Galatia 1 - WEN GBAŊKA

¹ Mi Pɔɔl ka tuimtomdɔ a ŋmarisi gbaŋka de a te ni. Daa nuruba ale lueri mi ayen m chim tuimtomdɔ alege ka Yeezu Kirisita ale ti Kowa Wen dii ale nak wa kum po a yiti la ale maa chaab a lueri mu.

² Mi ale m Kirisita bisa sua tii meena ale bo dela la a maa chaab a puusi Kirisita bisaŋa ale a tu chaab tɔgatɔga a bo Galatia po la.

³ Ti Kowa Wen ale Yeezu Kirisita ti Nyɔnɔwa le ŋmante ni abe ba te ni suiyɔgni.

⁴ Yeezu Kirisita a jam va ka ti Kowa Wen yaalika a yaa kpi tama nyiŋ ayen wa vari ti tɛŋka biemu po a basi.

⁵ Ni basi ate ti a te Wen dii ale ta zula yegayega la taam wuu, pimpauk dila nyiŋ. Ku be nye dila.

⁶ Ni basi ate ku cha mu ka nna yegayega dii nyiŋla, ku an bola beniya alege ate ni zɛri Wen ya, waai ale va Kirisita ŋmanteka nyiŋ a wi ni ayen ni jam va wa la. Ni nye dila kama alege yaa deri tagri ni popolaŋa a yaa ŋman va sinsaga ŋa chaab.

⁷ Nuruba ba gela tagri Wen wamaŋsaŋa ŋaai ale a biisi Kirisita wie la kama ale ge a kasim a daani ni. Ni basi ate m sum weeni a sak ni ayen Wen sinsaŋŋa ka bunyi nyiini, wamaŋsaŋa de chaab a ŋman ka jigiya.

⁸ Ku daam dan poom ka Wen maarɔma ale nyini wenŋmazuk a siŋ, yaase tama dek daam dan poom jam sak ni tuntomiŋ kaai ale kan a nye ase Wen wamaŋsaŋa ate tama a liŋ jam sak ni la, waai a dan nye dila, Wen le waali kula nyɔnɔwa kama.

⁹ M poom liŋ weeni ni nya kude kama. Yɔgyɔgla de m le weeni ni ayen waai a dan sak ni wie ŋaai ale kan a nye ase Wen wamaŋsaŋa ate nama a jam wom ale siak ayen ka wensie la, Wen le waali kula nyɔnɔwa kama.

¹⁰ Nama a poli ayen mi a yaali ayen m nye ate ka nuruba te mu pimpaukwa? Aaya, mi a yaali ayen m peenti ka Wen nyiini sui. M daam dan a yaali ayen m peenti ka nuruba sue, m te kan baga chim Kirisita tomteerɔ.

¹¹ M suata, mi a yaali ayen m weeni sak ni kama ayen Naawen wamaŋsaŋa ate m liŋ jam sak ni la, ŋa an nyini daa nurubiik jigi ya.

¹² M be an tuesi ŋa daa nuru jigi ya, ka Kirisita dek ale jam a pai ŋa a sak mu.

¹³ Nama dek seba ayen diipo, ate mi jam va Juuma suiku la, m jam te Yeezu ŋaaŋviirɔma waalika ka nna yegayega. M jam ka jiirim ale ba. M jam a yaali kama ayen m kaasi ba meena.

¹⁴ Mi jam va Juuma suiku nalimnyiini kama a poom gaam m vaanchaama. Mi nina jam muni ka nna yegayega me ayen m va ti kokpieŋsaŋa suiku.

¹⁵ Alege Wen jam va ka ŋmanteka nyiŋ lueri mi ayen m chim wa tomteerɔ. Wa lueri mi kama ale ba an diem poom biak mu. Diipo ate wa sui yaa jam peenti la,

¹⁶ wa yaa basi ayen m seba wa biika Yeezu, ate mi a sak baai ale kan daa Juuba la wa wamaŋsaŋa. Mi an jam bek daa waai ya ayen kula nyɔnɔwa sak mu m le m nye diila,

¹⁷ m be an jam cheŋ Jerusalem tɛŋka mɛ ayen m ga baai ale liŋ chim tuimtomdɔba ale ge mi la jigi ya. Alege mi deri jam cheŋ ka Arabia tɛŋka alege yaa pilim ŋmani Damasikus tɛŋka.

¹⁸ Bena ŋata ale taam la, ate m yaa jam cheŋ Jerusalem ayen m nya Sifas. M jam goa ale wa ka da pi ale ŋanu.

¹⁹ Mi an jam nya tuimtomdɔma waai ya, ku jam ka Jeemsi nyiini ate m nya. Jeemsi ale Yeezu ti Naawenni jam ka suata.

²⁰ Wie ŋaai meena ate mi ŋmarisi nyo gbaŋka de po la, ka wensie. Wen seba m kan velim.

²¹ Mi ale jam basi Jerusalem la, m jam nyiem gilim Siriya ale Silisiya tɛŋsaŋa ka meena.

²² Dila powa, Judia Kirisita bisaŋa ale a tu chaab la a diem jam zɛ mi.

²³ Ba jam wom ka mi wie nyiini. Ba jam weeni kama ayen, ka mi ale jam a te ba waalika la alege, mi dek yɔgyɔgla ale la a yaa ŋman a sak nuruba ayen ba ta siaka ale Kirisita. Sinsaŋŋa de abe le mi jam piilim a nye ayen m kaasi ŋa la.

²⁴ Ba ale jam wom dila la, ba yaa jam a te Wen pimpauk mi nyiŋ.