۱پطروس 1 - کتاب مقدس به زبان آذربایجانی جنوبی - گویشی1 عئسا مسئحئن حوارئسی پطروسدان، پونطوس، قالاتئیا، کاپادوسئیا، آسئیا ایالتی و بئتئنئیایا داغیلمیش قرئبلره کی، 2 آتا تارینین قاباقدان بئلدئیئنه موطابئق، موقدّس روحون تقدئس ائشئنئن واسئطهسی ائنن عئسا مسئحدن ائطاعت الهمکلری اوچون و اوستلرئنه اونون قانینین سپئلمهسی اوچون سچئلئبلر. فیض و سالاماتلیق لاپ دولی اؤلچوده سئزئن اولسون. دئری اومئد 3 تاری و ربّئمئز عئسا مسئحئن آتاسی موتبارک اولسون کی، اؤز بؤیوک فیضئنه گؤره، عئسا مسئحئن اؤلولردن دئرئلمهسی ائنن باعئث اولدی کی، بئز دئری بئر اومئد اوچون تزهدن دوغولاق. 4 اِله کی، گؤیلرده سئزئن اوچون ساخلانمیش، آرادان گتمهین، لکهسئز و سولماز بئر مئراثی اَله گتئرک؛ 5 سئز تارینین قودرتی ائنن، آخیر زاماندا ظاهئر اولونماغا حاضیر بئر نئجات اوچون، ائمان واسئطهسی ائنن حئفظ اولورسوز. 6 بوندا سئز چوخ سوئنئرسئز، گرچی ائندی آز بئر مودّت اوچون، لازیم ائدی، جوربهجور ائمتاحانلار ائنان پرئشان اولاسیز، 7 اِله کی، عئسا مسئحئن نئجاتینین ظوهوروندا، ائمانیز ثابئت اولا و فانی اولان قیزیلدان داها دَیَرلی اولوب، اود ائنان بله ائمتاحان اولسا دا، تعرئف، جلال و حؤرمت گتئره. 8 سئز گرچی اونی گؤرمهیئبسئز، آمّا اونی سوئرسئز. گرچی ائندی ده اونی گؤرمهیئرسئز، آمّا اونا ائنانیرسیز و وصفه گلمهین شادلیق ائنان و چوخلی جلال ائنان دولورسوز، 9 و ائمانیزین نتئجهسئنه یعنی، جانلاریزین نئجاتینا نایئل اولورسوز. 10 بو نئجاتا گلئنجه، پیغمبرلر او فیض بارهده کی سئزه گلهجک، قاباقجادان جهد ائنن آختاریب تجسّوس الهدئلر 11 و آراشدیریردیلار کی، بئلسئنلر، اولاردا اولان موقدّس روح، کئمه و هانسی زامانا ائشاره الهیئر، او زامان کی، مسئحئن عذابلارینی و اوندان سورا گلن شووکتلرئنی قاباقجادان خبر ورئر. 12 اولارا آشکار اولدی کی، بو شیلرده اولار اؤزلرئنه یوخ، بلکی سئزه خئدمت الهیئردئلر کی، ائندی ائنجئلی وعظ الهینلر طرفئندن گؤیدن گؤندَرئلمئش موقدّس روح واسئطهسی ائنن سئزه اعلان اولونوب؛ او شیلر کی، اولاری گؤرمهیه ملکلر ده حسرت چکئرلر. موقدّس اولون 13 بونون اوچون، فئکئرلرئزی عمل اوچون حاضیرلایین، آییق اولون، اومئدئزی کامئل بئر شکئلده او فیضه باغلایین کی، عئسا مسئحئن ظوهوروندا سئزه ورئلهجک. 14 سؤزه باخان اوشاقلار کئمی، جاهئل زامانلاریزدا اولان او اوّلکی شهوتلره اؤزوزی اوخشاتمایین. 15 بلکی سئزی دعوت الهین او موقدّس اولان کئمی، سئز ده اؤزوزی هر رفتاردا موقدّس ساخلایین؛ 16 چونکی یازیلیب: «موقدّس اولون، چونکی من موقدّسم.» 17 اگر «آتا» چاغیردیغیز اودور کی، طرفدارلیق الهمهدن هر کسی ائشئنه گؤره موحاکئمه الهیئر، اوندا یر اوزونده اولان بو قوربت زامانیزی قورخی ائنن کچئردئن. 18 بئلئرسئز ده کی، اجدادلاریزدان مئراث آلدیغیز باطئل حیات یوللاریزدان، گوموش و یا قیزیل کئمی فانی شیلر ائنن تزهدن آلینماییبسیز، 19 بلکی باهالی قان ائنان، عیبسئز و لکهسئز بئر قوزونونکی کئمی، مسئحئن قانی ائنن. 20 چونکی او، دونیانین یارانماسیندان قاباق تانینمیشدی، آمّا سئزئن خاطئرئز اوچون بو آخیر زامانلاردا ظاهئر اولوب. 21 سئز اونون واسئطهسی ائنن، اونی اؤلولردن دئرئلدن و اونا جلال ورن تارییا ائنانانلارسیز، اِله کی، ائمان و اومئدئز تاریدادیر. 22 ائندی کی، حقئقتدن ائطاعت الهیئب جانلاریزی قارداشلارا خالئص محبّت الهمک اوچون تمئزلهیئبسئز، جهد ائنن بئربئرئزی اورَکدن سوئن. 23 چونکی سئز فانی توخومدان یوخ، بلکی فانی اولمایاندان، یعنی تارینین دئری و باقی اولان کلامینین واسئطهسی ائنن تزهدن دوغولوبسوز. 24 چونکی «بوتون بشر اوت کئمیدئر، بوتون جلالی دا اوتون چئچهیی کئمیدئر. اوت سولور، چئچک ده دوشور. 25 آمّا ربّئن کلامی ابده کئمی قالیر.» بودور او کلام کی سئزه اعلان اولونور. |
@ 2024 Korpu Company