Tuima 28 - WEN GBAŊKA

¹ Ti ale jam paari kunkɔŋni nalimnyiini la, tɛŋ kala demma jam weeni ti kama ayen tɛŋ kala yuei ale Malita.

² Tɛŋ kala demma a jam tuesi ti kama a te ti zula. Ŋmoruk yaa deri a ni ate ŋoota boro ate ba yaa jam cheem bolim a te ti.

³ Pɔɔl yaa tigsi daata ayen wa nyo bolimu po. Wa ale pai boro a nyoro la, bolim wuluku yaa nye ate waab a nyini ti po a chali nyini a meli wa nisa a dom wa.

⁴ Tɛŋ kala demma ale nya ale waamu meli Pɔɔl nisimaŋa la, ba yaa weeni chaab ayen, <>

⁵ Alege waamu ale meli Pɔɔl nisimaŋa la, wa yaa misi si ate waamu lo bolimu po alege wari an nye wa.

⁶ Nuruma yaa jam a limisi ale a poli ayen ba nya ale wa nyiŋka fuusi yaase wa deri kpi dua. Alege ba ale jam a limisi ale a poli ate ku beni alege wari an nye wa la, ba yaa tagri ba popolaŋa ale ge weeni ayen, <>

⁷ Tɛŋka naawa yuei a jam le Pubiliyosi. Naawa de kaduksa ale jam dua moata juijui ate ti jam kala la. Wa yaa jam nye ti tia. Daa ŋata meena ti kasim jam bo ka wala yenni ate wa a nya ti zuk nalimnyiini.

⁸ Ŋoota ale poiyɔgsik ale jam ta wa kowa ate wa jam dua dɔk po. Pɔɔl yaa jo ayen wa nya wa a pai wa nisima a vi wa zuk a puusi te wa ate wa nya nyiŋyɔgsa.

⁹ Wanni de ale ga nye la, yɔgnyieŋsa meena ale jam bo tɛŋ kala la, a jan jam kama a nya nyiŋyɔgsa.

¹⁰ Ba jam te ti ka tiirita nna yegayega. Ti ale jam pai ŋaaruŋ ku choa ayen ti basi ba abe ti ŋman cheŋ la, ba jam pai ŋan baai ate ti jam a yaali la, a nyo ku po a te ti a magsi ti chelimu.

¹¹ Ti jam goa Malita ka chiisa sita ale ge yaa cheŋ Aroom. Ŋaaruŋku de ate ti jam jueli la yuei ale <> Ku jam ka Alezandiria ŋaaruŋ. Ku be jam ka ŋoota wein ate ku jam wari Malita ayen ŋootaŋa taamu.

¹² Ti yaa jam paari Sirakusi tɛŋka goa dula daa ŋata.

¹³ A zaani dula a ŋman paari tɛŋ ka choa ate ba a wi ayen Arigiyum. Vari ale ga veenti la, viok yaa nyini yeniŋ a gala geŋ a fuk. Daa ŋaye dai ate ti yaa ŋman paari Putiyooli tɛŋka.

¹⁴ Dula jigini ate ti jam nya Kirisita bisa ate ba weeni ti ayen ti daa yaali ti goa daa ŋayopɔi ale ba. Ti yaa siak a goa daa ŋayopɔiwa ale ba ale ge yaa yiti cheŋ Aroom.

¹⁵ Ti Kirisita bisa suataŋa ale bo Aroom, ale wom ayen ti cheena la, ba yaa nyini cheŋ paari Apiyas Yabaŋa ale Vuusum Yie Ŋatawa, a jam tu ti. Pɔɔl ale ga nya ba ale ba cheena la, ku yaa te wa nyiŋ pagra ate wa te Wen jiam.

¹⁶ Ti ale jam paari Aroom la, ba jam basi ate Pɔɔl a boro ka wadek wa nyiini, ale tugurik tɔŋdɔ waai ale a limisi wa la.

¹⁷ Daa ŋata ale jam taam la, Pɔɔl yaa wi Juuma kpaŋŋa Aroom tɛŋka po ate ba jam ayen wa nye tuka ale ba. Ba ale jam tigsi chaab jigi yeŋ la, Pɔɔl yaa weeni ba ayen, <

¹⁸ Ba ale bek mu bega a piisi la ŋaaŋnyiŋ, ba an nya wari a magsi ba ko mu. Ba yaa a yaali ba basi mu ate m cheŋ fasiyaa,

¹⁹ alege Juuma ale ga wom Aroom demma ale biisi nna la, ba yaa zɛri ate ku yaa fɛ mi ate mi weeni ayen mi a yaali ayen m paari ka Siiza jigi ate wa wom m le ta diila. Alege mi jam ka chaab ale m dek nuruma ayen ba kaasi wari ya ate m toariŋ ba Siiza niŋŋa.

²⁰ Dila nyiŋ ate mi wi ni ayen m nya ni abe m weeni a sak ni. Mi be ta chɔrinni de kama dii nyiŋla mi ta yiila ŋaai mɛ ate Izirali demma meena mɛ a ta la.>>

²¹ Ba yaa tulisi wa ayen, <

²² Alege tama a yaali kama ayen ti wom fi mɛ popola ale ka diila, dii nyiŋla, jigi meena nuruba kasim a weeni kama ayen ba kan yaali nuru baai ate fi maa bo ba po la.>>

²³ Ba yaa dak dai yoŋ ayen ba ŋman nye tuka ale Pɔɔl. Dila danni ale jam paari la, ba yaa piisi a tigsi chaab juijui ate Pɔɔl a goa la. A ta nyini saluik a jam paari junɔi Pɔɔl kasim jam a biisi a magsi chaab ale ka Wen naamu wie. Wa kasim jam pii ka nyiŋ a biisi a ta a nyini Moosis Sinsaŋŋa gbaŋka po ale Wen Biisiteerɔma ale ŋmarisi dii la po ayen ku sak ayen wa ale a biisi diila ka wensie a magsi chaab ale Yeezu.

²⁴ Ba gela a jam siak kama ayen wa ale a biisi diila ka wensie. Ba gela mɛ an jam siak ya. Ba ale jam a nak nanpaŋŋa nna la, ba yaa waaŋ chaab. Ba ale diem kan jam waaŋ chaab diila,

²⁵ Pɔɔl yaa weeni wa dinyi ayen, <

²⁶ Wen Chiika ale jam biisi dii a te wa ayen wa weeni a sak ni la ale nna ayen,

²⁷ Dii nyiŋla, nuruma de ka tukpari nyam. Ba kan wom, ba abe mum ba ninaŋa kama, kan daa di, ba ti sum miŋ a chak kama. Dii ate ba nya ale ba ninaŋa la ale a wom ale ba tueŋa la. Ba ti sum miŋ chak kama ale ba popolaŋa a ŋmani jam mi jigi a nya nyiŋyɔgsa.>

²⁸ Mi a yaali kama ayen ni seba ayen Wen a tom wa varibasika mɛ kama a te tɛŋsa meena ate ba le wom wa.>>

²⁹ Pɔɔl ale weeni nna nueri la, Juuma yaa nak nanpaga ale chaab a yaa waaŋ chaab.

³⁰ Pɔɔl jam bo dula ka bena ŋaye. Wa jam bo ka yeri dinyi po a tuni ale ge a goa di po. Waai meena nyiem dan jam wa yenni, wa a nye kula nyɔnɔwa tia ka nalimnyiini.

³¹ Wa nyiem jam nyini ka peelim a kan chali yɔgsum a sak nuruba Wen naamu wie ale a sak ba mɛ Nyɔnɔwa Yeezu Kirisita wie. Nuru an jam nye ate wa an baga sak wieŋa de.