یعقوب 5 - کتاب مقدس به زبان آذربایجانی جنوبی - گویشیوارلی آداملاری آییق سالماق 1 باخین ائندی، ای وارلیلار! باشیزا گلهجک موصئبتلردن اؤتری آغلایین و شئون اِله یئن. 2 مال-دؤولتئز چورویوب، پالتاریزی دا بئد ییئب. 3 قیزیل و گوموشوز پاسلانیب و اولارین پاسی ضئدّئزه بئر شاهئد اولاجاق و اود کئمی جئسمئزی یئیهجک. سئز آخیر گونلرئزده ثروت ییغیبسیز! 4 باخین، زمئلرئزی بئچن ائشچئلردن ساخلادیغیز موزد، سئزئن ضئدّئزه قیشقیریر. بئچئنچئلرئن قیشقیرتیسی قوشونلار ربّئنئن قولاقلارینا چاتیب. 5 سئز یر اوزونده کف ائنن یاشاییبسیز و لذّت دولی بئر حیات کچئردئبسئز. قحطی گونونده اورَکلرئزی کؤکَلدئبسئز! 6 صالح آدامی محکوم الهیئب، اؤلومه ورئبسئز؛ او سئزئن قاباغیزدا موقاوئمت اله مئر. عذاب چکمکده صبئرلی اولماق 7 بونا گؤره، قارداشلار، ربّئن گلئشئنه کئمی صبئرلی اولون. اکئنچی تورپاغین دیرلی حاصئلی اوچون ائنتئظار چکئر و ائلک و آخیر یاغیشی آلاناجاق صبئرلی اولور. 8 سئز ده صبئرلی اولون. اورَکلرئزی قووّتلندئرئن، چونکی ربّئن گلئشی یاخیندیر. 9 بئربئرئزئن ضئدّئنه شئکایت اله مهیئن، قارداشلار! اِله کی، سئز اؤزوز ده موحاکئمه اولونمایاسیز. باخین، موحاکئمه الهین، قاپی آغزیندا دایانیب. 10 قارداشلار، عذاب چکمکده و صبئرلی اولماقدا ربّئن آدیندا دانیشان نَبئلردن نومونه آلین. 11 بئز تحمّول الهینلری بختور ساییریق. سئز اَیّوبون تحمّولونی اشئدئبسئز و ربّئن الهدئیئنئن نتئجهسئنی ده گؤروبسوز کی، رب چوخ شفقتلی و مرحمتلیدئر. 12 آمّا، قارداشلاریم، هامیدان اوّل، نه گؤیه، نه یره، نه ده باشقا بئر شیه آند ائچئن؛ آنجاق ”بَلئز، بلی“ اولسون و ”خِیرئز، خیر“ اولسون اِله کی، موحاکئمهیه چکئلمهیهسئز. ائماندا اولونان دوعا 13 آیا آرازدا عذاب آلتیندا اولان بئری وار؟ او، گرک دوعا الهسئن. آیا شاد اولان بئری وار؟ او، حمدلر اوخوسون. 14 آیا آرازدا ناخوش بئری وار؟ او گرک کئلئسانین آغساقّاللارینی چاغیرسین. اولار دا گرک اونون اوچون دوعا الهیئب، ربّئن آدیندا اونی یاغ ائنان مسح الهسئنلر. 15 و ائماندا اولونان دوعا ناخوش آدامی صاغالدار و رب اونی قالخیزار. گوناهلار اِلهمئش اولسا دا، اونا باغیشلانار. 16 بونون اوچون، گوناهلاریزی بئربئرئزه اعتئراف الهیئن و بئربئرئز اوچون دوعا اِله یئن، اِله کی، شفا تاپاسیز. صالح بئر آدامین تأثئرلی دوعاسی چوخ شی الهمهیه قادئردئر. 17 ائلیا دا همن بئزئم کئمی بئر آدام ائدی و صداقت ائنن دوعا الهدی کی، یاغیش یاغماسین و اوچ ائل آلتی آی یر اوزونه یاغیش یاغمادی؛ 18 سورا گئنه دوعا الهدی و گؤیدن یاغیش یاغدی، یر اوزی ثمرئنی گتئردی. 19 قارداشلاریم، اگر سئزلردن بئرئز حقئقتدن آزسا و آیری بئری اونی قایتارسا، 20 قوی او آدام بئلسئن کی، گوناهکاری سهو یولوندان دؤندَرَن، اونون جانینی اؤلومدن قورتارار و چوخ گوناهلارین اوستونی اؤرتر. |
@ 2024 Korpu Company