وحی 7 - کتاب مقدس به زبان آذربایجانی جنوبی - گویشیمؤهورلنمئش آداملار 1 بوندان سورا دؤرد ملک گؤردوم کی، یرئن دؤرد گوشهسئنده دورموشدولار و یرئن دؤرد یلئنئن قاباغینی توتموشدولار، اله کی، هچ یل یر اوزونه، دهنز اوزونه، یا دا هچ بئر آغاج اوزونه اسمهسئن. 2 باشقا بئر ملک ده گؤردوم کی، گوندوغان یردن یوخاری قالخیردی و دئری تارینین مؤهوری اونونان ائدی. ملک اوجا بئر سس ائنن او دؤرد ملهیی کی، یره و دهنزه زئیان یتئرمک قودرتی اولارا ورئلمئشدی، چاغیریب 3 ددی: «تاریمیزین قوللارینین آلینلارینی مؤهورلهیَنهجک، یره، دهنزه و آغاجلارا زئیان یتئرمهیئن.» 4 اوندا مؤهورلنمئشلرئن ساییسینی اشئتدئم؛ ائسرایئل اؤولادلارینین بوتون قبئلهلرئندن یوز قیرخ دؤرد مئن نفر مؤهورلَنمئشدی. 5 یهودا قبئلهسئندن اونائکیمئن نفر مؤهورلَنمئشدی، رعوبئن قبئلهسئندن اونائکیمئن نفر، جاد قبئلهسئندن اونائکیمئن نفر، 6 آشر قبئلهسئندن اونائکیمئن نفر، نفتالی قبئلهسئندن اونائکیمئن نفر، مَنسّه قبئلهسئندن اونائکیمئن نفر، 7 شمعون قبئلهسئندن اونائکیمئن نفر، لاوی قبئلهسئندن اونائکیمئن نفر، یسّاکار قبئلهسئندن اونائکیمئن نفر، 8 زبولون قبئلهسئندن اونائکیمئن نفر، یوسئف قبئلهسئندن اونائکیمئن نفر و بنیامئن قبئلهسئندن اونائکیمئن نفر مؤهورلنمئشدی. چوخلی نئجات تاپانلار 9 بولاردان سورا باخدیم و هر مئلّتدن و بوتون قبئلهلردن و خالقلاردان و دئللردن سایییا گلمهین بؤیوک بئر جاماعات تختئن و قوزونون حوضوروندا دورموشدی؛ آغ پالتارلار گیئنمئشدئلر، اَللرئنده ده خورما آغاجینین خوللاری وار ائدی. 10 اولار اوجا سس ائنن سسلهنئب، دیئردئلر: «نئجات بئزئم تاریمیزدان دیر، کی تختده اوتوروب؛ و قوزویا مخصوصدور!» 11 بوتون ملکلر تختئن، آغساقّاللارین و دؤرد جانلی مخلوقون اطرفیندا دورموشدولار؛ و تختئن حوضوروندا اوزلری اوستونده یره دوشدولر و تارینی پرستئش الهیئب، 12 ددئلر: «آمئن، برکت و جلال و حئکمت و شوکورلر و حؤرمت و قودرت و قووّت ابددن ابده کئمی تاریمیزا مخصوصدور، آمئن!» 13 او واخت، آغساقّاللاردان بئری جاواب ورئب، منه ددی: «آغ پالتارلارا گیئنمئش بو آداملار کئمدئرلر و هاردان گلئبلر؟» 14 اونا ددئم: «آغام، سن بئلئرسن.» منه ددی: «بولار او بؤیوک مشقّتدن چیخانلاردیرلار. اؤز پالتارلارینی قوزونون قانیندا یویوبلار و آغ الهیئبلر. 15 بو سببدندئر کی، تارینین تختئنئن حوضوروندادیرلار و اونون معبدئنده گجه-گوندوز اونا خئدمت الهیئرلر و تختده اوتوران اؤز خیمهسئنی اولارین اوستونه قوراجاق. 16 اولار بئر داها آجلیق چکمهیهجکلر، سوسوز اولمایاجاقلار، گونون ائستئسی و آیری هر بئر ائستی اولاری یاندیرمایاجاق. 17 چونکی تختئن اورتاسیندا اولان قوزی اولارا چوبانلیق اِلئیهجک و اولاری حیات سویونون بولاقلارینا آپاراجاق و تاری هر یاشی اولارین گؤزلرئندن سئلهجک.» |
@ 2024 Korpu Company