عئبرانئلره 13 - کتاب مقدس به زبان آذربایجانی جنوبی - گویشیآخیر نصئحتلر 1 قویون قارداش محبّتی برقرار اولسون. 2 قرئب آداملارا قوناقپرورلئک اله مهیی یاددان چیخارتمایین، چونکی بو ائش ائنن بعضئلر بئلمهدن ملکلره قوناقپرورلئک گؤرسهدئبلر. 3 زئندانیلری یادا گتئرئن، اله بئل کی اؤزوز ده اولار ائنان زئندانداسیز؛ اله بله اذئیت گؤرنلری ده یادا سالین، اله بئل کی اؤزوز ده بدنده اذئیت چکئرسئز. 4 عقد گرک هر کسئن طرفئندن حؤرمتلی توتولسون و دؤشهیی ده گرک لکهسئز ساخلانسین، چونکی تاری عئفتسئزلر و زئناکارلاری موحاکئمه اِلئیهجک. 5 شخصئیّتئز پولپرستلئکدن آزاد اولسون، نهیئز وار دیر، اونا قانع اولون، چونکی تاری اؤزی دیئب: «سنی هچ واخت بوراخمارام، سنی هچ واخت ترک اله مهرم.» 6 بونا گؤره یقئن ائنن دیئرئک: «رب منئم کؤمهیئمدئر، قورخمارام. ائنسان منه نه الئیهبئلر؟!» 7 سئزی هئدایت اِلهمئش اولانلاری کی، تارینین کلامینی سئزه ددئلر، خاطیرلایین. اولارین رفتارینین نتئجهسئنی دئقّت ائنن نظره آلین و اولارین ائمانیندان نومونه گؤتورون. 8 عئسا مسئح، دونَن، بو گون و ابده کئمی هَمَندئر. 9 فرقلی و قرئب تعلئملر ائنن یولدان آزمایین؛ چونکی یاخشیدیر کی، اورَک فیض ائنن قووّتلَنسئن، یمکلر ائنن یوخ کی، اولار ائنان مشغول اولانلار بئر فایدا گؤرمه دئلر. 10 بئزئم بئر قوربانگاهیمیز وار کی، عئبادت خیمهسئنده خئدمت الهینلرئن اوندان یمهیه حاقلاری یوخدور. 11 چونکی او حیوانلارین بدنلری کی، قانلاری لاپ بؤیوک کاهئن طرفئندن گوناه اوچون لاپ موقدّس یره گتئرئلئر، اوردوگاهین اشئیئنده یاندیریلیر. 12 بونا گؤره، عئسا دا، خالقی اؤز قانینین واسئطهسی ائنن تقدئس الهمک اوچون دروازانین اشئیئنده عذاب چکدی. 13 بونون اوچون گلئن اونون چکدئیی سئتمی داشیییب، اوردوگاهدان اشئک اونون یانینا گدک. 14 چونکی بوردا بئزئم دائمی بئر شهرئمئز یوخدور، بلکی گلهجک شهری آختاریریق. 15 اوندا گلئن اونون واسئطهسی ائنن دائمن تارییا حمد قوربانی، یعنی، اونون آدینی اعلان الهین دوداقلارین میوهسئنی تقدئم الهیک. 16 یاخشیلیق الهمهیی و اؤزگهلر ائنن پایلاشماغی یاددان چیخارتمایین، چونکی تاری بو جور قوربانلاردان خوشلانیر. 17 سئزه رهبر اولانلاردان ائطاعت الهیئن و اولارا موطئع اولون، چونکی اولار سئزئن جانلاریزین قیدئنه قالیرلار و گرک حساب ورهلر. قویون بونی شادلیق ائنان الهسئنلر، قم ائنن یوخ کی، سئزئن اوچون فایداسی اولماز. 18 بئزئم اوچون دوعا الهیئن؛ چونکی آرخایینیق کی، وئجدانیمیز تمئزدئر و جان آتیریق دا کی، هر شیده حؤرمتلی رفتار الهیک. 19 سئزئن هامیزا یالواریرام کی، بونی داها دا چوخ الئیهسئز، اِله کی، من تزلئک ائنن یانیزا قایتاریلیم. 20 ائندی باریش تاریسی کی، قویونلارین بؤیوک چوبانینی، ابدی عهدئن قانی واسئطهسی ائنن ربّئمئز عئسانی اؤلولردن دئرئلتدی، 21 سئزی هر یاخشی ائشده حاضیرلاسین کی، اونون ائرادهسئنی یرئنه یتئرهسئز و عئسا مسئحئن واسئطهسی ائنن اؤز نظرئنه خوش گلهنی، بئزده عمله گتئرسئن کی، اونا ابددن ابدهجک شؤوکت اولسون. آمئن. 22 آمّا قارداشلار، سئزه یالواریرام کی، بو تشوئق سؤزونی تحمّول الئیهسئز، چونکی سئزه قیساجا یازمیشام. 23 خبرئز اولسون کی، قارداشیمیز تئموتاعوس آزاد اولوب و اگر تزلئک ائنن یانیما گلسه، اونونان سئزی گؤرهجهیم. 24 بوتون رهبرلرئزه و بوتون موقدّسلره سالام یتئرئن. ائتالیادان اولانلار سئزه سالام گؤندَرئرلر. 25 فیض سئزئن هامیز ائنان اولسون. |
@ 2024 Korpu Company