وحی 3 - کتاب مقدس به زبان آذربایجانی جنوبی - گویشیساردئسدهکی کئلئسایا 1 «ساردئسدهکی کئلئسانین ملهیئنه یاز: «تارینین یدّی روحونا و یدّی اولدوزا مالئک اولان بله دیئر: ”سنئن عمللرئندن خبرئم وار. آد آچیبسان کی، گویا دئریسن، آمّا اؤلوسن. 2 اویان و اؤلومه یاخین اولان قالانلاری قووّتلندئر. چونکی تاریمین نظرئنده سنئن عمللرئنی کامئل تاپمامیشام. 3 بونا گؤره ده نه آلدیغینی و نه اشئتدئیئنی خاطیرلا؛ اونی رئعایت اِله و تؤوبه اله. اگر اویانمایاسان، بئر اوغری کئمی گلهجهیم و نه ساعات سنئن یانینا گلهجهیئمی بئلمهیهجکسن. 4 «آمّا ساردئسده بئر نچه نفر وارین کی، پالتارلارینی نجئس اله مهیئبلر. اولار من ائنن آغ پالتاردا گزهجکلر، چونکی لایئقدئرلر. 5 قالئب گلن، بله ده، آغ پالتارلارا گیئنهجک و اونون آدینی حیات دفترئندن سئلمهیهجهیم و آدینی آتامین و اونون ملکلری حوضوروندا ائقرار الئیهجهیم. 6 قولاغی اولان، قوی اشئتسئن کی، موقدّس روح کئلئسالارا نه دیئر.“ فئلادلفئیاداکی کئلئسایا 7 «فئلادلفئیاداکی کئلئسانین ملهیئنه یاز: «موقدّس اولان، دوغری اولان، داوودون آچارینا مالئک اولان، او کی، آچیر و هچ کس باغلایا بئلمئر، او کی، باغلاییر و هچ کس آچا بئلمئر، بله دیئر: 8 سنئن عمللرئندن خبرئم وار. باخ، سنئن قاباغیندا آچیق بئر قاپی قویموشام کی، هچ کس اونی باغلایا بئلمز. اونا گؤره کی، سنئن گوجون آزدیر و منئم کلامیمی حئفظ الهیئب، آدیمی دا دانماییبسان. 9 باخ، شیطانین عئبادتگاهیندان اولان بعضئلرئنی، یهودی اولمادیقلاری حالدا یهودی اولدوقلارینی ائدّئعا الهین یالانچیلاری مجبور الئیهجهیم کی، گلسئنلر و سنئن آیاقلاریندا سجده الهسئنلر و بئلسئنلر کی، من سنی سِومئشم. 10 تاب گتئرمک حاقّیندا اولان کلامیمی حئفظ الهدئیئز اوچون، من ده سنی ائمتاحان ساعاتیندان حئفظ الئیهجهیم. او ساعاتدان کی، عنقرئب بوتون دونیایا گلئب، یر اوزونده ساکئن اولانلاری ائمتاحانا چکهجک. 11 «تزلئک ائنن گلئرم؛ نه واریندیر، مؤحکم توت، اِله کی، هچ کس سنئن تاجینی آلماسین. 12 قالئب گلنی تاریمین معبدئنده بئر سوتون الئیهجهیم و آرتیق اوردان اشئیه چیخمایاجاق؛ اونون اوستونده تاریمین آدینی، تاریمین شهرئنئن آدینی، تاریمین یانیندان گؤیدن اِنَن تزه اورشلئمی و منئم تزه آدیمی یازاجاغام. 13 قولاغی اولان، قوی اشئتسئن کی، موقدّس روح کئلئسالارا نه دیئر. لاودئکئیهدهکی کئلئسایا 14 «لاودئکئیهدهکی کئلئسانین ملهیئنه یاز: «آمئن اولان، او امئن و حقئقی شاهئد، تارینین خئلقتئنئن باشیچیسی اولان بله دیئر: 15 سنئن عمللرئندن خبرئم وار. نه سویوقسان، نه ده ائستی. کاشکی یا سویوق یا دا ائستی اولسایدین! 16 مادام کی، ائلیقسان، نه ائستئسن نه سویوق، سنی آغزیمدان اشئیه قوساجاغام. 17 چونکی دیئرسن: ”وارلییام؛ دؤولتلی اولموشام و هچ بئر شیه مؤحتاج دیئلم.“ و بئلمئرسن کی، مفلوک، ذلئل، یوخسول، کور، و لوتسن. 18 سنه نصئحت الهیئرم کی، مندن اود ائچئنده خالئصلَشمئش قیزیلی آلاسان، اِله کی، دؤولتلی اولاسان؛ و بورونمهیه آغ پالتارین اولسون و لوت اولدوغونون ننگی آشکار اولماسین؛ و گؤز مرحمی گؤزلرئنه سورتهسن کی، گؤرهسن. 19 «من سِودئکلرئمی مذمّت الهیئب اولارا تربئیه ورئرم. بونا گؤره، قیرتلی اول و تؤوبه اله. 20 باخ، قاپیدا دوروب دؤیورم. کئم سسئمی اشئدئب، قاپینی آچسا، اونون یانینا ائچهری گئرهجهیم. من اونونان، او دا من ائنن شام یئیهجهیئک. 21 «قالئب گلنه بونی عطا اِلئیهجهیم کی، من ائنن تختئمئن اوستونده اوتورسون، نجه کی، من ده قالئب گلئب آتامین تختئنده اونونان اوتوردوم. 22 قولاغی اولان، قوی اشئتسئن کی، موقدّس روح کئلئسالارا نه دیئر.» |
@ 2024 Korpu Company