Sagrɔ 10 - WEN GBAŊKA

¹ Ase nanjuŋ kpiita ale basi ate kpaam a nyuŋ diila, ku ka dila ate berinni magadega a kaasi yam ale zula.

² Yam nyɔnɔ a ta ka wensie alege beruk suinum a nye ka wakaasima.

³ Ase beruk a dan bo suik po, wa diem a silim ka yam ale a sak waai meena ayen wa ka beruk.

⁴ Ase kpagi sui a dan puuri ale fu kan basi fi tuimaŋa, fi dan nye diki wanni a kpi kama.

⁵ Wari di choa ale kasim nye a kaasi tɛŋzuk de, di ka nye kaai ate niŋdeerɔba a nye a kaasi la.

⁶ Ba pai betta a basi boka dek jigi ale basi ate yam nyam a bo juijui ale kan magsi ba boro la.

⁷ Mi nya yɔm kama ale ba do wusuma alege ate nabisa a cheŋ naŋta ase yɔm la.

⁸ Nuru waai ale a tu goluk la ale lo ku po, waai mɛ ale wɛ parik a jo la, waab ale dom wa.

⁹ Waai ale a mobi tana la dai dii dai ŋa le kɔni wa, waai mɛ ale a mobi daata la ti baga a kɔni wa kama.

¹⁰ Ase liak a dan gbiri ate ka nɔnni an saasi ya, pagrim yega ale a nyini alege yam a basi ate tuini a chim ka moali.

¹¹ Ase waab a dan dom baliŋdɔ alege ate wa baliŋ bu, baliŋdɔwa a ka kiri ya.

¹² Wie yam nyɔnɔ nɔi po a ta ka ŋmanteka nna yega alege beruk dek nɔi po wie ale a dɛ wa.

¹³ Piilimka wa wieŋa ka berinni, kpeglimka ŋa ka gaasa ale yesiŋsa nyeka.

¹⁴ Wa kasim biisi ka wie a gum du. Waai zɛ dii ale cheen la, ka wana ale wa weeni wa dii ale di nye wa dila ŋaaŋnyiŋ la?

¹⁵ Beruk tuima a nye ate wa a jiak kama wa zɛ suik a cheŋ tɛŋka po.

¹⁶ Ku ka kikaasa a te nama baai naab ale jam ka tomteerɔ la ale baai nabisa ale a dɛ saluik meena la.

¹⁷ Suipeentik a bo fi jigi tɛŋaa, tɛŋ kaai naab ate ba biak wa a nyini dɔkdem maŋsa po la, baai nabisa ale a dɛ diipo ale magsi la ayen ba ta nyiŋ pagra ale ge daa daam bukka la.

¹⁸ Nuru a dan ta nyiŋworuk wa yenni ate wa pili la ale piilim latika. Wa dan kan pili di yenni a yuli kama.

¹⁹ Tigi a ta ka laata a jam ate daam a basi ate suipeentik a boro alege ka ligri ale a nye wari meena.

²⁰ Kan nye naab a la fi popolaŋa po yaase fi ka te jigsirɔ fi goom dɔk po, dii nyiŋla dai dii dai nuim ale bo vioku po a wom fi wieŋa, nuimmu ale ta fi le weeni diila a ga biisi sak.