Zaake 3 - Buamu Laa

Nìnbírɔ dìɛnù bòo

¹ Kìe zɛ̀ɓɛ̀, mì bí nɛ mi tĩ́ihṹ ɛ́ nìnbí-kuì ɛ̀ bie nɛ ɓɛ ɛ̀ wé ɓɛ́ nìnbirìe kɛ̀ránliè wɛ̀. Iè hɔ̀ lɛ ɛ́ mí dũ kɛ́ képe kɛ̀ránliè ɛ́ lìe lènlɔ́ ɛ́ ɓén hiení cɛ̃̀un ɛ́ pɔní ɓɛ́lɛ kɛ́ lìe lènlɔ́.

² Kèpe kè kùi ɛ́ wóò wé khe bòo cɛ̀rìɛɛ hũn. Kɛ́ nìnbírɔ ɛ́ yáà khɛ́ khe mí biehĩ́ hũn, à iè nìnbírɔ lɛ ɲunù tú lɛ ɛ́ dũ míte dàarɔ́.

³ Ɛ́ ké wóò dé lé ɲɛkɛ̃mi ɓɛ̀ zaá-taà ɲihĩ́ɛ ǹ bòo lɛ ɛ́ wé ɛ̀ ɓɛ̀ ɲí ké bòo. Ɛ́ kɛ̀amu, ɛ́ ké wóò lɛ́ ɛ̀ ɓɛ̀ wé hɔ́ bòo lɛ ɛ́ ké wɛ nɛ ɓɛ wé míkùi.

⁴ Ɛ́ mí bĩní húi hɔ́ ɲumu wuò bɔ̀bɛ̃hɛ̃ lò. Ɛ̀ dúrɔ yɛ̀rɛ́ hṹn ɓàń kɛ̀a wɛrɛ̀, ɛ̀ pelè ńkànlè ɛ́ kɛ́ fĩ́i. Ɛ́ hɛ̀rí kɛ́ lé pinpi-bɛhɔ́ ɛ́ zè ɛ́ lè hénkɛ, ɛ̀ lè iè lèpe ńkànlè lɛ fĩ́i sɔ á nìnbírɔ lɛ ɛ́ lè zìení ɛ́ wóò zɛ̃nkɛnin ɛ̀ dàá dàá lé dàá vɛ viì lɛ á wɛ.

⁵ Ɛ́ hɔ́ iè pe lò ɓiɛ̀ dɛ̃̀ kɛ̀amu àá ɔ́ nìnbírɔ dìɛnù. Lè dìɛnù ɛ́ kɛ fĩ́i à nìnbírɔ tɛkɛ̀a hũn, kɛ́ lé den dɛ̀ míte ɛ́ ɓàanínin iè mípe ɛ́ te hɔ bòo bɔ̀bɛ̃hɛ̃ ɛ́ wóò khɛ́. Ɛ́ mí húi lò: dṹn pɔnù dɛ̀cíi ɛ́ dɛ̀ ńɲi-herà dɛ̀bɛhɔ́ ɛ́ cĩ̀ní.

⁶ Ɛ́ lé dìɛnù iè pe ɓiɛ̀ dɛ̃̀ kɛ̀a hɔ́ dṹn. Lè iè miikɛ bɔ̀yàarè dìɛ dɔ̀ lɛ ɛ́ wi ke tɛkɛ̀a hũn. Lèpe ɛ́ te hɔ tɛkɛ̀a míkùi ɛ́ wóò zìɛní àá hɔ́ bɔ̀koohɔ́. Hɔ̀ cã̀ámìnɛ́ dṹn ɛ́ wóò zĩiní lé, ɛ̀ lè ɓiɛ̀ khíi zĩiní-ɛ nìnbírɔ mɛkɛ̃nì míkùi.

⁷ Ɓɛ̀ mɛ-bìe àá ɓɛ́ ɲúuhɛ̃ ɲúuhɛ̃ ɓɛ́kùi àá ɓɛ́ ńɲíizàani àá ɓɛ́ bìe lɛ wóò vɛ́sí ɓɛ́ vùkùo lɔ̀n àá ɓɛ́ ɲumu bìe á nìnbírɔ ɛ́ dɛ̀ wóò ɓaakɛ ɛ̀ ɓɛ̀ ɲí piè bòo.

⁸ Kɛ́ nìnbírɔ dɔ̀ lɛ ɛ́ dɛ̀ mí dìɛnù ɛ́ ɓaà ɛ́ mí wɛ̀. Lè hɛ̀ iè dìɛ lɛ ɛ́ yí sãa ɛ̀ lè yáà kań viì-cóoní wɛ̀. Lè ɛ́ tú àá hɔ́ túurɔ́ lɛ ɛ́ dɛ̀ à nìnbírɔ́ ɛ́ ɓé.

⁹ Lè iè lèpe ɛ́ ké wóò dàá ɓàaní ké Ɲunsɔ lɛ iè kìe Yàá ǹ, ɛ̀ lè lò iè lèpe ɛ́ ké wóò dàá dánkɛníkɛ ɓɛ nìnbirìe lɛ ɛ́ hɔ́pe Dɔfĩn ɛ́ mɛ́ ɛ́ ɓɛ́ lɔ́ɓán àá mí kùrú te.

¹⁰ Hɔ̀ dúɓɛ́rɔ́ biehĩ́ àá lé dánkɛ́nín biehĩ́ ɛ́ wóò zɔ lé àá lépe ɲunù dìcóoní hũn. Kìe zɛ̀ɓɛ̀, mì bí nɛ hɔ wóo wé kɛ̀amu wɛ̀.

¹¹ Mí ɲɛùn mɔn kɛ́ ɲumu lɛ ɛ́ tĩ àá ɲumu lɛ ɛ́ yí tĩ ɛ́ páaníɛ zɔn ɛ́ lé ɲun-kɛ̃nù dìcóoní hũn?

¹² Kìe zɛ̀ɓɛ̀ mí ɲɛùn mɔn kɛ́ ńluunù ɛ́ han vuà? Ɛ̀ mì ɲɛùn mɔn ńɲiinù kɛ́ lé han ńɓinɓi-tɔrɔ́? Ɛ́ ɲun-kɛ̃nù lɛ ɲumu yí tĩ ɛ́ ɲumu lɛ tĩ ɛ́ yí dɛ̀ yá zɔ lé hũn wɛ̀.

Hɔ̀ bɔ̀dũmunù lɛ ɛ́ lé àá hɔ́ hóohũn bòo

¹³ Kɛ́ mí tĩ́ihṹ ɛ́ nìnbírɔ dɔ̀ ɛ̀ líi à nɛ mípe ɛ́ iè bɔ̀dũmunù ɓàasɔ, ɛ̀ mí hɛciri lò wi, ɛ̀ nɛ ɓàasɔ ɛ̀ zɛ̃́ní hɔ́ míte dàarɔ́ lɛ sãa hũn àá bòo lɛ á dàa wóò wé hɔ́ bòo àá te síɛnírɔ́ àá bɔ̀dũmunù hũn.

¹⁴ Kɛ́ mí tĩɛ̀ ɛ́ ɓen tú àá lè yanlienú khùanù àá lé ńbíyaanún, ɛ̀ mì bí wóo ɓàaní míte ǹ ɛ̀ bie nɛ mí iè bɔ̀dũmunù ɓàasiè ɛ̀ dàa pĩ́ hɔ́ bɔ̀berà bòo wɛ̀.

¹⁵ Ɛ́ hɔ́pe bɔ̀dũmunù sí ɓà ńmàa ɛ́ yá lé àá hóohũn kɛ́ hɔ́ ɛ́ lé àá sṹsùnù. Hɔ̀ iè nìnbí-yáamu bɔ̀dũmunù, ɛ̀ hɔ̀ lɔ́ àá Sitũanɛ viì.

¹⁶ Ɛ́ viì lɛ ɛ́ lé yanlienú àá lé ńbíyaanún àá hɔ́ hũn lenlɔ́ ɛ́ wi hũn, iè pe viì lɛ ɛ́ hɔ́ ńwékɛkũǹ àá hɔ́ bɔ̀koohɛ̃ àá mí ɲúuhɛ̃ míkùi ɛ̀ ɓiɛ̀ wi hũn.

¹⁷ Kɛ́ hɔ́ ɓen iè hɔ̀ bɔ̀dũmunù lɛ ɛ́ lé àá hóohũn, ɛ̀ hán bòo, hɔ̀ iè bɔ̀dũmunù lɛ ɛ́ ce, ɛ̀ bĩní páa yán, hɔ̀ wóò ɓen àá hũn-wiɛ̀, ɛ̀ hɔ̀ wuawi, ɛ̀ hɔ̀ wóò lɛ́ ɛ̀ nìnbirìe ɛ̀ khũ̀á ɲí ɓán, ɛ̀ hɔ̀ tú àá hɔ́ miinɛ̀ dũnlɔ́ àá hɔ́ bɔ̀tente wénlɔ́, ɛ̀ hɔ̀ yáà wiekɛ nìnbiriè, ɛ̀ hɔ̀ yáà wé ɲɛ-bĩníkɛrɔ́ bòo wɛ̀.

¹⁸ Ɛ́ ɓɛ́pe lɛ ɛ́ wóò lɛ́ ɛ̀ lè hũn-wiɛ̀ ɛ̀ kań ɓɛ́ nìnbirìe tĩ́ihṹ, ɛ́ iè lèpe hũn-wiɛ̀ ɛ́ ɓɛ́ wóò zì kɛ̀amu. Ɛ́ hɔ́ bòo lɛ ɛ́ ɓɛ́ ɓiɛ̀ wóò mìí ɛ́ iè hɔ̀ bɔ̀werà lɛ ɛ́ cã̀aní.