یعقوب 2 - کتاب مقدس به زبان آذربایجانی جنوبی - گویشیفرق قویمایین 1 قارداشلاریم، سئزلر کی شؤوکتلی رب، عئسا مسئحه ائمانیز وار، آداملار آراسیندا فرق قویمایین. 2 چونکی اگر سئزئن مجلئسه قیزیل اوزوک تاخمیش، فاخئر پالتار گیئنمئش بئر آدام گئرسه و یوخسول بئر آدام دا چئرکلی پالتار گیئنمئش گئرسه، 3 سئز فاخئر پالتاری اولانین قیدئنه قالیب دیئرسئز: «بویورون، سئز بوردا اَیلهشئن» و یوخسول آداما دیئرسئز: «سن اوردا دور» و یا «کتئلئمئن یانیندا اوتور.» 4 آیا بئربئرئزئن آراسیندا فرق قویماییبسیز، پئس نئیّتلی قاضیلارا دؤنمهیئبسئز؟ 5 قولاق آسین، عزئز قارداشلاریم، مگر تاری بو دونیانین یوخسوللارینی سچمهدی کی، ائماندا دؤولتلی اولوب، او پادشاهلیغین وارئثلری اولسونلار کی اونی سونلره وعده ورئب؟! 6 آمّا سئز یوخسول آدامی حؤرمتسئز اِله یئبسئز. مگر دؤولتلی دیئل کی، سئزه ظولم الهیئب سئزی محکمهیه چکئر؟! 7 مگر اولار دیئللر کی، سئزه ورئلن حؤرمتلی آدا کوفر دیئرلر؟! 8 آمّا اگر سئز موقدّس یازییا موطابئق او شاهانه شرئعتی یرئنه یتئرئرسئز کی، «قونشونی گرک اؤزون کئمی سِوهسن» یاخشی ائش گؤرورسوز. 9 آمّا اگر ائنسانلار آراسیندا فرق قویورسوز، گوناه الهیئرسئز و تقصئرکارلار کئمی شرئعت طرفئندن محکوم اولورسوز. 10 چونکی هر کس بوتون شرئعتی رئعایت الهیئب آمّا بئرئنده خاطا الهسه، اولارین هامیسی اوچون خاطاکار اولوب. 11 چونکی «زئنا الهمه» دئین، «آدام اؤلدورمه» ده ددی. ائندی سن اگر زئنا اله مئرسن، آمّا آدام اؤلدورورسن، شرئعتی آیاق آلتینا قویوبسان. 12 بونا گؤره، او آداملار کئمی دانیشیب رفتار الهیئن کی، اِله بئل، آزادلیق شرئعتی ائنن موحاکئمه اولوناجاقلار. 13 چونکی رحم اله مئیه نه رحمسئزلئک ائنن حؤکم اولوناجاق. رحم حؤکمه قالئب گلئر. ائمان و عمل 14 قارداشلاریم، اگر بئر آدام عملی اولمایان حالدا، ائمانی اولدوغونی دِسه، بونون اونا نه فایداسی وار؟ مگر او ائمان اونی نئجات وِره بئلر؟! 15 اگر بئر قارداش یا دا باجی لوتدور و گوندهلئک یمهیئنه مؤحتاج. 16 و سئزلردن بئرئز اولارا دسه کی: «سالامات گدئن، قیزیشین و دویون»، آمّا اولارین بدنی اوچون ضروری اولان شیلری ورمهیهسئز، نه فایداسی وار؟! 17 ائمان دا بوجوردور: اگر عمللری اولماسا، اؤزی-اؤزونده اؤلودور. 18 ائندی بئر کس دئیه بئلر کی، «سنئن ائمانین وار، منئم ده عمللرئم. سن ائمانینی منه عملسئز گؤرسد و من ائمانیمی عمللرئم ائنن سنه گؤرسدهرم.» 19 سن ائنانیرسان کی، تاری بئردئر؛ یاخشی اله یئرسن! ائبلئس روحلار دا بونا ائنانیب تئترهیئرلر! 20 آمّا سن ای عاغیلسیز آدام، ائستهیئرسن درک الئیهسن نه اوچون، عملسئز ائمانین فایداسی یوخدور؟ 21 مگر آتامیز ائبراهئم، اوغلی ائسحاقی قوربانگاهین اوستونده قوربان تقدئم اِله ینده، عمللری ائنن صالح ساییلمادی؟ 22 گؤرورسن کی، ائمان اونون عمللری ائنن ائشلهیئردی و عمللری نتئجهسئنده ائمان کامئللَشدی. 23 موقدّس یازی دا یرئنه یتشدی کی، دیئر: «و ائبراهئم تارییا ائمان گتئردی، بو دا اونا صالحلئک ساییلدی.» و او، تارینین دوستی چاغیریلدی. 24 گؤرورسوز کی، ائنسان آنجاق ائمان ائنان یوخ، عمللری ائنن صالح ساییلیر. 25 مگر فاحئشه راحاب دا همن جور اؤز عمللرئنه گؤره صالح ساییلمادی، او زامان کی، جاسوسلاری قبول الهیئب آیری بئر یول ائنان یولا سالدی؟! 26 چونکی نجه کی، روحسوز بدن اؤلودور، عملسئز ائمان دا اؤلودور. |
@ 2024 Korpu Company