WHẸ̀DATỌ 1 - BIBLU WIWE LỌ 1923

¹ E sọ wá jọ to okú Jọsua tọn godo, wẹ ovi Islaeli tọn lẹ kanbiọ sọn OKLUNỌ si, dọmọ, Mẹnu whẹwhẹ wẹ na yì aga na mí do Kananinu lẹ ji, nado hòavùn hẹ yé?

² OKLUNỌ sọ domo, Juda na yì aga: day e go, yen ko jó aigba lọ do alọ etọn mẹ.

³ Juda sọ dọ hlan Simeọni nọvisunnu etọn dọ, Wá aga hẹ mi biọ mimá ṣie mẹ, na mí nido hoavùn hẹ kananinu lẹ; yẹn domọga na yì aga hẹ we biọ mimá towe mẹ. Mọwẹ Simeọni yì hẹ ẹ.

⁴ Juda sọ yì aga; OKLUNỌ sọ jó Kananinu lẹ po Pelizinu lẹ po do alọ yetọn mẹ: Yé sọ hò sọn yé mẹ to Bezeki mẹ sunnu fọtọ̀n ao.

⁵ Yé sọ din Adoni-bezeki mọ to Bezeki mẹ: yè sọ hòavùn hẹ ẹ, yé sọ hò Kananinu lẹ po Pelizinu lẹ po,

⁶ Ṣigba Adoni-bezeki họ̀nyì; yé sọ yànmọna ẹn, bo wle e, bo sán alọsú etọn lẹ po afọsú etọn lẹ po sẹ̀.

⁷ Adoni-bezeki sọ dọmọ, Ahọlu kandegbàn, yè sán alọsú yetọn lẹ po afosú yetọn lẹ po sẹ̀ na, to núdùdù yetọn ṣinyan to tafo ṣie glọ, le yẹn ko wà do, mọwẹ-Jiwheyẹwhe ko sùahọ mì do. Ye hẹn ẹn wá Jelusalẹm, é sọ kú to fine.

⁸ Ovi Juda tọn lẹ sọ hòavùn hẹ Jelusalẹm, bo yí i, bo yí onù ohi tọn do hò e, bo sọ sí miyọn tòdaho lọ.

⁹ To godomẹ ovi Juda tọn lẹ sọ yì odò nado hòavùn hẹ Kananinu lẹ he nọnọ̀ otò okọta tọn mẹ, podọ to hùwaji, podọ to dòdòklidò mẹ.

¹⁰ Juda sọ yì péhẹ Kananinu lẹ he nọnọ̀ Heblọni: (dinvie oyín Heblọni tọn daidai we Kìliati-alba:) yé sọ hò Ẹesai, po Ahimani po, po Talmai po.

¹¹ Sọn finẹ é yì pehẹ tòmẹnu Debili tọn. (Dinvie oyín Debili tọn daidai wẹ Kiliatì-sefeli.)

¹² Kalẹbi sọ dọmọ, Ewọ he hò Kiliati-sefeli, bo yí i, hlan ewọ wẹ yẹn na na Aksahi viyọnnu ṣie hlan asi.

¹³ Otnieli visunnu Kenazi tọn, nọvisunnu pẹvi Kalẹbi tọn, yí i: ewọ sọ na ẹn Aksahi viyọnnu etọn hlan asi.

¹⁴ E sọ wá jọ, whenuena é wá e de, wẹ é hẹn ẹn nado biọ sọn otọ̀ etọn si danji de: é sọ jẹte sọn kẹteketẹ etọn ji; Kalẹbi sọ dọ hlan ẹn dọ, Etẹ wẹ hiẹ to jijlo?

¹⁵ Ewọ sọ dọ hlan ẹn dọmọ, Na dona de mi; na dọ hiẹ ko yí mi do aigba hùwaji tọn ji, na asisa osìn tọn mi ga, Kalẹbi sọ na ẹn sìnsisa agadọ̀n po sìnsisa odòdọn tọn lẹ po.

¹⁶ Ovi Keninu tọn lẹ, nọvisunnu yọ̀nwhẹ́n Moṣe tọn, yì aga tòn sọn tòdaho détin lẹ tọn mẹ po ovi Juda tọn lẹ po biọ zùngbo Juda tọn mẹ, he tin hùwaji Aladi tọn; yé sọ yì bo ninọ̀ hẹ gbẹtọ ewlẹ.

¹⁷ Juda sọ yì po Simeọni nọvisunnu etọn po, yé sọ hò Kananinu lẹ hè nọnọ̀ Zefati, bó và ẹ gbidigbidi. Họlmahi wẹ yè nọ ylọ oyín tòdaho lo tọn.

¹⁸ Juda ga sọ yí Gaza po dogboji etọn po, Aṣikelọni po dògboji etọn po, Eklọni po dogboji etọn po.

¹⁹ OKLUNỌ sọ tin po Juda po; ewọ sọ yàn tòmẹnu otò okọta tọn lẹ; na ewọ ma sọgan yàn tòmẹnu agbàdomẹ tọn lẹ jẹgbonu gba, na yé tindo kẹkẹ gànyũ tọn lẹ wutu.

²⁰ Yé sọ na Heblọni hlan Kalẹbi, dile Moṣe dọ do: ewọ sọ yàn visunnu atọ̀n Anaki tọn lẹ jẹgbonu sọn finẹ

²¹ Ovi Bẹnjamini tọn lẹ ma yàn Jebusinu he nọnọ̀ Jelusalẹm jẹgbonu gba: ṣigba Jebusinu lẹ nọnọ̀ hẹ ovi Bẹnjamini tọn lẹ to Jelusalẹm, jẹ azán he gbè.

²² Owhé Josẹfu tọn, yé yì aga yì péhé Bẹti-eli: OKLUNỌ sọ tin po yé po.

²³ Owhé Josẹfu tọn sọ do omẹ hlan nado bẹpòn Bẹti-eli (Dinvie oyín tòdaho lọ tọn daidai wẹ Luzi.)

²⁴ Amé ewlẹ sọ mọ dawe de tọ́n sọn tòdaho lọ mẹ jẹgbonu, yé sọ dọ hlan ẹn dọ, Dohia mí, mí vẹ̀ we, aliho he biọ tòdaho lọ mẹ, mìwlẹ na sọ yí homẹdagbe do zán hẹ we.

²⁵ Ewọ sọ do aliho he biọ todaho lọ mẹ hia, yé sọ yí onù ohi tọn do hò tòdaho lọ; ṣigba yé gbọ dawe lọ ni yì po whédo etọn lẹpo po.

²⁶ Dawe lọ sọ yì aigba Hitinu lẹ tọn ji bo do tòdaho de ai, bo ylọ oyín etọn dọ Luzi: ehe yín oyín etọn jẹ azán he gbè.

²⁷ Manassẹ ma sọ yàn tòmẹnu Bẹtisiani tọn lẹ po otò etọn lẹ po jẹgbonu gba, kavi Taanaki tọn po otò etọn lẹ po, kavi tomẹnu Dọli tọn lẹ po otò étọn lẹ po, kavi tòmẹnu Ibleami tọn lẹ po otò etọn lẹpo, kavi tomẹnu Megido tọn lẹ po otò etọn lẹ pò; ṣigba Kananinu lẹ jlo na nọnọ̀ aigba nẹ ji.

²⁸ E sọ wá jọ, whenuena yè hẹn Islaeli zùn huhlọnnọ, wẹ yé yí Kananinu lẹ do sẹnjọzọ̀n kọ̀n, bo ma yàn yé jẹgbonu patapata gba.

²⁹ Eflaimi ma sọ yàn Kananinu he nọnọ̀ Gezeli mẹ lẹ jẹgbonu gba; ṣigba Kananinu lẹ tin to Gezeli to yé ṣẹnṣẹn.

³⁰ Zebuluni ma sọ yàn tòmẹnu Kitlọni tọn lẹ jẹgbonu gba, kavi tòmẹnu Nahọloli tọn lẹ; ṣigba Kananinu lẹ nọnọ̀ yé ṣẹnṣẹn, bo sọ lẹzùn sènjọtọ.

³¹ Aṣeli ma sọ yàn tòmẹnu Akko tọn lẹ jẹgbonu gba, kavi tòmẹnu Zidọni tọn lẹ, kavi Ahlabi tọn, kavi Akzibi tọn kavi Hẹlbahi tọn, kavi Afiki tọn, kavi Lehobi tọn:

³² ṣigba Aselinu lẹ nọnọ̀ Kananinu lẹ ṣẹnṣẹn, tòmẹnu aigba lọ tọn lẹ: na yé ma yàn yé jẹgbonu gba.

³³ Naftali ma yàn tòmẹnu Bẹti-semẹsi tọn lẹ jẹgbonu, kavi tòmẹnu Bẹti-anati tọn lẹ, ṣigba ewọ nọnọ̀ Kananinu lẹ ṣẹnṣẹn, tòmẹnu aigba lọ itọtí lẹ: ṣigba tòmẹnu Bẹti-semẹsi tọn lẹ po, Bẹti-anati tọn po lẹzùn sẹ̀n jọtọ hlan yé.

³⁴ Amọlinu lẹ yi huhlọn doglọn ovi Dani tọn lẹ do otò okọta mẹ; na yé ma na dikena yé nado jẹte wá agbàdomẹ gba:

³⁵ ṣigba Amọlinu lẹ jlo na nọnọ̀ osé Helẹsi mẹ, to Aijalọni mẹ, podọ to Ẹaalbimì mẹ: gãnṣo alọ owhé Josefu tọn tọn gbawhàn, bọ ye do lẹzùn sẹnjọtọ.

³⁶ Dògboji Amọlinu lẹ tọn wẹ sọn agayìyl Aklabbimi tọn, sọn osé lọ kọ̀n, podọ hlanga.