وحی 6 - کتاب مقدس به زبان آذربایجانی جنوبی - گویشییدّی مؤهور 1 اوندا کی، قوزی یدّی مؤهورون بئرئنی آچدی، من گؤروردوم و او دؤرد جانلی مخلوقلاردان بئرئنئن سسئنی اشئتدئم کی، گورولتی سسی ائنن ددی: «گل.» 2 باخاندا، بئر آغ آت گؤردوم. آتین اوستونده اَیلشهنئن بئر کامانی وار ائدی؛ اونا بئر تاج ورئلدی و او، فاتح کئمی یولا چیخدی کی، فتح الهسئن. 3 ائکئنجی مؤهوری آچاندا، اشئتدئم کی، ائکئنجی جانلی مخلوق دیئر: «گل.» 4 و باشقا کَهَر بئر آت اشئیه چیخدی و اونون اوستونده اَیلَشنه قودرت ورئلمئشدی کی، یر اوزوندن صولحی گؤتورسون و ائنسانلار بئربئرلرئنی اؤلدورسونلر. و بؤیوک بئر قیلینج اونا ورئلدی. 5 اوچونجی مؤهوری آچاندا، اشئتدئم کی، اوچونجی جانلی مخلوق ددی: «گل.» اله کی باخدیم، بئر قارا آت گؤردوم و اونون اوستونده اَیلشهنئن الئنده بئر ترهزی وار ائدی. 6 و دؤرد جانلی مخلوقون آراسیندان سس کئمی بئر شی اشئتدئم کی، دیئردی: «بئر اؤلچی بوغدا بئر دئنارا و اوچ اؤلچی آرپا بئر دئنارا. یاغا و شرابا دا ضرر یتئرمه!» 7 قوزی دؤردونجی مؤهوری آچاندا، دؤردونجی جانلی مخلوقون سسئنی اشئتدئم کی، ددی: «گل.» 8 اله کی باخدیم، بئر ساری آت گؤردوم و اونون اوستونده اَیلشهنئن آدی اؤلوم ائدی و اؤلولر دئیاری دا اونون دالیسیجا گلئردی. یر اوزونون دؤردده بئرئنئن حاکئمئیّتی اولارا ورئلمئشدی کی، قیلینج، قحطی، وبا و یر اوزونون وحشی حیوانلاری ائنن اؤلدورسونلر. 9 قوزی بشئنجی مؤهوری آچاندا، قوربانگاهین آلتیندا او آداملارین جانلارینی گؤردوم کی، تارینین کلامیندان و ساخلادیقلاری شهادتدن اؤتری اؤلدورولموشدولر. 10 اولار اوجا بئر سس ائنن باغیریب دیئردئلر: «ای ریئس، ای موقدّس و حقئقی اولان، نه واختا کئمی موحاکئمه اله مهیئب، یر اوزونده یاشایانلاردان، قانیمیزین ائنتئقامینی آلمایاجاقسان؟» 11 سورا اولارین هر بئرئنه آغ بئر پالتار ورئلدی و اولارا دیئلدی کی، بئر آز داها ائستئراحت الهسئنلر؛ او واختاجاق کی، قوللوقدا اولار ائنان همکار اولانلار و اولار کئمی اؤلدورولمهلی اولان قارداشلارین ساییسی تکمئل اولسون. 12 آلتینجی مؤهوری آچاندا باخدیم و بؤیوک بئر زلزله باش وردی؛ گون یوندن توخونموش بئر پالاز کئمی قارالدی و آی باشدانباشا قان کئمی اولدی. 13 گؤیون اولدوزلاری دا گؤیدن یره تؤکولدولر، نجه کی، انجئر آغاجی آغیر بئر یِلئن الئنده اسئب، کال انجئرلرئنی یره تؤکر. 14 گؤی بوکولن طومار کئمی چکئلئب گتدی. هر داغ و جزئره ده یرئندن گؤتورولدی. 15 سورا یر اوزونون پادشاهلاری، اعیانلاری، حؤکمدارلاری، وارلیلاری، گوجلولری، هر قول و هر آزاد اؤزلرئنی ماغارالاردا و داغلارین قایالاری آراسیندا گئزلَتدئلر. 16 داغلارا و قایالارا ددئلر: «اوستوموزه دوشون و بئزی تختده اوتورانین حوضوروندان و قوزونون قضبئندن گئزلهدئن. 17 چونکی اولارین قضبئنئن بؤیوک گونی گلئب و کئم دایانا بئلر؟!» |
@ 2024 Korpu Company