Aroom 5 - WEN GBAŊKA

¹ Dila nyiŋla, ku ka ti siaka nyiŋ ale soa ate Wen baga nye ate ti chim wayɔrisima nyam. Dila abe le soa ate tama va Yeezu Kirisita ti Nyɔnɔwa nyiŋ ate tama ale Wen a yaa ta suiyɔgni ale chaab.

² Ti siaka ale Yeezu Kirisita nyiŋ mɛ abe le soa ate ti baga a nya Wen niaka nyeka ate wa ta ale ti la. Wa te ti ka yiila ale ŋmanteka ayen dai yeŋ po Wen ale tama le jam maa chaab a ta Wen zulaŋa.

³ Daa ti ale maa chaab ale wa a ta wa zulaŋa la ale basi ate ti sue peenti, alege nuruba dan poom basi ate ti a nam, ti sue le peenti kama. Dii nyiŋla, tama seba ayen ninammu de a basi kama ate ti a ta chichiiba ninammu po.

⁴ Ti suiduŋmaŋa a basi kama ate ti a chim wensie nyam. Nya kude abe a te ti ka yiila ŋaai ate m poom weeni la. Yiilaŋa de abe daa kinla nyiŋŋa.

⁵ Wen pai wa Chiika nyo ka ti suiniima po nalimnyiini. Chiika abe ale Wen tiirim ate wa pai te tama. Wa be va ka Chiika de nyiŋ a pai wa yaalika a sueri ti suiniimaŋa. Dila ale soa ate yiila ŋaai ate ti ta la daa kinla nyiŋŋa.

⁶ Di po ti an jam ta pagrim a maari ti dega. Alege ka da dii dai ate Wen lueri la ate Kirisita yaa zaani tama tuimbaata nyama naŋkula po a kpi te ti.

⁷ Nuru dan chim nuru maŋ, da dii dai nuru wa choa a baga a siak kama ayen wa zaani wa naŋkula po a kpi te kula nyɔnɔwa. Alege ku pagra kama ate nuru nye dila.

⁸ Alege tama baai mɛ ale ka wabaata nyam la, Kirisita zaani ka tama naŋkula po a kpi te ti. Nya kude abe a sak ka Wen ale ta yaalika nalimnyiini ale ti diila.

⁹ Wa kummu nyiŋ abe ale soa ate Wen baga a nye ate ti a chim wayɔrisima nyam. Ase Wen dan baga a nye ate tama a chim wayɔrisima nyam Yeezu kummu nyiŋ, be ka boa le ku kasi ate wa kan vari ti waali kaai ate wa le te ti la po a basi Yeezu nyiŋŋa?

¹⁰ Ti jam ka Wen dachaasa, alege yɔgyɔgla de, wa va ka wa nidoabinni kummu nyiŋ a nye ate ti ŋman chim wa doaba. Wa nidoabinni abe dan baga a nye nya kude, ka boa le ku kasi ate yɔgyɔgla de wa ale vua la wa an baga a te varibasika?

¹¹ Daa ku meena abe ale dila. Wa dii ale ŋman gum du la ale, Wen basi kama ate ti sue peenti nna yegayega ale wa ale va Yeezu Kirisita ti Nyɔnɔwa nyiŋ a nye dii a te ti la. Yɔgyɔgla de be ka Yeezu Kirisita ale nye ate tama chim Wen doaba.

¹² Nuru ale jam bo tɛŋzuk de dipo. Wa yuei jam ale Adam. Biem va ka nuruwa de jigi a jam tɛŋzuk de meena. Biemu de abe ale soa ate kum jam nurubiik meena jigi. Dila be ale soa ate baai meena ale va wa ŋaaŋ la a kpi. Boan nyiŋŋa, ti meena tom ka biem.

¹³ Biem liŋ jam boro kama ale ge ku ŋaaŋnyiŋ ate Wen yaa pai wa Sinsaŋŋa a te ba. Wa sinsaŋŋa ale kan diem jam boro diipo la, wa an jam a chiini wabaata.

¹⁴ Alege a ta nyini diipo ate Adam boro la, a ta jam paari diipo ate Wen jam pai wa sinsaŋŋa a te Moosis la, nuruba jam a kpi kama. Baai mɛ ale jam poom kan zɛri Wen nɔi ase Adam ale nye diila, ba mɛ jam a kpi kama. Alege Wen jam poli kama ayen Adam nyeka a sak ti wari a magsi chaab ale waai ale wa jam la.

¹⁵ Wen tiirimu ale Adam ale zɛri wa nɔi diila a daa bunyi. Ase sɛ la? Nuru yeŋ ale zɛri Wen nɔi la nyiŋ ale soa ate nuru boari kpi. Alege Wen ŋmanteka a gaam ka nna yegayega. Wa tiirim buui ate wa pai te nuru boari la, wa va ka nuru yeŋka Yeezu Kirisita ŋmanteka nyiŋ a te wa tiirimu nuru boanni.

¹⁶ Adam ale jam tom biemu la, ka boan ale nye ya? Be ka boan jaab ale nye ase Wen ale va wa niaka nyiŋ a te ti wa tiirimu la? Be nya, Adam zɛri Wen nɔi kama ate Wen a bo ba buusa. Wen be ale va wa nyemagsika nyiŋ a te ti wa tiirimu la, wa yaa weeni ayen nurubiik yaa a chim wayɔrisima nyɔnɔ Yeezu nyiŋ.

¹⁷ Nuru yeŋka ale zɛri Wen la nyiŋ ale soa ate kum a jam. Alege nuru yeŋka Yeezu Kirisita ale nye dii a te nurubiik la a zuak gaam taam kama. Baai meena abe ale a tuesi wa ŋmanteka yegayega ale wa ale nye ate nuruba a chim wayɔrisima nyam la, ka wa tiirim ale la ate wa pai te ba. Bala abe le va ka Yeezu Kirisita nyiŋ a ta nyuvuri. Ba le chim ka nalima mɛ.

¹⁸ Suik kula po, nuru yeŋka ale zɛri Wen nɔi ate dila basi ate Wen a bo ba buusa, suik kula po dekdega ate nuru yeŋ waai ale siak a te Wen nɔnni la a basi ate waai meena a baga a chim wayɔrisima nyam a nya nyemagsika ale nyuvuri dii ale kan ta kpeglimka la.

¹⁹ Nuru yeŋ ale jam zɛri Wen nɔi vaka la, dila basi kama ate nuru boari chim tuimbaata nyam wala nyiŋ. Nuru yeŋ mɛ ale jam va Wen nɔi la dila basi kama ate Wen nye ate nuru boari chim wayɔrisima nyam.

²⁰ Wen te wa sinsaŋŋa Juuma kama ayen ba seba ayen ba ale kasim jam a nye wie ŋaai la ba a zɛri ka wa nɔi. Alege nurubiik biemu ale ŋmasi chim a gum du la, Wen ŋmanteka mɛ a ŋmasi chim a gum du kama.

²¹ Dila nyiŋla, biem ale va ka kum nyiŋ a soa nurubiik la, Wen ŋmanteka mɛ a va ka wayɔrisima nyiŋ a soa nurubiik dii nyiŋla, ka wa niaka nyiŋ ale soa ate ti chim wayɔrisima nyam. Dila abe basi kama ate ti yaa va Yeezu Kirisita ti Naawenni nyiŋ a nya nyuvuri dii ale kan ta kpeglimka la.