Kumsa 2 - WEN GBAŊKA

¹ Nya Nyɔnɔwa ale wa suipuurumu ale basi ate Jerusalem a jo chivie po diila! Wa pai Izirali ale ba zuaka meena a zaani ka Wenzuk a yuk basi tɛŋ, wa an teeri wa Yenni ale ka wa naŋsa tabika jigi la wari ya.

² Nyɔnɔwa a kaasi Jekob nuruma yeeŋa meena alege an sak jiirimmoa. Wa kaasi Juda jigi pagrisaŋa meena ale suipuurum. Wa yuk ba tɛŋka ale ka nalimaŋa a lɔnsi tɛŋ ate ba an nya zula.

³ Wa yeeri Izirali pagrimu meena ale suipuurum. Wa yeeri Izirali pagrimu diipo ate ba dachaasaŋa a jam la. Wa dɛ Jekob nuruma nna se bolim ŋiak ale dɛ jaabuuri meena ale gilim bu diila.

⁴ Ase dachiak la, wa gomsi kama ayen wa tɔŋ wa Penni, ale zak wa nisa ayen wa nye le ti. Ase dachiak la, Wa ko nuru naliŋsaŋa meena, ale kpiiri wa suipuurumu ase bolim la a basi Jerusalem yeeŋa zuk.

⁵ Nyɔnɔwa a jam a nye ase ka dachiak la, a kaasi Izirali. Wa kaasi nalimaŋa yeeŋa meena ale kaasi jigi pagrisaŋa meena. Wa basi ate Juda a kasim a fɔbili ale a kum nna yegayega.

⁶ Nyɔnɔwa kaasi wa Yenni pari pagrisaŋa nna chaalima ale kaasi tuka jigini mɛ. Naawen a basi kama ate Zayon a baŋ ba tiŋŋa ale ba Vuusum daaŋa wie. Wa zɛri naawa ale kaabteerɔwa ale suipuurum.

⁷ Nyɔnɔwa a zɛri wa kuŋkuŋku ale basi wa Yenni. Wa pai Jerusalem parisaŋa ale naamu yeeŋa a te dachaasaŋa. Ba nuemka Naawen Yenni po a nye ase ka tigi dai la.

⁸ Naawen yaa gomsi ayen wa kaasi parika ale gilim Zayon Liewa la. Wa magsi parika kama alege an basi ka kaasi ka. A basi ate niniga a yik parisaŋa ale ŋan kasintaŋa ate ba meena a lo tɛŋ.

⁹ Jerusalem nansuiŋtaŋa a lo ka tɛŋ. Wa kaasi nansuiŋtaŋa da kpientaŋa. Ka naawa le wa bisaŋa maa bo ka tɛŋ yonsa po. Ba basi Naawen wieŋa sakka, ate biisiteerɔma a kan ŋmaa nya wie Naawen jigi ya.

¹⁰ Zayon kpaŋŋa nisɔmma a kali ka tɛŋ nna diki. Ba vaari ka tanta basi ba zuima ayen ba sak ba sue ale kaasi la. Jerusalem nipok paalukku a pai ka ba zuima su tɛŋ ale suipuurum.

¹¹ Mi nina ŋman ka ninyiam ate m poi mɛ yɔk ate maa yuak. Ku a nye m jigi ase m ka nuru koruk la, dii nyiŋla ba kaasi m nuruma ka meena. Bisa ale buluata a cha tɛŋka suitaŋa niŋ.

¹² Ate ba a bek ba mama, <<Ŋandiintaŋa ale daamu bie?>> Ba kasim a cha kama ase tugurik tɔŋdɔba ale nya tuem tɛŋka suita niŋ la, a kpi ba mama nisa po.

¹³ M le biisi Jerusalem wie ayen ka boa? Jerusalem Liewa, m le pai ni magsi ka boa? M le weeni ayen ni a nye ase ka boan la? M le nye ka sɛ ate ni sue yɔgi, Zayon Liewa? Ni kaasuŋku a limisa ase ka nyakpiemu la. Waai an baga a tebi ni.

¹⁴ Ni biisiteerɔma a nya wie kama, alege ŋa ka venta wie a ka kiri ya. Ba an weeni ni wabaataŋa a sak ni ate ba kan baga a yik ni. Ba mooli ka venta wie a basi ate ni cheŋ bɛ.

¹⁵ Baai meena ale va suiku a taam la a nak nichaala, a nye Jerusalem Liewa a la ale a girinti ba zuima. Ba a bek ayen, <>

¹⁶ Ni dachaasaŋa meena a lak ka nɔi a biisi a kaasi ni. Ba nye ni a la ale a ŋɔbi nyina ale suipuurum. Ba a weeni ayen, Ba kaasi ni meena. Ti daam ale a limisi da diila ale nna. Ti nya ku nye ka kama.

¹⁷ Naawen a nye dii ate wa gomsi ayen wa nye la kama. Wa dii ate wa puulim dipo la wa ta di kama. Wa kaasi ni alege an sak jiirimmoa, ale basi ate ni dachaasaŋa a la ni. Wa te ni dachaasaŋa pagrim.

¹⁸ Nuruma kaari weeni Nyɔnɔwa, Zayon parika, basi ate fi ninyaataŋa a chali a siŋ ase beli nyiam la yok ale kantueŋ. Kan basi kumsa yaase fi ninyiamu gebiri.

¹⁹ Yiti ŋmai, a kum yokku, ale ku le diem a piilim sobika la. Lak fi suinummu a kpiiri ni puusaŋa ase nyiam la a te Nyɔnɔwa. Zak nisa a puusi a te wa ni bisaŋa nyuvooŋa nyiŋ. Kommu a viiri ba kama suitaŋa meena gugorutaŋa po.

²⁰ <

²¹ Nuruba, bisa ale ŋankpagsa a doa ka tɛŋ peelim. Ba ko nipok paalukku ale nidoa paalukku ale gebisa. Fi ko ba kama fi suipuurumu danni alege m bola sak jiirimmoa.

²² Fi wi ka dachaasa ayen ba nyini jigi meena a jam nye ale ti ase fi wi ba ayen ba jam ka tigi. Nuru waai an chali bɛ ya, yaase waai tali vua Naawen suipuurumu danni. Ti dachaasaŋa a ko baai ate ti nya ba ate ba pak la.