۱تسالونئکلیلره 4 - کتاب مقدس به زبان آذربایجانی جنوبی - گویشیموقدّسلئک و محبّت 1 نهایت، قارداشلار، بئز سئزه تعلئم وردئک کی، تارینی راضی الهمک اوچون نجه یاشایاسیز، و دوغرودان اِله ده یاشاییرسیز. ائندی رب عئسادا سئزدن خاهئش الهیئب سئزی تشوئق الهیئرئک کی، بونی داها دا چوخ الئیهسئز. 2 چونکی بئلئرسئز کی، رب عئسادا سئزه نه احکاملار وردئک. 3 تارینین ائرادهسی بودور: سئزئن موقدّس اولماغیز، یعنی، جئنسی عئفّتسئزلئکدن اؤزوزی اوزاق ساخلاماغیز. 4 کی، سئزدن هر بئرئز اؤز قابینی نجه موقدّسلئکده و احتئرامدا ساخلاسین؛ 5 تارینی تانیمایان بوتپرستلر کئمی، شهوتلی هاوا-هوسلرده یوخ. 6 و هچ کئم بو مسلهده اؤز قارداشینا خاطا اله مهیئب ضرر یتئرمهسئن، چونکی رب بوتون بولار اوچون قئصاص آلاندیر، نجه کی، اوّلدن سئزه دیئب ائخطار وردئک. 7 چونکی تاری بئزی ناپاکلیغا یوخ، موقدّس اولونماغا دعوت الهیئب. 8 بونا گؤره ده، بونی ردّ الهین آدام ائنسانی یوخ، بلکی تارینی اوزاق الهیئر کی، اؤز موقدّس روحونی سئزه ورئر. 9 ائندی قارداشلیق محبّتی بارهسئنده، احتئیاجیز یوخدور کی، بئری بو حاقدا سئزه یازسین، چونکی تارینین اؤزوندن اؤیرهنئبسئز کی، بئربئرئزی سوهسئز. 10 دوغرودان دا سئز بونی بوتون مقدونئیّهده اولان قارداشلارین هامیسینین حاقّیندا الهیئرسئز. آمّا، قارداشلار، سئزی تشوئق الهیئرئک کی، بونی داها دا چوخ الئیهسئز. 11 و آرام بئر حیات یاشاییب، اؤز ائشئزه مشغول اولاسیز و اؤز اَللرئز ائنن ائشلهیهسئز؛ نجه کی، سئزه امر الهدئک ده. 12 اِله کی، خارئجئلرئن حوضوروندا صحئح رفتار الهیئب، هچ بئر شیه مؤحتاج اولمایاسیز. مسئحده اؤلنلرئن بارهسئنده 13 آمّا، قارداشلار، گؤزلرئنی حیاتا یومموش اولانلار حاقّیندا، خبرسئز قالماغیزی ائستهمئرئک، اِله کی، اومئدسئز اولان اؤزگهلر کئمی قمگئن اولمایاسیز. 14 دوغرودان دا اگر ائنانیریق کی، عئسا اؤلوب گئنه دئرئلدی، اِله ده تاری عئسادا گؤزلرئنی حیاتا یومموش اولانلاری اونونان گتئرهجک. 15 چونکی بونی سئزه ربّئن کلامی ائنن دیئرئک کی، یاشایان و ربّئن گلئشئنهجک دئری قالان بئزلر، اصلا گؤزلرئنی حیاتا یومموش اولانلاری اؤتمهیهجهیئک. 16 چونکی رب اؤزی اوجا سسلی بئر حؤکم ائنن، باش ملهیئن سسی ائنن، و تارینین شیپوری ائنن گؤیدن انهجک و اوّل مسئحده اؤلنلر دئرئلهجکلر. 17 اوندان سورا، یاشایان و دئری قالان بئزلر، اولار ائنان بئرلئکده یوخاری گؤتورولوب، بولودلار آراسیندا ربّئن گؤروشویونه هاوادا گدهجهیئک و بله ده همئشه رب ائنن قالاجاغیق. 18 بونا گؤره، بئربئرئزه بو سؤزلر ائنن تسلّی ورئن. |
@ 2024 Korpu Company