Aroom 12 - WEN GBAŊKA

¹ Dila nyiŋla, m suata, Wen ale ta jiirim ale ti la nyiŋ ate mi a saalim ni ayen, ni pai nidek meena ni ale diem vua la nye kaabka ase ni kpi kama la a te Wen. Ni vummu a yaa bo ka Wen nisima po ayen ni a tom tuima ale ni popo meena a te wa. Kaabka de a te Wen ka suipeentik. Wensie zulaŋa de choawa ate ku a fɛ ayen ni a te wa la.

² Ni kan basi ate tɛŋzuk de wieŋa fɛ ni ate ni va ŋa ale a weeni diila. Ni basi ate Wen te ni popola paala ate ni tagri nalimnyiini. Dila dan nye, ni le baga a seba Wen ale a yaali diila. Wadek yaalika de ka yaali kaai ale nala a te wa suipeentik la. Ka ka yaali kaai mɛ ale magsi nalimnyiini la.

³ Wen ale te mi tiirim buui la nyiŋ ale soa ate mi a weeni ni meena ayen ni kan nya nidek ase nama gaam ni ale ka diila. Alege ku a fɛ kama ayen ni a poli ale yam abe ni wanyi wanyi a bo nidek buusa a magsi chaab ale Wen ale te ni siaka ate ka soa diila.

⁴ Nurubiik nyiŋ ta ka kabta tɔgatɔga nna yegayega. Kabtaŋa meena kunyikunyi a tom ka tuima tɔgatɔga.

⁵ Suik kula po, tama mɛ piisi kama alege ti meena a nye ase ka nyiŋ yeŋ ale Kirisita la. Ti ka wanyi wanyi alege ti meena soa ka chaab.

⁶ Dila nyiŋla, tama abe pai ti tiirita tɔgatɔgaka ate Wen va wa nyemagsika nyiŋ a te ti la a tom tuima. Ti tiirimu dan ka ti chim Wen biisiteerɔba a weeni wa tuntomika, ti a weeni a magsi chaab ale ti siaka ale soa diila.

⁷ Be dan ka ti chim tomteerɔba, ti tom a te. Be dan ka ti chim sagrɔba, ti a sak.

⁸ Be dan ka ti a te nuruba nyiŋbiiri ba tuima po ale ba nyeboka po, ti a nye dila, be dan ka wa te wa vaanchoa jaab, ku a fɛ kama ate wa nye dila ale wa suinum meena, be dan ka wa chim niŋdeerɔ, ku a fɛ kama ayen wa a tom wa tuimaŋa nalimnyiini, be dan ka wa ta jiirim ale nuruba, wa a nye dila ale suipeentik.

⁹ Ku a fɛ kama ate ni ta wensie yaalika ale nuruba. Kisi wa dii ale kan daa wamaŋ la, abe ni ŋmasi yik wa dii ale ka wamaŋ la.

¹⁰ Ni ta yaalika ale chaab, yaali kaai choa ale magsi ayen Kirisita suata ta ale chaab la, abe ni kan a limisi ayen ni vaanchoa a liŋ te ni zula, ni dɛ niŋ a te wa zula.

¹¹ Ni kan ta nyiŋworuk ale Naawen vaka. Tom a te wa ale ninmuna nalimnyiini.

¹² Yiila ŋaai ate ni ta la, ni basi ate ŋa kasim a te ni suipeentik. Nyenyaka dan jam ni jigi ni ta chichiiba. Ni kasim a puusi Wen daa meena.

¹³ Ni suataŋa Kirisita bisaŋa wanyi a dan a yaali jaab ate nama ta, ni maari wa. Nuru waai a dan nyiem jam ni yeeŋa, ni tuesi wa nalimnyiini.

¹⁴ Ni be niak baai ale a namsi ni la, ni ale ka Kirisita bisa la nyiŋ. Ni kan ka te ba.

¹⁵ Baai sue dan peenti ni basi ate nama mɛ sue peenti ale ba. Baai mɛ sue ale kaasi la ni basi ate nama mɛ sue kaasi ale ba.

¹⁶ Ni ta nɔiyeŋ ale chaab wie meena po. Ni kan ta kanjanta ale nuruba. Ni siak ate ni pai nidek a gum chaab ale nuru baai ate nuruba a poli ayen ba daa nuruba la. Ni kan poli a te nidek ayen nama ka yanta nyama.

¹⁷ Nuru dan nye ni kaasi, nama mɛ kan pai kaasuŋ a tuni wa. Alege ni pii nyiŋ ate ni a tom wie ŋaai nyiini ate nuruba seba ayen ŋa ka wamaŋsa la.

¹⁸ Ni be pii nyiŋ meena ate ni boro ale masim ale waai meena.

¹⁹ M dek doaba, ni kan weeni nidek ayen, nuruwa de ale nye ate tama a nam dii nna la tama mɛ le nye wari a tuni wa. Ni pai ku meena basi ate Wen pai wa suipuurumu nye wari tuni kula nyɔnɔwa, ase Wen ale weeni dii wa gbaŋka po ayen, <> (Teerika 32:35)

²⁰ Kɔm a dan ta fi dachiak te wa ŋandiinta, nyanyuila a dan ta wa, te wa nyiam. Dii nyiŋla, fi dan nye nyaŋa de a te wa, fi pai ka bolim kaala a vi wa zuk. (Wamagsima 25:21, 22)

²¹ Ni kan basi ate wabaata nya suik a nak ni yiagi, ni basi ate wamaŋsa nak wabaata yiak basi.