Tuima 20 - WEN GBAŊKA

¹ Wɔkwɔkka de ale ga nueri la, Pɔɔl yaa wi Kirisita bisaŋa jigi yeŋ a biisi deŋsi ba kpa ale ge a banti ba ale a cheŋ Masidoniya.

² Wa ale nyiem gilim Masidoniya tɛŋka meena a biisi deŋsi ba kpa la, wa yaa cheŋ Girik tɛŋka.

³ Dula jigini, wa jam goa ka chiisa sita. Wa ale jam boro a gomsi ayen wa jueli ŋaaruŋ a cheŋ Siriya tɛŋka la, wa yaa miŋ ayen Juuma a jam a poli ka wa sitika. Wa yaa tagri wa popolaŋa a pilim ŋmani va Masidoniya a taam cheŋ Siriya.

⁴ Nuru wanyi ale jam boro ate ba a wi wa ayen Pirrus. Wa nyini ka Beria tɛŋka. Wa biik yuei jam ale Sopaata. Biika de ale jam maa va Pɔɔl a cheŋ. Baai mɛ ale jam maa va wa a cheŋ la, ale Arisitaakus ale Sekundus. Bala nyini ka Tesalonika. Mbala jam ale Gayus, wa nyini ka Daabe tɛŋka, ale Tikikus ale Torofimus. Bala mɛ nyini ka Asia tɛŋka. Timoti mɛ a jam maa va wa cheŋ kama.

⁵ Bade a jam dɛka niŋ cheŋ ga bo Torowas a limisi tama.

⁶ Alege tama a basi Filipai tɛŋka a lo benni a jueli ba le jam de tigi dii ate ba kan nyo dabinta di ŋandiintaŋa po la ŋaaŋnyiŋ. Daa ŋanu dai ti yaa paari ba Torowas tɛŋka po, ti jam bo dula ka daa ŋayopɔi.

⁷ Bakoanni piilimka dai, ti meena yaa tu chaab ti de ŋandiinta ate Pɔɔl yaa biisi te tigsuŋku. Dii nyiŋla wa jam a poli kama ayen dai dii ale paasaŋ la wa basi dula jigini. Wa jam kasim a biisi kama ate ku paari yok suŋsuŋ.

⁸ Zeuŋta yegayega ate ba jam toati zaani ŋmazuk kiari po ate tama jam tigsi kala.

⁹ Nidoabili wanyi ale jam maa kala dɔkku tuokparuku zuk diipo ate Pɔɔl jam boro a biisi la. Nuruwa de yuei ale Yutikus. Goom yaa jam yik wa ate wa goa a baŋ wadek a yaa nyini kiari dii ale saari butawa la zuk a jam lo tɛŋ. Ba ale jam zak wa la, ba ga a nya ale wa kpi kama.

¹⁰ Pɔɔl yaa siŋ tɛŋ a kpi duna tɛŋ gbaari wa ale ge weeni ayen, <>

¹¹ Pɔɔl yaa ŋman jueli gboŋku zuk ate wa ale ŋaaŋviirɔma mbala a maa chaab a dɛ ŋandiintaŋa. Wa ale ga biisi ale ba ate ku beni nna yegayega ate wenbinni a poom moata pusika la, wa yaa basi ba ale cheŋ jigi yoŋ.

¹² Ba yaa ta nidoabinni a kuli yeri ale suipeentik. Wa an jam kpi ya.

¹³ Ti yaa cheŋ ga jo ŋaaruŋku po a cheŋ Asos tɛŋka. Pɔɔl jam nye wa popola kama wa va suik a cheŋ Asos ate ti yaa jam paari wa dula jigini ate ti cheŋ.

¹⁴ Wa yaa ale jam paari tama Asos tɛŋka la, ti yaa pai wa a nyo ŋaaruŋku po a cheŋ Mitiliini.

¹⁵ Ti yaa jueli ŋaaruŋku a cheŋ dila veenti vari a va Kiyos tɛŋka a taam paari Samos tɛŋka. Vari ale ga veenti la, ti yaa paari Militus.

¹⁶ Ti jam gaam Efisos kama dii nyiŋla wa kan jam a yaali ayen wa beni Asia tɛŋka. Dii nyiŋ ate wa jam a kpabi la, wa jam a yaali kama ayen wa paari Jerusalem ate wa dan baga abe wa paari Daa Pisinu Tigini.

¹⁷ Pɔɔl yaa zaani Militus a tom tuntomiŋ a te Efisos a weeni Efisos Kirisita bisaŋa ale a tu chaab la kpaŋŋa ayen ba tu wa Militus.

¹⁸ Ba ale jam tu wa la, wa yaa weeni ba ayen, <

¹⁹ Nama dek seba ayen m jam zaabi m dek ka nna yegayega, m kasim a kum ka ninyiam a tom m tuimaŋa ase yɔma la a te Naawen. Diipo ate m jam a tom dila la, ninam nna yegayega ale jam m jigi dii nyiŋla Juuma ale jam a nye mu gaasa.

²⁰ Nama dek abe seba mɛ ayen diipo ate m jam nyini peelim ale maa jo ni yeeŋa po a sak ni la, mi an zɛri ni sakka wa dii ale di te ni maarika la.

²¹ M jam weeni Juuma ale baai ale kan daa Juuma la, ayen ku a fɛ kama ayen ba basi ba wabaataŋa tomka abe ba va Naawen a pai badek a te Nyɔnɔwa Yeezu.

²² Yɔgyɔgla de ka Wen Chiika ale weeni mu ayen m cheŋ Jerusalem ate m siak alege m zɛ dii ale di nye mu dula la.

²³ Alege m seba kama ayen Wen Chiika ale kaam mu ayen m seba ale jigi meena ate mi a cheŋ la, ba le yik mu a lik, daanika mɛ le jam m jigi.

²⁴ Alege mi dek nyuvunni, mi kan nya di ase di ka jaab mi jigi la. Mi a yaali kama ayen m tom tuin dii ate Nyɔnɔwa Yeezu a te mu la a nueri. Tuini de ale m weeni a sak nuruba wapaala wamaŋsaŋa a magsi chaab ale wamaŋ sii ate wa nye a te nuruba ŋmanteka nyiŋla.

²⁵ <

²⁶ Dila nyiŋla, mi a weeni ni kama ayen ni wanyi abe dan bɛ kula daa mi niŋ ale la.

²⁷ Dii nyiŋla, mi an tali wari a magsi chaab ale Wen ale a poli ayen wa nye diila.

²⁸ Dila nyiŋla, ni be ŋmasi a nya nidek ale nuru baai ate Wen Chiika a pai te ni la zuk nalimnyiini. Wen pai ka wadek biika ziimu a da Kirisita bisaŋa ale a tu chaab la. Ni be a nya ba zuk ase naapeerik ale a nya wa piisa zuk diila.

²⁹ M seba a chak kama ayen mi dan basi ni ale cheŋ, nuruba ale jam jo ni suŋsuŋ. Ba a nye ase ka piina ale jo piisa suŋsuŋ a kaasi ŋa diila.

³⁰ Di danni cheena ate nuruba nyini nidek po a nyini a velim a paasi ni ate nya kude basi ate Kirisita bisaŋa a basi ba suiku abe ba maa va ba.

³¹ Dila nyiŋla, ni be kpesi nidek abe ni a teeri diipo yok ale kantueŋ ate m kasim a kum ale a kaam ni wanyi wanyi ate ku ga paari bena ŋata la.

³² <

³³ Mi an jam vari ni waai ligra yaase wa gatta.

³⁴ Nama dek abe seba ayen mi pai ka m dek nisimaŋa dɛ a tom tuima a nya jaab meena ate mi ale m vaanchaama a jam a yaali la.

³⁵ Wari meena po, mi sak ni kama ayen, ku a fɛ kama ayen ti a maari niwoba abe ni a teeri, Nyɔnɔwa Yeezu wieŋa, wa weeni ayen, >>

³⁶ Pɔɔl ale ga biisi nueri la, wa yaa kpi duna tɛŋ a puusi ale ba meena.

³⁷ Ba meena yaa jam a kum ale gbaari wa.

³⁸ Dii ale potim jam kaasi ba sue la ale Pɔɔl ale weeni ba dii ayen ba kan ŋman nya wa diipo diipo la. Ba yaa bani wa a ta cheŋ ŋaaruŋku jigini ayen wa jueli cheŋ.