Tuima 27 - WEN GBAŊKA

¹ Gominawa ale jam poli ayen ti jueli ŋaaruŋ a cheŋ Itali la, ba yaa pai Pɔɔl ale ligrɔba ba chaab a nyo Juliyos nisima po. Juliyos jam ka Aroom tɛŋka tugurik tɔŋdɔma beŋ kanyi kpagi.

² Ti jam zaani ka Siizariya tɛŋka a jueli ŋaaruŋ. Ku jam nyini ka Adiramitiyom. Ŋaaruŋku a jam gomsi magsi ayen ku cheŋ ka jigi ŋaai meena ate ŋaaruŋta a zaani Asia tɛŋka la. Nuru ale jam maa va ti a cheŋ, wa yuei ale Arisitaakus wa jam ka Tesalonika denɔ.

³ Vari ale veenti la, ti yaa paari Saidon. Juliyos a jam ta zula ale Pɔɔl a yaa siak ayen Pɔɔl ga nya wa doama ate ba te wa jabuui ate wa a yaali la.

⁴ Ti yaa basi ale lo jueli moata Saipurus tɛŋka diila viok ale jam a fɔb ti.

⁵ Ti yaa lo Silisiya nyakpiemu jueli cheŋ Pamfiliya a ga paari Mira tɛŋ kpieŋka ale bo Lisia po la.

⁶ Dula jigini ate tugurik tɔŋdɔba kpagni a yaa nya ŋaaruŋ ale ku nyini Alezandiria a taam a cheŋ Itali. Wa yaa pai ti nyo ku po.

⁷ Ŋaaruŋ kula po, ti kasim jam a cheŋ ka nna maga maga ate daaŋa jam paari da boari ate ti nam ale ge yaa paari Kinides tɛŋka. Ka an jam yalima ale ti. Vioku a jam pagra ka nna yegayega ate ti an ŋman jam baga a va suik kuui ate ti jam va la, ate ti yaa ŋmeriŋ va Kariti tɛŋka juijui ate vioku an jam pagra la a jam va jigi di choa ate ba a wi ayen Salomoni.

⁸ Ti le jam sali va kunkɔŋni a cheŋ la, ku jam tua kama a te ti ate ti yaa jam paari jigi ate ba a wi ayen Ŋaaruŋta Zaani Maŋ jigi a moata Lasia tɛŋka.

⁹ Ti jam beni ka nna yegayega ate ku ga paari diipo ate ku pagra ale ti chelimu la. Dii mɛ la, dai dii danni ate ba a nye Juuma tigi dii a magsi chaab ale wabaataŋa vɔŋteka la a jam poom taam kama. Dila ŋaaŋnyiŋ, vioku a ŋmasi pagra kama. Pɔɔl yaa te ba sinsaŋŋa de ayen,

¹⁰ <>

¹¹ Alege tugurik tɔŋdɔba kpagni a jam ka siaka ale Pɔɔl ale weeni dii la. Ŋaaruŋku damdɔwa ale ku nyɔnɔwa ale jam weeni diila ale jam basi ate tugurik tɔŋdɔba kpagni a siak te ba.

¹² Ba jam weeni ayen juijui ate ba jam za la, an jam nala a magsi ba wari dula ŋoota wenni. Dila nyiŋla, nuruma yegayega a jam a yaali kama ayen ku dan siak a nye ba dam a paari Foniksi tɛŋka ate ba wari dula ŋoota wenni a vuusi. Foniksi bo ka Kariti tɛŋka juijui ate ŋaaruŋta a nyiem zaani a vuusi la. Jigini de a tuk ka yeniŋ geŋ.

¹³ Viok yaa nyini yeniŋ a gala geŋ a fuk nna balibali ate ba yaa poli ayen nya kude ale deri basi kama ate ba nye ba ale poom a yaali dii ayen ba cheŋ la. Ba yaa pai kutuk kpioŋ kuui ate ba nyiem pai a yik ŋaaruŋku a zaani la a yeeri ku a ta nyini nyiamu po a jueli. Ba yaa jam cheŋ va kunkɔŋni nɔi nna farafara a moata Kariti tɛŋka.

¹⁴ Alege ku an bula beniya ate viok kpioŋ a yaa nyini a gala geŋ kori nummu po kunkɔŋni a jam

¹⁵ fɔbi ŋaaruŋku. Ku be ale jam pagra nna yegayega ate ti an jam baga dam la, ti yaa basi ate ku ji ŋaaruŋku a ta a cheŋ.

¹⁶ Ti ale jam paari tɛŋ fiik kanyi ate ba a wi ayen Kɔda ate nyiam a gilim ka la ate vioku an jam pagra, ti yaa nam nna yegayega ale ge baga a yaa yik ŋaaruŋku ŋaaruŋ fiika a zaani.

¹⁷ Ba yaa dari ate ku jueli ŋaaruŋ kpioŋku zuk. Ba yaa pai mi pagrisa a bobi gilim ŋaaruŋ kpioŋku. Yɔgsum ale jam ta ba ayen dai dii dai ba ŋaaruŋku a nin zaan a chali ga feri tintain tii ale vi chaab a jueli dua nyiamu tɛŋ a moata Libia nyiamu kunkɔŋni nɔi la. Dila nyiŋ, ba yaa jam a cheŋ maga maga ale basi ate vioku a tusi ŋaaruŋku a ta a cheŋ.

¹⁸ Va kpioŋku kasim jam a fɔbi ka dila ate nyamiisaŋa a yiri a jueli wein a jam a lo. Vari ale ga veenti la, ba yaa piilim a kɔlim ŋantaŋa ŋaaruŋku po a yuk a basi nyiamu po.

¹⁹ Daa ŋatawa danni ba yaa pai nisima a pai ŋan baai ate ti ta a nye ate ŋaaruŋku a zaani ale a cheŋ la gela a yuk basi nyiamu po.

²⁰ Daaŋa a jam piisi ka nna yegayega alege ti an jam baga a pai nimbiri tu wenbinni yaase chiŋmarisa. Vioku mɛ abe kasim jam a fɔbi ka dila. Ti ŋman jam ka yiila ayen ti le vuugi.

²¹ Ba ale ga cheŋ ate ku beni alege ba an dɛ ŋandiinta la, Pɔɔl yaa yiti zaani ba niŋ a weeni ba ayen, <

²² Alege yɔgyɔgla de, ni yik nidek. Ni wanyi mɛ a kan kpi. Ka ŋaaruŋku nyiini ale ku kaasi.

²³ Deemwa yokku Wen maarɔ ale nyini Wen dii ale soa mi ate mi a puusi wa la a jam mi jigi

²⁴ a weeni mi ayen, >>

²⁵ Pɔɔl yaa weeni nuruma ayen, <

²⁶ Alege ti cheŋ paari tɛŋ kanyi ate nyiam gilim ka la.>>

²⁷ Ti kasim jam bo ka nyakpiem buui po ate ba a wi ayen Adariya la po a va vioku ate ku fɔbi ti a ta a cheŋ la. Ku jam ka yok kuui ale saari yogta pi ale tinaansiwa la goota suŋsuŋ ate baai ale a tom ŋaaruŋku po la, a yaa poli ayen ti boro a moata tɛŋ yɔgla.

²⁸ Dila nyiŋla, ba yaa pai miik a bobi jaab dobruk nyiŋ a yaa basi ate ku siŋ nyiamu po a nya ale ku limisa ka nna yegayega. Ku ale ga nye magadek la, ba yaa ŋman magsi nya ate ku ŋman limisa yegayega.

²⁹ Damdɔma a jam yɔgsa kama ayen ti le nak ka pinaŋa, dila ba yaa pai kutuk dobrita tinaansi a bobi basi nyiamu po ale a puusi ayen vari veenti.

³⁰ Baai ale a tom ŋaaruŋku po la, a jam pii ka nyiŋ ayen ba chali bɛ. Ba yaa foli ŋaaruŋ fiika a basi nyiamu po ale ge yaa velim ayen ba boro a foli ka kuta dobrita ti chaab ŋaaruŋku niŋ.

³¹ Alege Pɔɔl yaa weeni tugurik tɔŋdɔba kpagni ale tugurik tɔŋdɔma ayen, <<Ŋaaruŋku tuimtomdɔma de a dan kan bo ŋaaruŋku po, ni kan vuugi.>>

³² Tugurik tɔŋdɔma yaa gebi mi sii ale yik ŋaaruŋ fiika a ta la a basi nyiamu po.

³³ Vari yaa jam moata ka veentika ate Pɔɔl yaa weeni ba ayen ba dɛ ŋandiinta yɔgla. Pɔɔl yaa ŋman pilim weeni ba ayen, <

³⁴ Dila nyiŋ ate mi a weeni ni ayen ni dɛ ŋandiinta. Ku a fɛ kama ayen ni dɛ ate ni vuuk. Wen weeni mi kama ayen ni zuimaŋa zuisaŋa kanyi la a kan bɛ.>>

³⁵ Pɔɔl ale ga weeni nna a nueri la, wa yaa pai boroborok puusi a te Wen a nye wa jiam ba meena niŋ, a yaa wɛ boroboroku a piilim ŋɔbika.

³⁶ Ba yaa yik badek meena a dɛ ŋandiinta.

³⁷ Baai meena ale jam bo ŋaaruŋku po la a jam ka nuruba kobsiye ale pisiyopɔi ale bayuebi.

³⁸ Waai meena ale dɛ chak la, ba yaa kɔlim ŋanbieŋa meena a yuk basi nyiamu po ale ge ayen ŋaaruŋku a valima maga.

³⁹ Vari ale veenti la, ŋaaruŋku tuimtomdɔma yaa nya kunkɔŋni dinyi alege ba an jam miŋ ale ka juijui kunkɔŋi la. Ba jam nya ka nyakpiemu gugoruk kunyi ale tintain busuŋ a dua jueli maga ate ba yaa poli ayen ba dan baga abe ba dam ŋaaruŋku a ga zaani dula.

⁴⁰ Ba yaa gebi kuta tii ale jam yik ŋaaruŋku a zaani la miisaŋa yaa basi ate ti a cheŋ nyiamu po. Diipo ate ba boro a gebi kutaŋa miisaŋa la, ba jam maa foli dakpien tii ale bobi maŋ ŋaaruŋku ŋaaŋka ate nuruba pai a dam ku la ayen ba yaa pai tila a dam ku. Ba yaa zak garuk kuui ale bobi yiga ŋaaruŋku niŋka la ale ge ayen vioku fuk ku a basi niŋ. Ba yaa nye dila a deri a cheŋ kunkɔŋni.

⁴¹ Alege ŋaaruŋku yaa nak kuŋkutinni ate ku niŋka yaa feri kuŋkutinni an ŋman baga cheŋ. Ku ale nye dila la, nyamiisaŋa mɛ a kasim jam a fɔbi ku ŋaaŋka ate ku a wɛ nna bunabuna a lo nyiamu po.

⁴² Tugurik tɔŋdɔma yaa nye ba popola ayen ba ko ligrɔma meena ate ba waai a kan nya suik a puŋ nyiamu a chali bɛ.

⁴³ Alege tugurik tɔŋdɔma kpagni a kan jam a yaali ayen wa ko Pɔɔl. Wa yaa weeni ba ayen ba kan nye dila. Wa jam weeni ba kama ayen waai meena ale baga a dɛ nyiam la, ba yɔk a zi nyiamu po a dɛ jueli kunkɔŋni

⁴⁴ ale ge ate mbala meena a yik ŋaaruŋku daataŋa yaase ku ŋan baai ale kasi a lo la a jueli. Ti meena ale jam nye dii a vuuk a paari kunkɔŋni la ale la.