Zaake 4 - Buamu Laa

Hɔ̀ kankán dímíɲɛ́ bòo wɛnírɔ́

¹ Ɛ́ hɔ́pe kankán hĩɛ̀ tánlɔ́ sí àá hɔ́pe kankán fuò sí ɛ́ wi mi tĩ́ihṹ ɛ́ lé àá yí? Hɔ̀ wóò lé àá mí nìnbí-yáamu bòo lɛ ɛ́ hɔ wɛ viì, hɔ̀pe lɛ ɛ́ zɔn wi mi tĩɛ̀ hũn ɛ́ fĩ.

² Mì yìe ɛ́ wóò lé hɔ́ bòo dɔ̀ ǹ kɛ́ mí den yí dɛ̀ hɔ̀ yá yí wɛ̀; ɛ́ mí den wóò khíi wé ɓɛ́ nìɓériè. Ɛ̀ mì tĩ̀ɛ ɛ́ wóò vɛ́ hɔ́ bòo dɔ̀ ǹ kɛ́ mí den yí dɛ̀ hɔ̀ ɛ́ yá yí wɛ̀; ɛ́ mí den wóo khíi wé hɔ́ hĩɛ̀ tánlɔ́ àá hɔ́ fuò ɛ̀ dìń lɔ̀n. Mí yí dàa hɔ bòo lɛ ɛ́ mí ɛ́ cɛ̀ iè hɔ̀ lɛ ɛ́ yáà hɛ̃un hɔ̀ Dɔfĩn viì wɛ̀.

³ Ɛ̀ mì ɓen hɛ̃nnɛ hɔ̀ Dɔfĩn viì ɛ̀ mì yáà yí hɔ́ iè hɔ̀ lɛ ɛ́ mí yáà hɛ̃un hɔ̀ àá mí híɛhɔ́ wɛ̀. Mí den wóò hɛ̃un hɔ̀ ɛ́ mii khíi yaakɛ mi kùrú tũmù bòo wénlɔ́ hũn.

⁴ Hɛ̃fériè àá ɓɛ́ bɛ́fériè lɛ! Mí yí dũ kɛ́ nìnbírɔ ɛ́ ɓen wɔ́ dímíɲɛ́ bòo a wɛ ɛ̀ ɓàasɔ iè Dɔfĩn ɓà ńbíyanle? Ɛ́ nìnbírɔ lɛ ɛ́ cɛ̀ nɛ mí wé lé dímíɲɛ́ ɓà biɛ̀ ɛ́ míte ɛ̀ wé àá Dɔfĩn ɓà ńbíyanle.

⁵ Mì bí lieníkɛ ɛ̀ mì bie nɛ hɔ bòo lɛ ɛ́ wɛ̃́ lé Dɔfĩn bienù vɛ̃hṹ hũn ɛ́ iè khã́amáa wɛ̀. Hɔ̀ den wɛ̃́ yán ɛ́ nɛ làa: «Dɔfĩn ɛ́ mí Mɛkɛ̃ni lɛ ɛ́ Hɔ́ dɔ́ kiè ǹ bòo ɛ̀ dìe pɛ̀ pɛ̀.»

⁶ Kɛ́ Dɔfĩn hiì lɛ ɛ́ Hɔ́ ɛ́ wɔ́ àá kie ɛ́ den pɔ bòo míkùi iè hɔ̀ lɛ ɛ́ hɔ́ bĩniɛ wɛ̃́ lépe Dɔfĩn bienù vɛ̃hṹ hũn ɛ́ nɛ làa: «Dɔfĩn ɛ́ yí tɛ̀ ɓɛ̀ nìnbirìe lɛ ɛ́ wóò ɓàaní ɓɛ́te ǹ bòo, Kɛ́ Hɔ́ wóò wé mí hiì àá ɓɛ́lɛ ɛ́ wóò síɛní ɓɛ́ te ǹ.»

⁷ Ɛ́ mí síɛní míte ǹ Dɔfĩn híɛhɔ́ ɛ̀ ɲí pehɔ̀ bòo, ɛ̀ mì pĩ́ dìń ɛ̀ bí tɛ̀ à Sitũanɛ bòo, á ɛ́ zè vĩ́ à ɛ́ kɛ́ miɛ.

⁸ Ɛ́ mí khɛ̃̀ún vɛ lúwiní Dɔfĩn ɛ́ Hɔ́ ɓiɛ̀ ɛ́ khɛ̃̀ún ɛ́ ɓen lúwiní miɛ ǹ. Mì tiɛ mite, mìpe bɔ̀konwériè. Mì tiɛ mi tĩɛ̀, mípe lɛ iè nìɛ lɛ tĩɛ̀ sankɛa.

⁹ Ɛ́ mí dũń kɛ́ mí miinɛ̀ wi, ɛ́ mí wo wírí kɛ́ mí ɛ́ lè yúrú yèrè ɛ̀ tɛ̀. Mí lɛ́ nɛ mí kũuni ɛ̀ khũ̀á wé wíɛ ɛ̀ mì tĩwiɛ̀ ɛ̀ khũ̀á wé tĩ-yaarè.

¹⁰ Mì wóo síɛní míte à Ɲunsɔ híɛhɔ́, á ɛ́ hóoní miɛ ɛ́ yòoní.

Mì bí wóo lè mì ńkɔhĩ́ lìe wɛ̀

¹¹ Kìe zɛ̀ɓɛ̀, mí bí wóò khɛ́ ben-làahɛ̃ ɛ̀ lɛ́kɛ ɓán wɛ̀. Àlɛ wóò khɛ́ ben-làahɛ̃ ɛ̀ lɛ́ ɓá ńkɔnù ǹ, tàá ɛ̀ bie nɛ a ɛ́ wé ɛ̀ khe, ɛ̀ hɔ̀ iè Dɔfĩn làndɛ́ ɛ́ ɓàasɔ ɛ́ hɔ̀pe ben-làahɛ̃ sɔ ɛ̀ khɛ́ lɛ́ nin, ɛ̀ hɔ̀ iè hɔ̀pe làndɛ́ sɔ á nɛ hɔ ɛ́ wé ɛ̀ khe. Ɛ́ kɔ́ ɓen wóò wé kɛ̀amu, ɛ̀ kɔ̀ iè wìe lɛ ɛ́ hɔ̀pe làndɛ́ lìe ɛ̀ lè, kɛ́ kɔ́ den yá pehɔ̀ bòo lɛ ɛ́ hɔ́ bie ɛ̀ wé wɛ̀.

¹² Ɛ́ Dɔfĩn mí dòonún ɛ́ lò te hɔpe làndɛ́ ɛ́ lɛ́ ɓɛ́ nìnbirìe ǹ; ɛ́ Hɔ́pe mí dòonún ɛ́ ɓiɛ̀ te ɓɛpe nìnbirìe lìe ɛ́ wóò lè. Hɔ̀pe mí dòonún ɛ́ temu dɛ̀ nìnbírɔ́ ɛ́ fuenínin, ɛ̀ Hɔpe mí dòonún ɛ́ temu dɛ̀ àpe nìnbírɔ ɛ́ yáa. Ɛ́ kɔ́pe iè wíeni ɛ́ kɔ́ dàa ɛ́ mì ńkɔnù lìe ɛ̀ lè?

Mì bí wóo wé yèncɛ̀riè wɛ̀

¹³ Ɛ́ kɛ̀a sàalɛ ɛ́ mí wo tɛ́ mí ɲɛkɛ̃̀a, mìpe lɛ ɛ́ wóò bie nɛ zoòni tàá yìrí ɛ̀ mì ɛ́ vɛ yúrɔ́n lóo lɛ, ɛ́ vɛ́ wé lɔ́lɔ́-kùi yán, ɛ́ dàń hɔ̀ bòo yán ɛ́ yí hɔ́ màa.

¹⁴ Mí wóò bie kɛ̀amu kɛ́ mí lò den yí dũ bòo lɛ ɛ́ mii yìrí wé mí mɛkɛ̃nì hũn wɛ̀. Mí dɛ̃̀ kɛ̀a ie ńɲíi lɛ wóò síɛ hĩní ɛ̀ mi pɛ̃̀hṹ dìkíndíɛ hũn, ɛ̀ yòó saakɛ vĩ́.

¹⁵ Mí den sãawi ɛ̀ mì wóo bie nɛ Ɲunsɔ ɓen tɛ̀, ɛ́ mí yìe ɛ́ ɓén wé, ɛ́ mí wo ɛ́ wé hɔ́ lɛ ɛ̀ mì ɛ́ khíi wé hɔ́ sí.

¹⁶ Kɛ́ kɛ̀a sáalɛ ɛ́ mí den hɛ̀ wóò ɓàaní míte ǹ cɛ̃̀un, ɛ̀ mì tĩɛ̀ ɛ́ wóò vɛ́ hɔ́ bòo lɛ ɛ́ ɓàakɛa pɔ miɛ ǹ. Ɛ́ lépe yèncànlè sí ɓà ńmaà ɛ́ yí sãa wɛ̀.

¹⁷ Ɛ́ nìnbírɔ lɛ ɛ́ dũ hɔ bɔ̀tente wénlɔ́ kɛ́ á lò yá hɔ̀ wé, hɔ́rɔsí ɛ̀ hɔ̀ iè bɔ̀koohɔ́ á ɛ́ wé.