تئطوسا 2 - کتاب مقدس به زبان آذربایجانی جنوبی - گویشیصحئح اولانی اؤیرَت 1 آمّا سنه گلئنجه، سن صحئح تعلئمه موناسئب شیلر تعلئم ور. 2 یاشلی کئشئلر آییق، وئقارلی، اؤزونه حاکئم، ائماندا، محبّتده و تحمّولده داواملی اولسونلار. 3 اِله اوجور ده یاشلی آروادلار رفتارلاریندا مؤحترم اولسونلار، قیبتچی و شراب اسئری اولماسینلار، یاخشی شیلری اؤیرتسئنلر 4 اله کی، جاوان آروادلاری، اَرلرئنی و اوشاقلارینی سِومکده تشوئق الهسئنلر. 5 اؤزونه حاکئم، عئفّتلی، اِودارلیق الهین، مهرئبان و اؤز اَرلرئنه موطئع اولسونلار کی، تارینین کلامی حؤرمتسئز اولماسین. 6 اِله اوجور ده جاوان اوغلانلاری تشوئق اله کی، عاغیلّی اولسونلار. 7 هر شیده اؤزونی یاخشی عمللرئن نومونهسی گؤرسد: اؤز تعلئمئنده خالئص و صادئق اول، 8 دانیشیقدا صحئح و تقصئرسئز اول کی، دوشمن بئزئم حاقّیمیزدا پئس بئر شی دئیه بئلمهیئب، اوتانسین. 9 نؤکرلری تشوئق اله کی، اؤز آغالارینا هر شیده موطئع اولوب اولاری راضی الهسئنلر و سؤزلری ائنن عمللری بئر اولسون. 10 اوغورلوق اله مهسئنلر، بلکی بوتون یاخشی ائمانی گؤرسدسئنلر اله کی، هر شیده نئجات ورنئمئز تارینین تعلئمئنی بزهسئنلر. 11 چونکی تارینین فیضی ظاهئر اولدی، او فیض کی بوتون ائنسانلارا نئجات گتئرئر 12 و بئزه تربئیه ورئر کی، ائمانسیزلیق و دونیهوی هاوا-هوسلری اوزاق الهیئب بو عصرده اؤزونه حاکئم، صالح و تارییا لایئق بئر حیات یاشایاق. 13 و تاعالا تاریمیز و نئجات ورنئمئز مسئح عئسانین موبارک اومئدئنی و جلالینین ظاهئر اولماسینی گؤزلهیک: 14 او، اؤزونی بئزئم اوچون فدا الهدی کی، بئزی هر جور حاقسیزلیقدان خئلاص الهسئن و اؤزونه عایید بئر خالق طاهئر الهسئن کی، یاخشی ائشلر اوچون قیرتلیدئرلر. 15 بو شیلری دانیش و بوتون قودرت ائنن تشوئق و توبئخ اله. قویما هچ کس سنه اعتئناسیزلیق الهسئن. |
@ 2024 Korpu Company