لوقا 6 - کتاب مقدس به زبان آذربایجانی جنوبی - گویشیشنبه گونونون صاحئبی 1 یهودئلرئن موقّدس شنبه گونلرئنئن بئرئنده، عئسا اَکئنلَر آراسیندان کِچئردی. اونون شاگئردلری سونبوللری درئردئلر و اوووجلاریندا اووب ییئردئلر. 2 آمّا بعضی عالئملر کی، فرئسی فئرقهسئندن ائدئلر ددئلر: «نه اوچون او ائشی گؤرورسوز کی شنبه گونونده جائز دِیئل؟» 3 عئسا اولارا جاواب ورئب ددی: «مگر اوخوماییبسیز کی، داوود پادشاه و اونونان اولانلار آج قالان زامان، نه الهدئلر؟ 4 نجه داوود تارینین اِوئنه گئردی، تارییا تقدئم اولونموش چؤرکی گؤتوروب یِدی و اؤزی ائنن اولانلارا دا وِردی؟! او چؤرَکی کی، اونون یمهیی، معبد کاهئنلرئندن باشقا هچ کسه جائز دِیئل.» 5 عئسا اولارا ددی: «ائنسان اوغلی شنبه گونونون صاحئبیدئر.» بئر اَلی قوروموش کئشئنئن شفاسی 6 آیری بئر شنبه گونی، عئسا یهودئلرئن عئبادتگاهینا گئردی و تعلئم ورمهیه باشلادی. اوردا صاغ اَلی قوروموش بئر کئشی وار ائدی. 7 تؤورات موعلّئملری و فرئسئلر ، عئسانی گؤز آلتینا آلمیشدیلار کی، گؤرسونلر شنبه گونونده بئرئنی شفا وِرجک یا یوخ، اله کی اولار عئسایا بؤهتان وورماق اوچون بئر سبب تاپسینلار. 8 آمّا عئسا کی اولارین فئکئرلرئنی بئلئردی، اَلی قوروموش کئشئیه ددی: «گل، بوردا دور.» او دا آیاغا قالخیب، اوردا دوردی. 9 عئسا اولارا ددی: «سئزدن سوروشورام: شنبه گونونده هانسی جائزدئر؛ یاخشیلیق الهمک، یوخسا یامانلیق الهمک؟ بئر آدامین جانینی قورتارماق، یوخسا اونی آرادان آپارماق؟» 10 عئسا اؤز اطرافیندا اولان آداملارین هامیسینا باخیب، اَلی قوروموش کئشئیه ددی: «اَلئنی اوزات!» او دا اِله الهدی و اَلی صاغالدی. 11 آمّا تؤورات معلملری و فرئسئلر، لاپ چوخ حئرصلهنئب آرالاریندا دانیشیردیلار کی، عئسا ائنن نه الهسئنلر. اونائکی حواری 12 او گونلرئن بئرئنده عئسا دوعا الهمک اوچون داغا چیخدی. او بوتون گجهنی، سحره کئمی تارییا دوعا الهدی. 13 سحر چاغی، شاگئردلرئنی یانینا چاغیردی. اولاردان، اونائکی نفری سِچئب اولارین اوستونه حواری آدی قویدی: 14 شمعون کی، اونا پطروس آدینی وِردی، اونون قارداشی آندریاس، یعقوب، یوحنّا، فئلئپوس، بارتولمای، 15 متّا، توما، آلفاعوس اوغلی یعقوب، وطنپرست آدلانان شمعون، 16 یعقوب اوغلی یهودا و اونا خیانت الهین یهودا ائسکاریوت. خوش سئزئن حالیزا 17 عئسا اولار ائنان داغدان آشاغی اِنئب، هامار بئر یِرده دوردی. شاگئردلرئندن بؤیوک بئر جاماعات و چوخلی خالق دا اوردا ائدئلر. اولار یهودئیه وئلایتئنئن هر یِرئندَن، اورشلئم شهرئندن و صور و صِئدون ساحئللَرئندن گلمئشدئلر کی، 18 عئسانین سؤزلرئنی اِشئتسئنلَر و مَرضلَرئندن شفا تاپسینلار. خبئث روحلاردان عذاب چَکن آداملار دا، شفا تاپیردیلار. 19 جاماعاتین هامیسی چالیشیردیلار کی اَللری عئسایا دَیسئن، چونکی اوندان چیخان قووّت هامیسینا شفا وِرئردی. 20 عئسا شاگئردلرئنه ساری باخیب، ددی: «خوش سئزئن حالیزا کی، فاغیرسیز، چونکی تارینین پادشاهلیغی سئزئن دئر. 21 خوش سئزئن حالیزا کی، ائندی آجسیز، چونکی دویورولاجاقسیز. خوش سئزئن حالیزا کی، ائندی آغلاییرسیز. چونکی گولهجکسئز. 22 خوش سئزئن حالیزا او زامان کی، خالق، ائنسان اوغلونا گؤره، سئزدن نئفرت الهیئب، آرالاریندان قووالاییرلار، سئزه یامان دیئب، آدیزی پئسلهیئرلر. 23 او گونده سِوئنئن و شادلیقدان آتیلیب-دوشون. چونکی گؤیده، اَجرئز بؤیوکدور. اونا گؤره کی اولارین آتالاری دا، پیغمبرلر ائنن بله الهدئلر. 24 آمّا وای سئزئن حالیزا ای وارلیلار! چونکی خوش گونلرئزی کچئردئبسئز. 25 وای سئزئن حالیزا کی ائندی توخسوز! چونکی، آج اولاجاقسیز. وای سئزئن حالیزا کی ائندی گولورسوز، چونکی یاس توتوب آغلایاجاقسیز. 26 وای سئزئن حالیزا او زامان کی، بوتون خالق سئزئن بارهده یاخشی سؤزلر، دانیشیرلار. چونکی اولارین آتالاری دا یالان اولان پیغمبرلر ائنن، بله الهدئلر. دوشمنی سِومک 27 آمّا ای اِشئدَنلر سئزه دیئرم کی دوشمنلرئزی سِوئن، سئزدن نئفرت الهینلره یاخشیلیق الهیئن. 28 سئزه قارقیش الهینلره، برکت دوعاسی الهیئن و سئزی ائنجئدنلره، دوعا الهیئن. 29 اوزونون بئر طرفئنه وورانا، او بئری طرفئنی ده چوئر. بئری سَنئن عابانی آپاراندا، قوی کؤینهیئنی ده آپارسین. 30 هر کس یالواریب سندن بئر شی ائستهسه اونا ور و سنئن مالینی آپاراندان اونون قایتارماسینی ائستهمه. 31 آداملار ائنان اِله رفتار الهیئن کی، ائستهیئرسئز اولار دا سئز ائنن اله رفتار الهسئنلَر. 32 اگر سئزی سِونلَری سِوهسئز، سئزه نه اجری وار؟! چونکی حتّا گوناهکارلار دا، اولاری سِونلَری سِوئرلر. 33 اگر سئزه یاخشیلیق الهینلره یاخشیلیق الئیهسئز، سئزه نه اجری وار؟! چونکی حتّا گوناهکارلار دا اِله بوجور الهیئرلر. 34 اگر او آداملارا بورج وِرهسئز کی، اولارین قایتارماسینا اومئدئز وار، سئزه نه اجری وار؟! حتّا گوناهکارلار دا گوناهکارلارا بورج وِرئرلَر کی، بئر گون بورجلارینین هامیسینی آلسینلار. 35 آمّا سئز دوشمنلرئزی سِوئن، اولارا یاخشیلیق الهیئن و عوضئنی گؤزلمهدن بورج وِرئن کی اَجرئز بؤیوک اولاجاق و حاق-تاعالانین اوغوللاری اولاجاقسیز. چونکی او، ناشوکورلَر و پئس آداملار ائنان، مهرئباندیر. 36 گؤیده کی آتاز نه جور مرحمتلیدئر، سئز ده اوجور مرحمتلی اولون. آیری آداملارا حؤکم الهمک 37 حؤکم الهمهیئن، سئزه ده، حؤکم اولماز. محکوم الهمهیئن، سئز ده محکوم اولمازسیز. باغیشلایین، سئز ده باغیشلانارسیز. 38 وِرئن، سئزه ده ورئلر؛ اؤلچولوب-بئچئلمئش، سئلکَلَهنئب-باسیلمیش، دولوب-داشمیش، بئر اؤلچی ائنن، سئزئن اَتهیئزه تؤکولر. چونکی هانسی اؤلچی ائنن اؤلچهسئز، او اؤلچی ائنن ده، سئزه اؤلچولهجک.» 39 عئسا اولارا بئر مثل ده ددی: «مگر کور، کورا بلدچئلئک الئیهبئلر؟ مگر ائکئسی ده قویویا دوشمَزلر؟ 40 شاگئرد اؤز موعلّئمئندن بؤیوک دِیئل، آمّا هر کس تحصئلئنی تکمئل الهیندن سورا، اؤز موعلّئمی کئمی اولاجاق. 41 نه اوچون قارداشینین گؤزوندهکی چؤپی گؤرورسَن، آمّا اؤز گؤزوندهکی آغاج کؤتوهونی سِچمئرسن؟! 42 اؤز گؤزونده اولان آغاج کؤتوهونی گؤرمهدئیئن حالدا، نجه قارداشینا دئیهبئلرسن: ”قارداش، قوی گؤزوندهکی چؤپی چیخاردیم؟!“ ای ائکیاوزلی! اَوّل آغاج کؤتوهونی اؤز گؤزوندن چیخارت، او زامان آیدین گؤررسن کی، چؤپی قارداشینین گؤزوندن نجه چیخارداسان. آغاج ائنان میوهسی 43 «هچ یاخشی آغاج، پئس میوه وِرمز و هچ پئس آغاج دا، یاخشی میوه وِرمز، 44 چونکی هر آغاج اؤز میوهسئندن تانینار. نه تئکانلاردان انجئر ییغارلار، نه ده گَوَندَن اوزوم! 45 یاخشی آدام، اورهیئنئن یاخشی خزانهسئندن، یاخشی شیلر چیخاردیر؛ پئس آدام دا، اورهیئنئن پئس خزانهسئندن، پئس شیلر چیخاردیر. چونکی اونون دئلی، اورهیئندن داشانی دانیشیر.» عاغیلّی معمار و عاغیلسیز معمار 46 «نه اوچون منی ”یارب، یارب…“ چاغیریرسیز، آمّا سئزه دِدئیئم شیلَره عمل الهمئرسئز؟! 47 قویون سئزه گؤرسدئم کی منئم یانیما گَلن، منئم سؤزلرئمی اِشئدن و اولارا عمل الهین آدام، کئمه بَنزهیئر؛ 48 او، اِو تئکَن بئر آداما بَنزَهر کی، یِری قازیب درئنه سالدی و اِوئن بونؤورهسئنی، داش اوستونده قوردی. او واخت کی سِل گَلدی، سو او اِوه ساری هوجوم گَتئردی، آمّا او اِوی ترپهده بئلمهدی. چونکی اِو یاخشی تئکئلمئشدی. 49 آمّا او آدام کی منئم سؤزلرئمی اِشئدئب، اولارا عمل الهمئر، او اِو تئکن آداما بَنزَهر کی، بونؤوره قویمامیش، اِوی تورپاق اوستونده تئکدی. اوندا کی سِل او اِوه هوجوم گَتئردی اِو، او آندا اوچدی. او اِوئن خارابالیغی، چوخ بؤیوک ائدی.» |
@ 2024 Korpu Company