۲تسالونئکلیلره 3 - کتاب مقدس به زبان آذربایجانی جنوبی - گویشیبئزئم اوچون دوعا الهیئن 1 نهایت، قارداشلار، بئزئم اوچون دوعا الهیئن کی، ربّئن کلامی تز یاییلسین و سئزئن آرازدا اولدوغی کئمی جلال قازانسین. 2 و بئز ترسه و پئس آداملاردان خئلاص اولاق؛ چونکی هامیدا ائمان یوخدور. 3 آمّا رب وفالیدیر و او، سئزی قووّتلَندئرئب شرئردن حئفظ اِلئیهجک. 4 بئزئم ده ربده سئزه اعتئمادیمیز وار کی، سئزه ددئیئمئز احکاملارا عمل الهیئرسئز و الئیهجکسئز ده. 5 رب اورَکلرئزی تارینین محبّتئنه و مسئحئن تحمّولونه هئدایت الهسئن. تربئیهسئزلری آییق سالماق 6 ائندی، قارداشلار، ربّئمئز عئسا مسئحئن آدیندا سئزه امر الهیئرئک کی، تربئیهسئزلئک ائنن گزن و بئزدن آلدیغیز تعلئمه موطابئق یاشامایان قارداشدان اوزاقلاشین. 7 چونکی سئز اؤزوز بئلئرسئز کی، نجه بئزدن نومونه گؤتورهسئز. چونکی بئز آرازدا ائنضئباطسیز بئر رفتار اله مهدئک. 8 هچ کئمئن چؤرهیئنی ده موفته یمهدئک، آمّا زحمت و چتئنلئک ائنن گجه-گوندوز ائشلهدئک کی، سئزئن هچ بئرئزه یوک اولمایاق. 9 بونون اوچون یوخ کی، گویا حاقّیمیز یوخدور، بلکی اونون اوچون کی، اؤزوموزی سئزه بئر نومونه اله یک و سئز بئزدن نومونه گؤتورهسئز. 10 حتّا سئز ائنن اولاندا دا سئزه بو امری وِردئک: هر کس ائشلهمک ائستهمئر، چؤرک ده یمهسئن. 11 چونکی اشئدئرئک کی، سئزلردن بعضئلری ائنضئباطسیز بئر حیات یاشاییب اصلا ائشلهمئرلر، آمّا بورونلارینی هر شیه سوخورلار. 12 رب عئسا مسئحده بله آداملارا امر الهیئب اولاری تشوئق الهیئرئک کی، آراملیق ائنان ائشلهیئب اؤز چؤرکلرئنی یسئنلر. 13 آمّا سئز، قارداشلار، یاخشیلیق الهمکدن یورولمایین. 14 اگر بئر کس بو نامه ده کی سؤزلرئمئزدن ائطاعت الهمئر، او آدامی نئشانلاییب اونونان آرتیق گلئش-گدئش اله مهیئن کی، اوتانسین. 15 آمّا حله ده اونی دوشمن حساب اله مهیئن، بلکی قارداش کئمی اونا نصئحت ورئن. ختم کلام 16 قوی صولح و سالامتلیق ربّئن اؤزی، سئزه دائم هر وجهده صولح و سالامتلیق عطا الهسئن. رب سئزئن هامیز ائنان اولسون. 17 من، پولوس، بو سالامی سئزه اؤز اَلئم ائنن یازیرام و بو، هر نامه ده بئر نئشاندیر؛ من بله یازیرام. 18 ربّئمئز عئسا مسئحئن فیضی سئزئن هامیز ائنان اولسون. |
@ 2024 Korpu Company