وحی 5 - کتاب مقدس به زبان آذربایجانی جنوبی - گویشیمؤهورلی طومار و قوزی 1 تختده اوتورانین صاغ اَلئنده بئر طومار گؤردوم کی، ائچهرئسی و آرخاسی یازیلمیش ائدی و یدّی مؤهور ائنن مؤهورلنمئشدی. 2 قودرتلی بئر ملک ده گؤردوم کی، اوجا سس ائنن اعلان الهیئردی: «کئم لایئقدئر کی، طوماری آچسین و اونون مؤهورلرئنی سیندیرسین؟» 3 آمّا نه گؤیده، نه یر اوزونده، نه ده یر آلتیندا بئر کس وار ائدی کی، بو طوماری آچماغا، یا دا اونون ائچئنه باخماغا قادئر اولسون. 4 من چوخ آغلادیم، چونکی طوماری آچماغا، یا دا اونون ائچئنه باخماغا لایئق اولان هچ کس تاپیلمادی. 5 آغساقّاللارین بئری منه ددی: «آغلاما، باخ، یهودا قبئلهسئندن اولان آصلان! داوودون کؤکی قالئب گلئب کی، طوماری و اونون یدّی مؤهورونی آچسین.» 6 تختئن و او دؤرد جانلی مخلوق ائنان آغساقّاللارین آراسیندا دوران، قوربان اولونموشا بنزهر بئر قوزی گؤردوم. یدّی بوینوزی و یدّی گؤزی وار ائدی کی، تارینین یدّی روحی ائدئلر کی بوتون یر اوزونه گؤندَرئلمئشدئلر. 7 قوزی گلئب تختده اوتورانین صاغ الئندن طوماری آلدی. 8 طوماری گؤتوردویی زامان، او دؤرد جانلی مخلوق و ائیئرمی دؤرد آغساقّال قوزونون حوضوروندا یره دوشدولر. هر بئرئنئن اَلئنده بئر چنگ و بوخور ائنان دولی قیزیل کاسالار وار ائدی کی، موقدّسلرئن دوعالاریدیر. 9 اولار تزه بئر ماهنی اوخویوب دیئردئلر: «سن لایئقسن کی، طوماری گؤتوروب اونون مؤهورلرئنی آچاسان، چونکی قوربان اولدون و اؤز قانین ائنان هر قبئلهدن، دئلدن، خالقدان و مئلّتدن، ائنسانلار، تارییا آلدین. 10 اولاری تاریمیز اوچون بئر پادشاهلیق و کاهئنلر الهیئبسن؛ و اولار یر اوزونه سلطنت و حؤکمرانلیق الئیهجکلر.» 11 او واخت باخدیم و تختئن، او جانلی مخلوقلارین و آغساقّاللارین اطرافیندان بئر چوخ ملهیئن سسئنی اشئتدئم؛ اولارین ساییسی اون مئنلرجه اون مئنلر و مئنلرجه مئنلر ائدی. 12 و اوجا بئر سس ائنن دیئردئلر: «قوربان اولموش قوزی لایئقدئر کی، قودرتی، ثروتی، حئکمتی، قووّتی، حؤرمتی، جلالی و برکتی آلسین.» 13 سورا اشئتدئم هر مخلوق کی، گؤیده، یر اوزونده، یر آلتیندا و دهنزده دئرلر، اولارداکی بوتون وارلیقلار ائنان، بله دیئردئلر: «تخت اوستونده اوتورانا و قوزویا ابددن ابدهجک، برکت، حؤرمت، عئزّت، و قودرت اولسون.» 14 و او دؤرد جانلی مخلوق ددئلر: «آمئن.» و بوتون آغساقّاللار یره دوشوب پرستئش الهدئلر. |
@ 2024 Korpu Company