Bɔ̀zɛ̃́níriè 9 - Buamu Laa

¹ Á mɛlɛkɛ hùanúlán ɛ́ zɔn pìɛ mí bũì. Ɛ́ ń mɔn lè ńpĩ́inàwiì dɔ̀ kɛ́ lé yòó lɔ́ hɔ́ hóohũn ɛ́ kuerɛ siɛ lè sṹsùnù. Ɛ́ ɓɛ́ khie lɛ́ lé hĩì lɛ ɛ́ wóò hán lépe kṹ-bɛhɔ́ lɛ fĩi mí lèpe ńpĩ́inàwiì sɔ ǹ.

² Ɛ́ lé wo khie hɛ́rɛ lèpe kṹ-bɛhɔ́ sɔ ɲunù. Ɛ́ hɔ́ miikɛ ńɲíi dɔ̀ lɛ ɛ́ dɛ̃̀ kɛ̀a ie ɓùi dɛ̀bɛhɔ́ dṹn ńɲíi ɛ́ zɔn lɔ́ lépe kṹun bɛhɔ́ sɔ hũn, ɛ́ yòó díiniɛ lè wurù àá hɔ́ sɔmu cíkícíkí.

³ Ɛ́ ɓɛ́ ńkòoyáa dɔ̀ ɛ́ zɔn lɔ́ hɔ́pe ńɲíi sɔ hũn ɛ́ lɔ́ bɛ́rɛsí lé sṹsùnù, ɛ́ ɓɛ́ khie lɛ́ hɔ́ pànkɛ́ ɓà ǹ, pànkɛ́ lɛ kɛ kɛ̀a ie naaɓɛ̀ lɛ ɛ́ wi le sṹsùnù lɔ̀n pànkɛ́.

⁴ Ɛ́ ɓɛ́ wo bie lɛ́ ɓà ǹ nɛ ɓɛ bí yáakɛ hɔ ńɲíini àá hɔ́ vɛ̃̀hɛ̃ àá hɔ́pe bòo bɔ̀tiè lɛ ɛ́ sɛ̀ lè sṹsùnù lɔ̀n wɛ̀; kɛ́ ɓɛ́ nìnbirìe lɛ ɛ́ yí dàa le Dɔfĩn núnú ɲìnlén ɓɛ́ ɓiè lɔ̀n ɛ́ ɓen bòo mí.

⁵ Ɓɛ̀ yí lɛ́ ɲunù ɓà ǹ nɛ ɓɛ ɓé ɓɛ́pe nìnbirìe sɔ, kɛ́ ɓɛ́ den nɛ ɓɛ ɲínkɛ ɓɛ fúu ńpĩ́ihɛ̃ hùanú. Ɛ́ lépe lɔ̀nbiè lɛ ɛ́ ɓɛ́ wóò dé ɛ́ den wóò vɛ́ kɛ̀a ie naa lɛ ɛ́ ɓen tɛ́ nìnbírɔ bòo sí.

⁶ Ɛ́ hɔ́pe wihĩ́ sɔ hũn, ɛ́ ɓɛ́ nìnbirìe ɛ́ wóo ɓén cɛ̀ hɔ̀ húmú kɛ́ ɓɛ́ den ɛ́ yá yí hɔ́ wɛ̀. Ɓɛ̀ wóo ɓén cɛ̀ ɛ̀ ɓɛ̀ ɛ̀ hí, kɛ́ hɔ́pe húmú ɛ́ den ɓén zè ɛ̀ hɔ̀ ɛ́ kɛ́ ɓɛ́.

⁷ Ɓɛ̀pe ńkòoyáa sɔ ɛ́ lɔ́ɓán àá záataà lɛ ɛ́ ɓɛ́ sɛ́sɛ́a vɔ́ nɛ ɓɛ vɛ tɛ́ hɔ́ hĩɛ̀. Peɓɛ̀ ɲúuhɛ̃ ɛ́ hɔ́ bòo dɔ̀ lɛ ɛ́ lɔ́ɓán àá sɛ̃́ní bɛ́záanú múnsénɛ̀a ɛ́ wi lɔ̀n, ɛ̀ peɓɛ̀ híɛhɛ̃ ɛ́ lɔ́ɓán àá nìnbirìe híɛhɛ̃.

⁸ Ɛ̀ peɓɛ̀ ɲún ńɲiihĩ́ ɛ́ dɛ̃̀ kɛ̀a ie hṹnu ńɲiihĩ́, ɛ̀ peɓɛ̀ ɲiɛ̀ ɛ́ dɛ̃̀ kɛ̀a ie zankɛ́wòohɛ̃ ɲiɛ̀.

⁹ Ɛ̀ peɓɛ̀ kutĩɛ̀ ɛ́ dɛ̃̀ kɛ̀a hɛ̃nlɔ́ pɔnkɔ̀nìɛ ɛ́ ɓɛ́ zɔn; ɛ̀ peɓɛ̀ ńmáa tɛmu ɛ́ dɛ̃̀ kɛa ie záataà lɛ ɛ́ ɓɛ́ can àá hĩɛ̀ tánlán wùtónìɛ ɛ́ ɓɛ́ wo ɛ́ zè vaá-vɛ hɔ̀ hĩɛ̀ tánlén tɛmu.

¹⁰ Ɛ̀ peɓɛ̀ fìzṹhĩ́ ɛ́ dɛ̃̀ kɛa ie ɓɛ naaɓɛ̀ fìzũhĩ́ lɛ ɲihĩɛ pĩ́ɛpĩ́ɛɓɛ́; hɔ̀ iè peɓɛ̀ fìzũhĩ́ sɔ hũn ɛ́ peɓɛ̀ pànkɛ́ ɛ́ wi hũn ɛ́ ɓɛ ɛ̀ dàá ɲínkɛ ɓɛpe nìnbirìe fúu ńpĩ́ihɛ̃ hùanú.

¹¹ Ɛ̀ peɓɛ̀ bɛ́zuú lɛ dú peɓɛ̀ híɛhɔ́ ɛ́ iè ɔ̀pe mɛlɛkɛ lɛ ɛ́ te lepe kṹ-bɛhɔ́ lɛ fìi mí bòo ɛ́ húi. Piè yèrè àá Hebereɓɛ níi ɛ́ iè «Abadɔn», ɛ̀ Kɛrɛkiɓɛ níi hũn ɛ́ lé iè «Apoliɲɔn», iè bòo ɛ́ ɓɛ́ nɛ «bɔ̀wuarɔ».

¹² Ɛ́ lé hán lɔ̀nbiè ɛ́ wo khie. Ɛ́ mí húi hɔ̀ lɔ̀nbuò bɔ̀nbɔ̀ ɲu dɔ̀ ɛ́ bĩniɛ vaá-ɓen lèpe sí máahṹ.

¹³ Á mɛlɛkɛ huiezĩ́lán ɛ́ zɔn ɛ́ pìɛ mí bũì. Ɛ́ ń ɲɛ́ hɔ́ tɛmu dɔ̀ kɛ́ hɔ́ zɔn tɛ̀ ɛ́ lɔ́ àá hɔ́ sɛ̃́ní miyiɛ́ leǹlén dúekéré sɛhĩɛ bɔ̀nbɔ̀ nɛ́ viì, lèpe lɛ ɛ́ wi hɔ Dɔfĩn híɛhɔ́.

¹⁴ Ɛ́ hɔ́ tɛmu sɔ ɛ́ zɔn bie àá ɔ́ mɛlɛkɛ huezĩ́lán lɛ ɛ́ dàa le bũì ɛ́ nɛ làa: «Fuen ɓɛ̀ mɛlɛkɛɓɛ bìɛ nɛ́ lɛ ɛ́ can dɛ̃̀ lè vṹn dɛ̀bɛhɔ́ lɛ ɛ́ ɓɛ́ wóò ve nɛ Efarate ɲunù ɛ̀ fùansí nin.»

¹⁵ Á wo fuerɛ ɓɛ̀pe mɛlɛkɛɓɛ bìɛ nɛ́ sɔ ɛ́ fùɛrɛ̀sí nin; Dɔfĩn ɛ́ den hàarí sɛ́sɛ́a ɓɛ̀ bɔ̀sí ɛ́ dàa ɛ́ lèpe lóo sɔ lɛ àá lépe ńpĩ́ihṹ sɔ lɛ àá lépe sí sɔ lɛ àá lépe líɛrɛ́ sɔ lɛ ɛ̀ hìé, ɛ́ nɛ ɓɛ vɛ ɓé ɓɛ́ sṹsùnù nìnbirìe ńsankɛà hĩ̀tĩ san-cóoní.

¹⁶ Ɛ́ ɓɛ́ ɛ́ zɛ̃́niɛ peɓɛ̀ hĩtɛriɛ lɛ ɛ́ yòo ɓɛ̀ záataà ɲún ɛ́ lɛ́ mi ǹ; ɓɛ̀ hàarí iè miliyɔnɓɛ khĩɛ́-ɲu (200 000 000).

¹⁷ Ɛ́ lépe niǹ yìnmirà hũn, ɛ́ lɛ iè pe bòo lɛ ɛ́ ń dàa mɔn ɓɛ̀pe záataà àá ɓɛ́pe nìnbirìe lɛ ɛ́ te ɓɛ ɛ́ yòo: ɓɛ̀ hàarí zɔn hɔ̀ hĩɛ̀ tĩ̀ɛ lɛ ɛ́ iè bɔ̀miɛ̀ kɛ̀a ie dṹn bòo sí, ɛ̀ hɔ̀ lò iè wúadímí bòo kɛ̀a ie safiire sɛ̃̀nlè bòo sí, ɛ̀ hɔ̀ lò iè ńdɔndɔ̀ bòo kɛ̀a ie cìrìbí bòo sí. Ɓɛ̀ záataà sɔ ɲúuhɛ̃ ɛ́ hàarí dɛ̃̀ kɛ̀a ie zankɛ́wòohɛ̃ ɲúuhɛ̃, ɛ̀ hɔ̀ dṹn àá hɔ́ ńɲíi àá hɔ́ cìrìbí ɛ́ hàarí ɛ́ zɔn ɛ́ lé àá peɓɛ̀ ɲihĩ́ɛ.

¹⁸ Ɛ́ ɓɛ́ sṹsùnù nìnbirìe ńsankɛà hĩ̀tĩ san-cóoní ɛ́ hɔ́pe bɔ̀sũmúa bòo ɲuniɛ̀ hĩ̀ tĩ sɔ ɛ́ ɓɔ́: hɔ̀pe bɔ̀sũmúa bòo ɲuniɛ̀ hĩ̀ tĩ sɔ ɛ́ iè hɔ̀ dṹn àá hɔ́ ńɲíi àá hɔ́ cìrìbí lɛ ɛ́ lé àá ɓɛ́pe záataà ɲihĩ́ɛ.

¹⁹ Ɓɛ̀pe záataà sɔ pànkɛ́ ɛ́ den wi peɓɛ̀ ɲihĩ́ɛ àá peɓɛ̀ fìzũhĩ́ hũn. Peɓɛ̀ fìzũhĩ́ sɔ ɛ́ hàarí lɔ́ɓán àá hóohĩ́, ɛ̀ hɔ̀ hàarí dàa hɔ ɲúuhɛ̃, ɛ́ hɔ́ iè hɔ̀pe ɲúuhɛ̃ sɔ ɛ́ ɓɛ́ dàa wóò cãa ɓɛ nìnbirìe ɛ̀ ɓé.

²⁰ Ɛ́ ɓɛ́ nìnbirìe lɛ kɛ́ lɛ ɛ́ hɔ́pe bɔ̀sũmúa bòo ɲuniɛ̀ hĩ̀ tĩ sɔ ɛ́ yí ɓé ɛ́ pɛ́wi ɛ́ yí zɛ̀ní ɓɛ́ tĩɛ̀ ɛ̀ ɓɛ̀ yí fùansí ɓɛ́ bòo lɛ ɛ́ yí sãa wénlɔ́ ǹ wɛ̀; ɓɛ̀ yí fùansí ɓɛ́ ńɲíkĩ́nìɛ ɓàanírɔ́ ǹ, ɛ̀ ɓɛ̀ lò yí fùansí hɔ́ wɛ̃̀hɛ̃ lɛ ɛ́ ɓɛ́ mɛ́ àá hɔ́ sɛ̃́ní àá hɔ́ màa àá hɔ́ hɛ̃nlɔ́ lɛ hãaniɛ àá hɔ́ sɛ̃̀nlɛ̀a àá hɔ́ dãahĩ́ ɓàanírɔ́ ǹ wɛ̀. Hɔ́rɔsí kɛ́ hɔ́ lò ɛ́ yí dɛ̀ bòo ɛ́ yá mi, ɛ̀ hɔ̀ lò yí dɛ̀ bòo ɛ́ yá ɲí, ɛ̀ hɔ̀ lò yí dɛ̀ ɛ́ yá vɛ wɛ̀.

²¹ Ɛ̀ ɓɛ̀ lò pɛ́wi ɛ́ yí fùansí ɓɛ́ nìɓénlɔ́ ǹ àá ɓɛ́ híenú ǹ àá ɓɛ́ ńdaaníkɛɓánkũǹ àá ɓɛ́ kɛ̃̀míhĩ́ ǹ wɛ̀.