۲تئموتاعوسا 3 - کتاب مقدس به زبان آذربایجانی جنوبی - گویشیآخیر گونلرده کی تاریسیزلیق 1 آمّا بونی بئل کی، آخیر گونلرده چتئن زامانلار گلهجک. 2 چونکی ائنسانلار اؤزلرئنیسِوَن، پولپرست، لافچی، کئبئرلی، سؤیَن، والئدینلره ناموطئع، ناسئپاس، ناپاک، 3 عاطئفه سئز، گوذشت سئز، قیبتچی، پرهئزسئز، مورووّتسئز، یاخشیلیقدان نئفرت الهین، 4 خئیانتکار، مولاحئظه اله مهین، تکبّورلی، عیّاشلیغی تاریدان داها چوخ سِون، 5 دئندارلیغین ظاهئرئنی ساخلایان آمّا اونون قووّتئنی دانان اولاجاقلار؛ بله آداملاردان اؤزونی اوزاق ساخلا. 6 چونکی بولارین آراسیندا او آداملار دا وار کی، اِولره گئرئب، جوربهجور هوسلرئن دالیسیجا قاچان و گوناه یوکونون آلتیندا اولان ضعئف آروادلاری اسئر الهیئرلر. 7 اولاری کی، دائم اؤیرهنئرلر، آمّا هچ واخت حقئقتی آنلایا بئلمئرلر. 8 یانّئس و یَمبهرئس نجه موسایا ضئدّ دوردولار، بو آداملار دا حقئقته ضئدّ دورورلار کی، عاغیلدا فاسئد، ائماندا دا مردوددورلار. 9 آمّا بوندان آرتیق ترقّی اله مئیهجکلر؛ چونکی اولارین آخماقلیغی هامییا آیدین اولاجاق، نجه کی، یانّئس و یَمبهرئسئن آخماقلیغی آیدین اولدی. پولوسون تیموتاعوسا آخیرکی نصئحتلری 10 آمّا سن منئم تعلئمئمی، رفتاریمی، هدفئمی، ائمانیمی، صبرئمی، محبّتئمی، تحمّولومی، 11 شئکنجهلرئمی و عذابلاریمی یاخیندان گؤروبسن؛ انطاکئیهده، ائقونئیهده و لئسترهده باشیما گلنلری بئلئرسن. نه شئکنجهلر باشیما گلدی و نجه رب اولارین هامیسیندان منی قورتاردی! 12 دوغرودان دا مسئح عئسادا دئندارلیق ائنان یاشاماق ائستهین بوتون آداملار عذاب چکهجکلر. 13 آمّا پئس و حؤقّهباز آداملار آلدادیب، آلدانماق ائنان پئسلئکده ترقّی الئیهجکلر. 14 آمّا سن، اؤیرندئیئن و یقئن تاپدیغین شیلرده داوام اله، چونکی بئلئرسن کی، کئمدن اؤیرندئن. 15 و اوشاقلیغیندان دا موقدّس یازیلاری بئلئبسن کی، قادئردئلر سنه حئکمت ورسئنلر و سنی ائمان واسئطهسی ائنن مسئح عئسادا اولان نئجاتا چاتدیرسینلار. 16 بوتون موقدّس یازیلار تارینین ائلهامیدیر و تعلئم، توبئخ، یولا گتئرمک و صالحلئکده تربئیه تاپماق اوچون فایدالیدیر، 17 اِله کی، تارینین آدامی کامئل و هر یاخشی ائش اوچون تجهئز اولسون. |
@ 2024 Korpu Company