یهودا 1 - کتاب مقدس به زبان آذربایجانی جنوبی - گویشی1 عئسا مسئحئن قولی و یعقوبون قارداشی یهودادان، او دعوت اولونانلارا کی آتا تاری طرفئندن سوئلئرلر و عئسا مسئح اوچون حئفظ اولونوبلار: 2 مرحمت و سالاماتلیق و محبّت سئزه بول-بول احسان اولسون. گوناه و رذئل آداملارین عاقئبتی 3 عزئزلر، گرچی چوخ ائشتئیاقیم وار ائدی کی، او نئجات بارهسئنده کی، اوندا پاییمیز وار سئزه یازام، آمّا بو نچه خطی یازماغی لازیم گؤردوم کی، سئزی او ائمان اوچون جهد الهمهیه تشوئق اله یئم کی، بئر دفه همئشهلئک موقدّسلره تسلئم اولوندی. 4 چونکی بعضی آداملار گئزلئجه آرازا سیزیلیبلار کی، اله قدئم زامانلاردان بری بو محکومئیّت اوچون تعیئن اولونوبلار؛ رذئل آداملار کی، تاریمیزین فیضئنی شهوتپرستلئیه دؤندَرئبلر و بئزئم بئری-بئردانه آغا و ربّئمئز عئسا مسئحی ائنکار الهیئرلر. 5 گرچی سئز بوتون شیلری باشدان باشا بئلئرسئز، آمّا سئزه بونی خاطیرلاماق ائستهیئرم کی، رب، اؤز خالقینی مئصئر دئیاریندان نئجات وردئیئندن سورا، ائمان گتئرمهینلری هلاک الهدی. 6 او، ریاستلرئنی ساخلاماییب منصبلرئنی ترک الهین ملکلری ده ضولمت آلتیندا ابدی زنجئرلرده، او بؤیوک موحاکئمه گونی اوچون ساخلاییب. 7 اِله سودوم و گومورا و اطرافینداکی شهرلر کئمی، اولار دا جئنسی عئفّتسئزلئیه دوشدولر و ناسالئم شهوتلر دالیسیجا گتدئلر و بونا گؤره ابدی اود ائنان جزالانیب، نومونه اولدولار. 8 آمّا گئنه ده همن شکئلده بو آداملار خیالبافلیق ائنان بدنلرئنی نجئس الهیئرلر و ربئن ائقتئدارینی هچ ساییب، گویون شؤوکتلی وارلیقلارینی دا سؤیورلر. 9 آمّا باش ملک اولان مئکایئل ائبلئس ائنن موناقئشه الهیئب موسانین جسدی اوچون بحث الهینده، جورعت الهمهدی کی، اونی سؤیوب، اونا بئر حؤکم الهسئن. بلکی فقط ددی: «قوی سنی رب تنبه الهسئن.» 10 آمّا بو آداملار آنلامادیقلارینی سؤیورلر و درکسئز حیوانلار کئمی قرئزه اوستونده، آنلادیقلاری شیلر ائنن اؤزلرئنی هلاک الهیئرلر. 11 وای اولارین حالینا! چونکی اولار قایِنئن یولونا گدئبلر و پول اوچون بلعامین خاطاسینا دوشوبلر و قوراخین عوصیانیندا هلاک اولوبلار. 12 بو آداملار اولاردیرلار کی، سئزئن محبّتلی ضئیافلرئزده لکهلردئرلر کی، سئز ائنن قورخوسوز سوفرهیه اوتوروب آنجاق اؤزلرئنئن قیدئندهدئرلر؛ یاغیشسیز بولودلار کی، یل ائنن گدئرلر، میوهسئز پاییز آغاجلاری کی، ائکی دفه اؤلوب رئشهدن چیخاردیلیبلار. 13 دهنزئن تلاطوملی شپهلری کئمی کی، اؤز عاییبلارینی کؤپوک کئمی ساچیرلار و آوارا اولدوزلاردیرلار کی، اولار اوچون درئن ظولمت ابده کئمی ساخلانیب. 14 بولار حاقّیندا آدمئن یدّئنجی نسئلی اولان خنوخ دا نبئلئک الهیئب دیئر: «باخ، رب اؤز مئنلرجه مئنلر موقدّسلری ائنن گلدی کی، 15 هامییا حؤکم الهسئن و رذئل یول ائنان یرئنه یتئرمئش بوتون رذئل آداملارین بوتون رذئل عملرئنی و رذئل گوناهکارلارین اونون ضئدّئنه دانیشدیغی بوتون پئس شیلری محکوم الهسئن.» 16 بولار دِیئنَن، ائراد توتان و اؤز شهوتلرئنئن دالیسیجا قاچاندیرلار؛ تکبّورلی دانیشیرلار، آداملاری دا منفعت اوچون آلدادیرلار. ائماندا دایانین 17 آمّا سئز، عزئزلر، گرک ربّئمئز عئسا مسئحئن حوارئلرئنئن قاباقجا ددئیی سؤزلری خاطیرلایاسیز. 18 کی اولار سئزه دیئردئلر: «آخیر زاماندا مسخره الهینلر اولاجاقلار کی، اؤز رذئل شهوتلرئنئن دالیسیجا گدهجکلر.» 19 آیریلیق سالان بولاردیرلار، آنجاق نفسانی دئرلر، موقدّس روحدان دا بهرهسئز. 20 آمّا سئز، عزئزلر، اؤزوزی لاپ موقدّس ائمان ائنان بئنا الهیئب، موقدّس روحدا دوعا اِله یئن. 21 اؤزوزی تارینین محبّتئنده ساخلایین، سئزی ابدی حیاتا آپاران ربّئمئز عئسا مسئحئن مرحمتئنی ائشتئیاق ائنان گؤزلهیئن. 22 شک الهینلره مرحمتلی اولون؛ 23 بعضئلری اوددان قاپیب نئجات ورئن و بعضئلرئنه ده قورخی ائنن مرحمت گؤرسهدئن، حتّا جئسمدن لکهلنن پالتاردان دا نئفرت الهیئن. حمد و جلال تارییا 24 ائندی او تارییا کی، سئزی بودرهمکدن ساخلاماغا و اؤز جلالینین حوضوروندا بؤیوک شادلیق ائنان ائرادسیز دایاندیرماغا قادئردئر. 25 ربّئمئز عئسا مسئحئن وسئلهسی ائنن ازلدن و ائندی و ابدهجک بئری-بئردانه نئجات ورنئمئز تارییا جلال، عظمت، ریاست و ائقتئدار اولسون. آمئن. |
@ 2024 Korpu Company