1 Timoti 2 - WEN GBAŊKA

¹ Yɔgyɔgla de mi a yaali kama ayen ni a nye Wen jiam abe ni a saalim wa a puusi a te waai meena

² ale nalima ale baai meena ale a nya ti zuk la. Puusi Wen ayen wa maari ba ate ti meena a boro ale suiyɔgni abe ti a va Wen nalimnyiini abe ti a zuli wa.

³ Ti dan nye nna meena ku a peenti Wen ti Varibasidɔwa sui kama.

⁴ Wa a yaali ayen ka waai meena ate nya varibasika ba tuimbaata po ate ba jam va wa a seba wa wensieŋa.

⁵ Dii nyiŋla Wen ka dinyi. Ka sanyigmoa yeŋ mɛ ale bo Wen ale nurubiik suŋsuŋ. Nuru wala abe ale Yeezu Kirisita.

⁶ Wa zaani ka nuruba meena naŋkula po a kpi a te ba ayen wa vari ba ba tuimbaata meena po a basi. Da dii danni ate Wen le weeni varibasika de wie a sak nuruba la a paari kama ate wa yaa weeni a sak ba.

⁷ Dila ale soa ate wa lueri mi ayen m chim wa tuimtomdɔ a ga sak nuru baai ale kan daa Juuba la. Ayen m ga a sak ba ate ba ta siaka ale wa abe ba seba wa wensieŋa. Wie ŋaai ate mi a biisi la ka wensie. Mi daa velimvendika.

⁸ Dila nyiŋ ate mi a yaali ayen jigi meena nidoama ale va Wen nalimnyiini la, a zak nisim weleŋsa wen a puusi abe ba kan ta suipuurum ale nanpaga nakka ale chaaba.

⁹ Mi a yaali mɛ ayen nipooma a kan a jo gatta ase nidoa yaalisa la, alege ba a jo ba gattaŋa ale yam. Ba kan pai ligra yegayega a da ŋanta a bobi ba zuk zuisaŋa, abe ba kan a su ni felima ŋaai diak ale pagra la, abe ba kan a jo garuk tii diak ale pagra la.

¹⁰ Alege ku nala kama ate ba basi ate tuimaŋsa a tagri ba nalimu yaalika kɔlimaŋa. Dii nyiŋla, ba a va ka Wen.

¹¹ Ku a fɛ kama ate nipooba a seba badek yikka nalimnyiini abe ba nye nna chim a wom sinsaŋŋa.

¹² Mi kan siak ayen nipooba a sak nidoaba yaase, ba ta pagrim nidoaba zuwa. Ba a nye chim.

¹³ Dii nyiŋla Wen a liŋ nye ka Adam alege ku ŋaaŋnyiŋ a nye Iiv.

¹⁴ Sitaana an jam paasi Adam, ka nipowa ate wa jam paasi ate wa kaasi Wen sinsaŋŋa.

¹⁵ Alege nipok a dan boro a biak bisa, Wen a nya wa zuk kama ase wa nin kasim ta siaka ale wa ale ta yaalika ale suinum weleŋ ale seba nyemagsika.