وحی 22 - کتاب مقدس به زبان آذربایجانی جنوبی - گویشیعئسا گلئر 1 سورا منه حیات سویونون چایینی گؤرستدی کی، بولور کئمی شفّاف ائدی و تاری و قوزونون تختئندن آخیردی؛ 2 شهرئن میدانینین اورتاسیندا، چایین هم بو تایی، هم ده او تاییندا اونائکی جور میوه گتئرن حیات آغاجی وار ائدی کی، میوهسئنی هر آی گتئرئردی؛ آغاجین یارپاقلاری دا مئلّتلرئن شفاسی اوچون ائدی. 3 اوردا آرتیق هچ بئر لعنت اولمایاجاق؛ تاری و قوزونون تختی اوردا اولاجاق و اونون قوللاری اونی پرستئش الئیهجکلر. 4 اولار اونون اوزونی گؤرهجکلر و اونون آدی اولارین آلینلاریندا اولاجاق. 5 اوردا آرتیق گجه ده اولمایاجاق؛ اولارین نه چیراق ائشیغینا احتئیاجلاری اولاجاق، نه ده گون ائشیغینا، چونکی رب تاری اولاری نورلی اِلئیهجک و اولار ابددن ابده کئمی سلطنت الئیهجکلر. ختم کلام 6 ملک منه ددی: «بو سؤزلر صادئق و دوغرودور.» و رب، پیغمبرلرئن روحلارینین تاریسی اؤز ملهیئنی گؤندَردی کی، اؤز قوللارینا عنقرئب باش ورمهسی واجئب اولان شیلری گؤرسدسئن. 7 «باخ، من تزلئک ائنن گلئرم. خوش او آدامین حالینا کی، بو کئتابین نبئلئک سؤزلرئنه قولاق آسیر.» 8 من یوحنّا همن اویام کی بو شیلری گؤردوم و اشئتدئم. و اشئدئب گؤرَندن سورا یره ییخیلدیم کی، منه بولاری گؤرسهدن ملهیئن آیاقلاری قاباغیندا پرستئش اله یم. 9 آمّا او، منه ددی: «بونی اله مه! من سنئن پیغمبر قارداشلارینین و بو کئتابین سؤزلرئنه قولاق آسانلارین همکار قولویام. تارینی پرستئش اله.» 10 و منه ددی: «بو کئتابین نبئلئک سؤزلرئنی مؤهورلَمه، چونکی واخت یاخیندیر. 11 قوی حاقسیزلیق الهین، حله ده حاقسیزلیق الهسئن و کثئف اولان، حله ده کثئف اولسون. قوی صالح اولان، حله ده صالح عمللر الهسئن و موقدّس اولان، حله ده اؤزونی موقدّس ساخلاسین. 12 باخ، من تزلئک ائنن گلئرم و اجرئم من ائنندئر کی، هر کسه اؤز عملئنه گؤره عوض ورَم. 13 من ”اَلئف“ و ”ی“، اوّلئنجی و آخیرینجی، باشلانیش و آخیرام.» 14 خوش او آداملارین حالینا کی، پالتارلارینی یویورلار، اِله کی، حیات آغاجینا حاق قازانسینلار و دروازلاردان شهره گئرسئنلر. 15 آمّا ائتلر، سحربازلار، عئفّتسئز آداملار، قاتئللر، بوتپرستلر و یالانیسِوَن و دانیشان هر کس شهردن اشئکدهدئر. 16 «من، عئسا، اؤز ملهیئمی گؤندَردئم کی، کئلئسالار اوچون بو شیلرئن حاقّیندا سئزه شهادت ورسئن. من داوودون کؤکی و نسلی، او پاریلدایان سحر اولدوزویام.» 17 موقدّس روح و گلئن دیئر: «گل.» قوی اشئدن هر کس دسئن: «گل.» سوسوز اولان قوی گلسئن؛ آرزی الهین حیات سویوندان موفته گؤتورسون. 18 من، بو کئتابین نبئلئک سؤزلرئنی اشئدن هر کسه شهادت ورئرم: اگر هر کس اولارا بئر شی علاوه الهسه، تاری دا بو کئتابدا یازیلان بلالاری اونا علاوه الئیهجک. 19 و کئم بو نبئلئک کئتابینین سؤزلرئندن بئر شی آز الئیه، تاری دا اونی بو کئتابدا یازیلمیش اولان حیات آغاجیندان و موقدّس شهردن بی نصئب الئیه جک. 20 بو شیلره شهادت ورن دیئر: «بلی، من تزلئک ائنن گلئرم.» آمئن. گل، یارب عئسا! 21 رب عئسانین فیضی سئزئن هامیز ائنان اولسون. آمئن. |
@ 2024 Korpu Company