وحی 4 - کتاب مقدس به زبان آذربایجانی جنوبی - گویشیگؤیدهکی تخت 1 اوندان سورا باخدیم و گؤیده آچیق بئر قاپی وار ائدی! و اوّلکی سس کی، شیپور سسی کئمی من ائنن دانیشیردی، ددی: «بورایا قالخ. سنه گؤرسهدهجهیم کی، بولاردان سورا گرک نه باش ورسئن.» 2 اِله او آندا موقدّس روح منی بورودی و گؤیده بئر تخت قورولموش و تختده بئری اوتورموشدی. 3 اوتورانین ظاهئری یَشَم و قیرمیزی عقئقه بنزهیئردی و تختئن اطرافیندا زومروده بنزهین رنگئنکامان وار ائدی. 4 تختئن اطرافیندا ائیئرمی دؤرد تخت ده وار ائدی و اولارین اوستونده ائیئرمی دؤرد آغساقّالی اوتورموش گؤردوم کی، آغ پالتارلارا گیئنمئشدئلر و باشلاریندا قیزیل تاجلار وار ائدی. 5 تختدن ائلدیریملار، سسلر و گؤی گورولتولری گلئردی و تختئن قاباغیندا اود ائنان یانان یدّی مشعل وار ائدی کی، تارینین یدّی روحودورلار. 6 تختئن قاباغیندا بولورا بنزهین، اِله بئل کی، شوشهدن بئر دهنز! تختئن اورتاسیندا و اطرافیندا قاباغی و دالیسی گؤزلر ائنن بورونموش دؤرد جانلی مخلوق وار ائدی. 7 بئرئنجی مخلوق آصلانا، ائکئنجی مخلوق دانایا، اوچونجی مخلوقون اوزی ائنسان اوزونه، دؤردونجی مخلوق دا اوچان عوقابا بنزهیئردی. 8 بو دؤرد مخلوقدان هر بئرئنئن آلتی قانادی وار ائدی؛ اطرافی و ائچی ده گؤزلر ائنن دولی ائدی و گجه-گوندوز دایانمادان دیئردئلر: «موقدّسدئر، موقدّسدئر، موقدّسدئر رب تاری، او قادئری موطلق، او وار اولموش، وار اولان و گلهجک!» 9 هر زامان کی، او جانلی مخلوقلار، او تختده اوتورانا، ابدهجک یاشایانا جلال، حؤرمت و شوکورلر ورئرلر، 10 ائیئرمی دؤرد آغساقّال تختده اوتورانین حوضوروندا یره دوشورلر و ابددن ابدهجک یاشایانا پرستئش الهیئرلر و تاجلارینی تختئن قاباغینا آتیب دیئرلر: 11 «ربّئمئز و تاریمیز! سن لایئقسن کی، جلالی، حؤرمتی، و قودرتی آلاسان. چونکی هر شیی سن یاراتدین و سنئن ائرادن ائنن وار اولوب یاراندیلار.» |
@ 2024 Korpu Company