Zaake 2 - Buamu Laa

Mì bí wóo wiekɛ ɓɛ nìnbirìe wɛ̀

¹ Kìe zɛ̀ɓɛ̀, mìpe lɛ ɛ́ bɔ̀ mì tĩɛ̀ kè Ɲunsɔ Yiezu Kirisa lɛ wi hɔ ɓàarɔ́ hũn lɔ̀n, ɛ́ mí yí sãawi ɛ́ mì wóo wiekɛ ɓɛ nìnbirìe wɛ̀.

² Kɛ́ nìɛ ɓɛ̀ ɲu dɔ̀ ɛ́ ɓɛrɛ mì ńkóoɓánlɔ̀n hũn, kɛ́ ádɔ̀ ɛ́ zɔn tĩ̀ɛ lɛ sãa cɛ̃̀un, ɛ́ dɔ́ sɛ̃́ní nínkɛ́zuú dìɛ, àdɔ̀ ɛ́ iè nìkherà lɛ ɛ́ zɔn tĩ̀ɛ lɛ khã̀akɛa.

³ Kɛ́ mí wɔ́ álɛ ɛ́ zɔn hɔ̀ tĩ̀ɛ lɛ sãa ɛ́ mí ɛ́ mɛ̀ndɛ̃, ɛ̀ mì bie lɛ́ á ǹ sãa sãa nɛ a ɓen kansí lé kànlén lɛ sãa lɔ̀n, ɛ̀ mì khie bie ɛ́ lɛ́ á nìkherà ǹ nɛ a dìń dìńlɔ́, tàá nɛ a síɛ kansí sṹsùnù mì laahĩ́ hũn.

⁴ Kɛ́ mí ɓen ɛ́ wé kɛ̀amu, ɛ̀ ɓɛ̀ iè nìnbirìe ɛ́ mí ɛ́ wiekɛ, ɛ̀ mì bòo lɛ ɛ́ mí wóò dàa líi ɓɛ́ nìnbirìe ɛ́ wóò lé àá mí nùnlé lɛ ɛ́ yí sãa hũn.

⁵ Kìe zɛ̀ɓɛ̀ lɛ ń wɛ, mì tɛ́ mí ɲɛkɛ̃̀a: Dɔfĩn ɛ́ munɛ ɓɛ́ nìnbirìe lɛ iè ɓɛ̀ nìkherà ɓɛ̀ dímíɲɛ́ nìɛ yìe hũn nɛ ɓɛ wé bòo ɓàasiè hɔ̀ ńdɛsĩ̀nlɔ́ hũn, ɛ̀ ɓɛ̀ yí lé bɛ́záanú lɛ ɛ́ mí hàarí lɛ́ mí ɲunù nɛ mí ɓén lɛ́ ɓɛ́ nìnbirìe lɛ ɛ́ wɛ mí ǹ.

⁶ Kɛ́ mípe, mí den wóò khɛ̀ránkɛ ɓɛ nìkherà mì laà hũn, hɔ́rɔsí kɛ́ ɓɛ́ lò den iè ɓɛ̀pe bòo ɓàasiè ɛ́ te mi lɔ̀n ɛ́ wóò biení ɛ̀ ɓɛ̀ ɓaakɛ miɛ ɛ̀ dàá vɛ ɓɛ lìe lèriè híɛhɔ́.

⁷ Ɓɛ̀ iè ɓɛ̀pe ɛ́ te le yèn-sãànù lɛ ɛ́ Dɔfĩn ɛ́ lɛ́ miɛ ǹ ɛ́ wóò yáa.

⁸ Hɔ̀ bɔn, mí ɓen wóò wé Dɔfĩn bɛ́záanú làndɛ́ bòo ɛ̀ tíiní ɲunù kɛ̀a bòo lɛ ɛ́ hɔ́ dàa wɛ̃́ lépe Dɔfĩn bienù vɛ̃hṹ hũn, hɔ́rɔsí ɛ̀ mì iè pe wo ɛ́ wé sãa. Hɔ̀ ɛ́ wɛ̃́ lé làndɛ́ vɛ̃hṹ hũn ɛ́ nɛ làa: «Kɔ́ fɔ́ɓán ɛ̀ kɔ̀ wɛní mì ńkɔnù kɛ̀a bòo lɛ ɛ́ kɔ́ dàa wɛ kɔ kùrú te.»

⁹ Kɛ́ mí ɓen ɛ́ wóò wiekɛ ɓɛ nìnbirìe, hɔ́rɔsí ɛ̀ hɔ̀ iè bɔ̀koohɔ́ ɛ́ mí ɛ́ wé, ɛ̀ hɔ̀ làndɛ́ ɛ́ ɓaa miɛ iè hɔ̀ lɛ ɛ́ mí wɔ́ khɔn àá hɔ́pe làndɛ́.

¹⁰ Ɛ́ kɛ́ nìnbírɔ ɛ́ hɔ̀ làndɛ́ bòo lɛ ɛ́ hɔ́ bie míkùi ɛ̀ wé, kɛ́ á van wɔ́ khɔn àá pehɔ̀ bòo ɲún cóoní dɔ̀, hɔ́rɔsí à wɔ́ khɔn àá hɔ́pe làndɛ́ míkùi.

¹¹ Hɔ̀pe Dɔfĩn lɛ ɛ́ bie nɛ: «Bí fé hṹnu tàá bí fé bɛ́rɔ,» ɛ́ lò ɓiɛ̀ temu bie nɛ: «Bí ɓé nìnbírɔ wɛ̀.» Kɛ́ kɔ́ ɓen ɛ́ yí fé hṹnu tàá kɔ́ yí fé bɛ́rɔ, kɛ́ kɔ́ den wo ɓɔ́ nìnbírɔ, ɛ̀ kɔ̀ iè wìe ɛ́ wɔ́ khɔn àá hɔ́pe làndɛ́.

¹² Ɛ́ mí den wóo bie ɛ̀ mì lò wé kɛ̀a ie nìnbirìe lɛ ɛ́ hɔ́ làndɛ́ ɛ́ ɓén lè lìe, ɛ̀ hɔ̀ ɛ́ lɛ́ ɛ́ mí ɛ́ teń míte.

¹³ Ɛ́ Dɔfĩn ɓen mii lè nìnbírɔ lɛ ɛ́ yáà mi ɓá ńkɔhĩ miinɛ̀ lìe, ɛ́ Hɔ́ ɓiɛ̀ ɛ́ yá mi ɓàasɔ miinɛ̀ wɛ̀. Kɛ́ á nìnbírɔ lɛ ɛ́ wóò mi ɓá ńkɔhĩ́ miinɛ̀ ɛ́ pe ɛ́ yí fɔ́ɓán à zán hɔ́ lìe lènlɔ́ wɛ̀.

Hɔ̀ ńdɛsĩ̀nlɔ́ àá hɔ́ bɔ̀werà bòo

¹⁴ Kìe zɛ̀ɓɛ̀, kɛ́ nìnbírɔ ɛ́ nɛ mípe ɛ́ dàa ńdɛsìnlɔ́ kɛ́ á lò yá hɔ̀ zɛ̃́ní mí bɔ̀werà hũn, ɛ̀ pehɔ̀ tũ̀nú ɛ́ mí lò! Ɛ̀ pie ńdɛsĩ̀nlɔ́ sɔ ɛ́ yí dɛ̀-à ɛ́ yá fuenínin lò.

¹⁵ Kɛ́ mì zuú tàá mì hãá ɛ́ yí dàa tĩ̀ɛ lɛ ɛ́ zɔ tàá kɛ́ ɓɛ́ yí dàa bòo lɛ ɛ́ ɓɛ́ wóo ɓɛ ɛ̀ dí àá sítĩnlɔ́,

¹⁶ ɛ́ kɛ́ ádɔ̀ mì tĩ́ihṹ ɛ́ lò yí lɛ́ bòo dɔ̀ ɓà ǹ, à zɔn bie lɛ́ ɓà ǹ nɛ: «Mì lan àá hũn-wiɛ̀, mì vɛ zɔ hɔ tĩ̀ɛ lɛ ɛ́ lìkɛ ɛ̀ sooní mí tɛkɛ̀a ɛ̀ mì dí tì», ɛ̀ hɔ̀pe sí ɲún mí lò!

¹⁷ Ɛ́ sí iè pe ɛ́ hɔ́ ńdɛsĩ̀nlɔ́ ɛ́ ɓiɛ̀ dɛ̃̀ kɛ̀amu: hɔ̀ ɓen ɛ́ yáà zɛ̃́ní míte hɔ̀ bɔ̀werà hũn, ɛ̀ hɔ̀ iè bòo lɛ ɛ́ húrun.

¹⁸ Ɛ́ wɔ́ khɔn ádɔ̀ ɛ́ zɔ́ bie nɛ ɓɛdɔ̀ ɛ́ dàa hɔ ńdɛsĩ̀nlɔ́ ɛ̀ ɓɛ̀dɔ̀ ɛ́ ɓiɛ̀ dàa hɔ bɔ̀werà. Ɛ́ nín zɔ́ kɔ̃́ní ɓàasɔ nɛ làa: Ɛ́ kɔ́ zɛ̃́ní bòo lɛ ɛ́ kɔ́ ńdɛsĩ̀nlɔ́ dàa dɛ̀ ɛ́ kań kɛ́ kɔ́ bɔ̀werà ɛ́ ɓen bòo mí, ɛ́ ńpe ɓiɛ̀ ɛ́ zɛ̃́ní niǹ ńdɛsĩ̀nlɔ́ niǹ bɔ̀werà hũn.

¹⁹ Kɔ́ dũmuasɛ̃̀ nɛ Dɔfĩn ɛ́ iè dìcóoní, ɛ́ hɔ́ iè bòo lɛ sãa. Ɛ́ ɓɛ́ ńɲíkĩ́nìɛ ɛ́ lò ɓiɛ̀ dũmuasɛ̃̀ hɔ̀pe sí ǹ, ɛ̀ ɓɛ̀ wóò zán ɛ̀ zɛ̃ wɛ̀ wɛ̀.

²⁰ Kɔ́ hɛ̀ iè pe bɛ̃́nbṹ! Kɔ́ ɛ́ cɛ̀ ɛ́ kɔ́ dũń hɔ́ bòo lɛ ɛ́ zɛ̃́ní kɛ́ nìnbírɔ ɛ́ ɓen nɛ mí dàa ńdɛsĩ̀nlɔ́ kɛ́ piè bɔ̀werà ɛ́ lò bòo mí ɛ̀ piè ńdɛsĩ̀nlɔ́ sɔ ɛ́ ɲún mí?

²¹ Ɛ́ hɔ́ iè ńɓuò ɛ́ temu lɛ́ ɛ́ Dɔfĩn dàa hàarí ɛ́ líe kìe zĩ́kĩ́n Abarahaamu àá nìnbírɔ lɛ ɛ́ cã̀aní? Hɔ̀ den hàarí iè piè bòo lɛ á wɔ́ bòo hũn, iè hɔ̀ lɛ á den hàarí ɓaa mí zuú Yizaake ɛ́ mii vɛ ɓé lé miyiɛ́ leǹlén dúekéré lɔ̀n ɛ̀ lɛ́ Dɔfĩn.

²² Ɛ́ kɔ́ lò wo loo kɛ́ á Abarahaamu ńdɛsĩ̀nlɔ́ àá piè bɔ̀wera ɛ́ hàarí páaniɛ ɛ́ vɛ ɓánlɔ̀n. Ɛ́ piè ńdɛsĩ̀nlɔ́ ɛ́ hàarí fɛ́sí dɛ̃̀ sãa piè bòo lɛ á hàarí ɛ́ wé bòo hũn.

²³ Ɛ́ hɔ́ wɔ́ kɛ̀amu ɛ́ hɔ́ bòo lɛ ɛ́ khɛ́ lé Dɔfĩn bienù vɛ̃hṹ hũn ɛ́ dàa ɲunù ɛ́ tú. Hɔ̀ den khɛ́ yán ɛ́ nɛ làa: «Abarahaamu ɛ́ hàarí dũmuasɛ̃̀ Dɔfĩn, ɛ́ piè ńdɛsĩ̀nlɔ́ sɔ bòo hũn ɛ́ Dɔfĩn ɛ́ líe ɔ̀ àá nìcã̀anírɔ.» Ɛ́ hɔ́pe Dɔfĩn ɛ́ wo vɔn ɔ̀ nɛ ɓɛ́ pàá.

²⁴ Ɛ́ mí wo yí loo kɛ́ Dɔfĩn ɛ́ wóò líi nìnbírɔ àá nìcã̀anírɔ ɓàasɔ bɔ̀werà bòo hũn kɛ́ hɔ́ yí ɓàasɔ ńdɛsĩ̀nlɔ́ mí dòonún bòo hũn wɛ̀.

²⁵ Á Rahaabu lɛ hàarí iè ɔ̀ hṹnù lɛ wóò yìɛní míte bòo kùusɔ ɛ́ hàarí dɛ̃̀ kɛ̀amu. Dɔfĩn ɛ́ hàarí líe ɔ̀ àá nìcã̀anírɔ piè bɔ̀werà bòo hũn iè hɔ̀ lɛ á hàarí perɛ ɓɛ̀ Yizarayɛɛle nìɛ lɛ ɓɛ́ hàarí tɔrɛ mí yíe à yíiniɛ ɓɛ̀ ɛ́ ɓɛ́ yú zɔ̀ bɔ̀ wṹ-ɓuɛ̀ ɛ́ dàa cɔ́.

²⁶ Ɛ́ kɛ̀a bòo lɛ á nìnbírɔ tɛkɛ̀a lɛ ɛ́ bɔ́nú ɛ́ mí hũn ɛ́ dàa iè bòo lɛ ɛ́ húrun, ɛ́ hɔ́ ńdɛsĩ̀nlɔ́ lɛ yáà páaní bèɓán àá hɔ́ bɔ̀werà ɛ́ ɓiɛ̀ iè bòo lɛ ɛ́ húrun.