یعقوب 4 - کتاب مقدس به زبان آذربایجانی جنوبی - گویشیتارییا موطئع اولون 1 آرازدا اولان داعوالار و ائختئلافلار هاردان باش آلیر؟ مگر او هاوا-هوسلرئزدن دیئل کی، عوضولرئزده داعوا الهیئر؟ 2 آرزی الهیئرسئز، آمّا یوخوزدور. بونون اوچون آدام اؤلدورورسوز. پاخیلّیق الهیئرسئز، آمّا اَله گتئره بئلمئرسئز. بونا گؤره ده ساواشیب، داعوا الهیئرسئز. یوخوزدور، چونکی طلب اله مئرسئز. 3 طلب الهیئرسئز، آمّا الهگتئره بئلمئرسئز. چونکی سهو نئیّتلر ائنن طلب الهیئرسئز، اِله کی، اونی اؤز هاوا-هوسلرئز اوچون صرف الئیهسئز. 4 سئز، ای زئناکارلار! مگر بئلمئرسئز کی، دونیا ائنن دوستلوق الهمک، تارینین ضئدّئنه دوشمنچئلئکدئر؟! بونون اوچون کئم دونیانین دوستی اولماق ائستهسه، اؤزونی تارینین دوشمنی الهیئر. 5 یوخسا موقدّس یازینین بوش یره بونی یازدیغینی دوشونورسوز کی، «تاری، ائچئمئزده ساکئن الهدئیی موقدّس روحی، قیرت ائنن آرزی الهیئر»؟ 6 آمّا تاری داها بؤیوک فیض عطا الهیئر. بو سببدن دیئر: «تاری مغرور آداملارا ضئدّ دورور، آمّا باشیآشاغی آداملارا فیض عطا الهیئر.» 7 پس، تارییا موطئع اولون. شیطانین قاباغیندا موقاوئمت الهیئن و او سئزدن قاچار. 8 تارییا یاخینلاشین، او دا سئزه یاخینلاشار. ای گوناهکارلار، اللرئزی تمئزلهیئن؛ ای فئکئرلرئنی دیئشدئرنلر، اورَکلرئزی طاهئر اِله یئن. 9 قوصّه ییئن، یاس توتون، آغلایین. قویون گولوشوز یاسا، شادلیغیز دا قمه دؤنسون. 10 ربّئن حوضوروندا اؤزوزی آلچالدین و او سئزی اوجالدار. 11 قارداشلار، بئربئرئزی پئسلمهیئن. قارداشینین ضئدّئنه دانیشان یا دا قارداشینی موحاکئمه الهین، شرئعتئن ضئدّئنه دانیشیر و شرئعتی موحاکئمه الهیئر. آمّا اگر شرئعتی موحاکئمه الئیهسئز، شرئعته عمل الهین یوخ، بلکی اونی موحاکئمهیه چکنسئز. 12 آنجاق بئر شرئعت ورن و بئر قاضی وار. هم نئجات ورمهیه، هم ده هلاک الهمهیه قادئر اولان اودور. آمّا سن کئمسن کی، اؤز قونشونی موحاکئمه الئیهسن؟! صاباحا فخر اله مه یئن 13 ائندی باخین، سئزلر کی، دیئرسئز «بو گون یا دا صاباح فئلان و بهمان شهره گدهرئک و اوردا بئر ائل تئجارته مشغول اولوب، قازانج ییغاریق.» 14 حال بو کی، حیاتینین صاباح نه جور اولدوغونی بئلمئرسئز. سئز بوخار کئمئسئز کی، آز بئر مودّت گؤرونور و سورا ائتئب گدئر. 15 بونون عوضئنه سئز گرک دئیهسئز: «اگر رب ائستهسه، یاشایاریق، بونی و اونی دا اِلئیهرئک.» 16 آمّا نجه کی، وار، سئز تکبّوروزه فخر الهیئرسئز؛ بوتون بله فخرلر پئسدئر. 17 بونا گؤره، هر کس کی، دوز ائشی بئلئر، آمّا اونی یرئنه یتئرمئر، گوناه الهیئر. |
@ 2024 Korpu Company