Tiite 2 - Buamu Laa

Hɔ̀ bérɛ́ lɛ sãawi ɛ̀ hɔ̀ wóo lɛ́ ɓɛ́ ńdɛsĩ̀rie ǹ bòo

¹ Kɛ́ hɔ́ ɓen kɛ́ kɔ́pe, ɛ̀ kɔ̀ wóo bie hɔ bòo lɛ ɛ́ ɓáaníɓán àá hɔ́ bɔ̀berà kɛ̀ránlɔ́.

² Bie lɛ́ ɓɛ́ nìkĩ́ihɛ̃ ǹ nɛ ɓɛ wóo ɓaà ɓɛ́te, ɛ̀ ɓɛ̀ wóo wé bòo lɛ ɛ́ lɛ́ ɛ́ ɓɛ́ nìnbirìe ɛ́ dàá mɛ̀ndɛ̃ ɓɛ, ɛ̀ ɓɛ̀ wóo wé hɔ́ bòo lɛ ɛ́ te mí yìe hɔ̀ bɔ̀berà hũn, ɛ̀ ɓɛ̀ fɛ́sí dìń hɔ́ ńdɛsĩ̀nlɔ́ hũn àá bɔ̀bín, ɛ̀ ɓɛ̀ dàá lé wanminu, ɛ̀ ɓɛ̀ wóo hè ɓɛ́ hũn.

³ Ɛ̀ ɓɛ̀ hɛ̃́kĩ́ihɛ̃ ɛ́ kɔ́ bie lɛ́ nin nɛ ɓɛ wóo dàa ɓɛ́te ɛ̀ ɓáaníɓán àá bòo lɛ ɛ́ Dɔfĩn ɛ́ wɛ, ɛ̀ ɓɛ̀ bí wóo bie ben-làahɛ̃, ɛ̀ ɓɛ̀ bí wé ɲɛkhĩɛbɛ̃́ɓɛ́ wɛ̀; kɛ́ ɓɛ́ wóo lɛ́ hɔ́ bérɛ lɛ sãa,

⁴ ɛ̀ ɓɛ̀ hɛ̃́fùa ɛ̀ dàá wɛní ɓá báa àá ɓɛ́ zĩncãahɛ̃,

⁵ ɛ̀ ɓɛ̀ wóo wé hɔ́ bòo lɛ ɛ́ te mí yìe ɛ̀ peɓɛ̀ hũn ɛ̀ lò ce, ɛ̀ ɓɛ̀ wóo húi ɓɛ́ zĩhĩ́ɛ bòo sãàní, ɛ̀ ɓɛ̀ wé hã́a lɛ ɛ́ bɔ̀werà sãa, ɛ̀ hɔ́rɔ ɛ̀ wóo ɲí ɓá bɛ́rɔ bòo, bòo lɛ ɛ́ wé ɛ̀ ɓɛ̀ nìnbirìe ɛ́ dàá bí tòokɛ le Dɔfĩn bienù wɛ̀.

⁶ Ɛ̀ ɓɛ̀ zɛ̀fuà ɛ́ kɔ́ lò ɓiɛ̀ lɛ́ hɔ́ bérɛ nin nɛ ɓɛ wóo ɓaà ɓɛ́te hɔ̀ bòo mí kùi hũn.

⁷ Ɛ̀ kɔ̀pe kùusɔ ɛ̀ lɛ́ ɛ̀ kɔ̀ bɔ̀tente wénlɔ́ ɛ̀ wé bòo zɛ̃́nílán: nɛ hɔ̀ kɛ̀ránlɔ́ lɛ ɛ́ kɔ́ wóò kɛ̀rán àá ɓɛ́ nìnbirìe ɛ̀ wé bɔ̀berà kɛ̀ránlɔ́, ɛ̀ kɔ́ wóo lɛ́ hɔ́ àá kɔ́ tĩì míkùi.

⁸ Nɛ kɔ biehĩ́ ɛ̀ wóo wé bɔ̀berà biehĩ́ lɛ ɛ́ nìnbírɔ ɛ́ yí dɛ̀ ɛ́ yá wũ̀aní, ɛ̀ kìe ńbíyanliè ɛ́ lé lùwiè ɛ̀ dí iè hɔ̀ lɛ ɛ́ ɓɛ́ yí loo bɔ̀koohɔ́ dɔ̀ lɛ ɛ́ ɓɛ ɛ̀ bie ke bòo hũn wɛ̀.

⁹ Ɛ̀ ɓɛ̀ wɔhĩ́ ɛ̀ kɔ́ wóo bé nɛ ɓɛ́ wóo ɲí ɓɛ́ ɲúuhɛ̃ siè bòo hɔ̀ bòo míkùi hũn, ɛ̀ ɓɛ̀ lɛ́ nɛ ɓɛ́ bòo ɛ̀ tĩìní ɓà ǹ, ɛ̀ ɓɛ̀ bí wóo wũ̀aní ɓɛ́,

¹⁰ ɛ̀ ɓɛ̀ bí kɛ̃̀mɛ́ peɓɛ̀ bòo dɔ̀ hùúu, kɛ́ ɓɛ́ wóo zɛ̃́ní kɛ́ ɓɛ́ ɲúuhɛ̃ ɛ́ cã̀aní àá ɓɛ́, ɛ̀ dàá dé yèrè ké fuenírɔ Dɔfĩn kɛ̀ránlɔ́ ǹ.

Dɔfĩn hiì lɛ ɛ́ Hɔ́ zɛ̃́niɛ bòo

¹¹ Ɛ́ Dɔfĩn ɛ́ wo zɛ̃́niɛ mí hiì lɛ ɛ́ te ɓɛ nìnbirìe ɓɛ́kùi ɛ́ fuení nin.

¹² Ɛ́ lépe hiì sɔ ɛ́ kè kɛ̀rán nɛ ke pĩ́ hɔ́ bòo yí ɓáaníɓán àá Dɔfĩn wṹn, ɛ̀ lò pĩ́ lèpe dímíɲɛ́ lɛ pɔnù bòo, ɛ̀ hɔ̀pe zoòní wĩhĩ́ lɛ ɛ́ ké wi hũn, ɛ̀ kè dàá wóo wé hɔ́ bòo lɛ ɛ́ te mí yiè kè mɛkɛ̃nì hũn, ɛ̀ kè wé nìɛ lɛ ɛ́ cã̀aní, ɛ̀ cɛ ke kuò Dɔfĩn bòo hũn.

¹³ Ɛ́ sí iè pe ɛ́ ké fɔ́ɓán ɛ̀ kè hìé hɔ́ bɔ̀tente lɛ ɛ́ ké ɛ́ hìé àá ńdɛsĩ̀nlɔ́ kɛ̀amu. Ɛ́ lépe wurù sɔ zɔǹ, ɛ̀ kè Dɔfĩn bɛhɔ́ àá ké fuenírɔ Yiezu Kirisa ɓàarɔ́ ɛ́ den wo ɓén mi.

¹⁴ Àpe Yiezu Kirisa ɛ́ lɛ́ míte míte ǹ kè bòo hũn ɛ́ dàa lerɛ kie ɛ́ lieniɛ hɔ̀ bɔ̀koohɔ́ míkùi núnú hũn, à wɔ́ kie àá dàa lɛ nìɛ ɛ́ ce lɛ ɛ́ bòo sɛ̃̀ à ǹ, ɛ́ ké dàa wɔ́ nìnbirìe lɛ ɛ́ can kè kuò ɛ̀ dàa ɛ́ wóo wé hɔ́ bɔ̀tente.

¹⁵ Ɛ́ sí iè pe ɛ́ kɔ́ sãawi ɛ̀ kɔ̀ wóo bie àá ɓɛ́ kɛ̀amu, wóo bé ɓɛ́, ɛ̀ kɔ̀ lò fĩ àá ɓɛ́ kɛ́ kɔ́ bí kɛ̀ àdɔ̀ yìe wɛ̀. Bí lɛ́ nɛ nìnbírɔ dɔ̀ ɛ̀ cíwìní kɔ ǹ wɛ̀.