie e tuiebé ne konye ni tacebwén. Be e temehi ni tacebwén, me ni picani mwo.