۱تسالونئکلیلره 3 - کتاب مقدس به زبان آذربایجانی جنوبی - گویشی1 بونا گؤره ده، تاب گتئرمهیه داها قادئر اولماییب، آتنده تک قالماغا راضی اولدوق، 2 و قارداشیمیز و مسئحئن ائنجئلئنده همکاریمیز و تارینین خئدمتکاری تئموتاعوسی یانیزا گؤندَردئک کی، ائمانیزدا سئزه قووّت ورئب، سئزی تشوئق الهسئن 3 اِله کی، هچ کس بو موصئبتلردن پرئشان اولماسین؛ چونکی سئز اؤزوز بئلئرسئز کی، بئز بونون اوچون تعیئن اولونموشوق. 4 چونکی یانیزدا اولدوغوموز زامان دا سئزه قاباقدان دمئشدئک کی، باشیمیزا موصئبتلر گلهجک؛ و بئلئرسئز کی، بله ده اولدی. 5 بونون اوچون من ده، آرتیق دؤزه بئلمهدئیئم زامان، یانیزا آدام گؤندَردئم کی، ائمانیزدان خبردار اولوم، اولمایا کی وسوسهیه سالان سئزی وسوسهیه سالسین و چکدئیئمئز زحمت هدر اولسون. تئموتاعوسون گتئردئیی خوش خبرلر 6 آمّا ائندی تئموتاعوس سئزئن یانیزدان قاییدیب، سئزئن ائمان و محبّتئزدن بئزه خوش خبرلر گتئرئب و بوندان دا کی، بئزی دائم محبّت ائنن یادا سالیرسیز و بئز سئزه حسرت چکدئیئمئز کئمی، سئز ده بئزه اِله حسرت چکئرسئز. 7 بو سببدن، ای قارداشلار، بوتون پرئشانلیق و موصئبتئمئزده، ائمانیزین واسئطهسی ائنن سئزئن حاقّیزدا تسلّی تاپدیق. 8 چونکی ائندی سئز اگر ربده ثابئت دوراسیز، بئز یاشایاریق. 9 چونکی سئزئن حاقّیزدا تارینین حوضوروندا بوتون او شادلیغیمیز اوچون، تاریدان نجه تشکّور الئیه بئلرئک؟! 10 بئز گجه-گوندوز خالئص اورَک ائنن دوعا الهیئرئک کی، اوزوزی گؤرک و ائمانیزدا کی اسکئکلری دولدوراق. 11 قوی ائندی آتامیز تاری اؤزی، و ربّئمئز عئسا یولوموزی سئزئن طرفئزه سالسین. 12 و بئزئم سئزه اولان محبّتئمئز کئمی، قوی رب سئزئن محبّتئزی بئربئرئزه و بوتون ائنسانلارا آرتیریب، چوخالتسین. 13 و اورکلرئزی مؤحکم الهسئن، اِله کی ربّئمئز عئسا بوتون موقدّسلری ائنن گلنده، آتامیز تارینین حوضوروندا، عیبسئز و موقدّس اولاسیز. |
@ 2024 Korpu Company