Bɔ̀zɛ̃́níriè 8 - Buamu Laa

Lè núnú ɲìnlén hùuɲulán kuierɔ́

¹ Ɛ́ hɔ́ lɛ á Pi-zuú ɛ́ kuie lè núnú ɲìnlén hùuɲulán, ɛ́ hɔ́ hóohũn ɛ́ hɛ̀ yòó wɔ́ hĩ́ɔɔn ɛ́ van dɛ̃un líɛrɛ́ dɛ̀kùi tĩ́ihṹ ɓà ńmàa.

² Ɛ́ ń mɔn ɓɛ̀ mɛlɛkɛɓɛ hùuɲu lɛ wóò dìń Dɔfĩn híɛhɔ́ kɛ́ ɓɛ́ dɛ̃̀ pehɔ̀ híɛhɔ́. Ɛ́ ɓɛ́ khie ɛ́ lɛ́ hɔ́ bũà hùuɲu ɓà ǹ.

³ Ɛ́ mɛlɛkɛ wìɓuiɛ̀ dɔ̀ ɛ́ ɓɛrɛ dɛ̃̀ lè miyiɛ́ lènlén dúekéré viì kɛ́ á dàa hɔ bòo dɔ̀ lɛ tũnù tĩ cĩ̀nílán dìɛ dɔ̀ lɛ ɛ́ wɔ́ àá sɛ̃́ní mí núnú hũn. Ɛ́ ɓɛ́ khie lɛ́ hɔ́ bòo lɛ tũnù tĩ bɔ̀kùi ɔ̀ ǹ nɛ a ɛ̀ cĩ̀ní lépe sɛ̃́ní miyiɛ́ lènlén dúekéré lɛ ɛ́ wi le bɛ́záanú wànlè híɛhɔ́ lɔ̀n, ɛ̀ páa ɓɛ́ nìɛ lɛ bòo sɛ̃̀ Dɔfĩn hɛ̃nnɛ̀ lɔ̀n.

⁴ Ɛ́ hɔ́pe bòo lɛ tũnù tĩ ńɲíi àá ɓɛ́pe nìɛ lɛ bòo sɛ̃̀ Dɔfĩn hɛ̃nnɛ̀ ɛ́ wo lɔ́ ápe mɛlɛkɛ núnú hũn ɛ́ yòó hɔ́pe Dɔfĩn híɛhɔ́.

⁵ Á mɛlɛkɛ sɔ ɛ́ khie tíiniɛ hɔ̀ bòo lɛ tũnù tĩ cĩ̀nílán dìɛ àá hɔ́ dṹn lɛ ɛ́ wi lepe miyiɛ́ lènlén dúekéré lɔ̀n ɛ́ khie siɛ koosí lé sṹsùnù. Ɛ́ hɔ́ wo wɔ́ hɔ́ miikɛ hóo nɛ̀mɛ́kɛ̀a àá hóo wíríkɛà àá hóo ɲiiníkɛ̀a àá sṹsùnù zànlɔ́.

Hɔ̀ hán bũà hùiezĩ́n bòo

⁶ Ɛ́ ɓɛ́pe mɛlɛkɛɓɛ hùuɲu lɛ ɛ́ dàa hɔ bũà hùuɲu ɓɛ́ níhĩ́ hũn ɛ́ wo sɛ́sɛ́a ɓɛ́te ɛ́ ɓɛ zɔ pìɛkɛ hɔ́.

⁷ Á hán mɛlɛkɛ ɛ́ zɔn pìɛ mí bũì; ɛ́ hóo sɛ̃̀nlɛ̀a àá dṹn àá cãani lɛ kánkɛa ɓán ɛ́ tɔ̀ siɛ lè sṹsùnù lɔ̀n. Ɛ́ lé sṹsùnù ńsankɛà hĩ̀tĩ ɛ́ san-cóoní ɛ́ cɛ̃̀, ɛ̀ hɔ̀ vɛ̃̀hɛ̃ ńsankɛà hĩ̀tĩ ɛ́ san-cóoní ɛ́ cɛ̃̀, ɛ̀ hɔ̀ ńɲíitiè ɛ́ cɛ̃̀ míkùi.

⁸ Á mɛlɛkɛ ńɲuunín ɛ́ zɔn pìɛ mí bũì; ɛ́ miikɛ dìɛ dɔ̀ lɛ dɛ̃̀ kɛ̀a ie ɓúkìe dɛ̀bɛhɔ́ lɛ ɛ́ zɛ̃un ɛ́ kuerɛ siɛ hɔ̀ ɲun-bɛhɔ́ hũn, ɛ́ hɔ́pe ɲun-bɛhɔ́ ńsankɛà hĩ̀tĩ ɛ́ san-cóoní ɛ́ wɔ́ cãani.

⁹ Ɛ́ hɔ́ bɔ̀míriè lɛ ɛ́ wi hɔpe ɲun-bɛhɔ́ hũn ńsankɛ̀a hĩ̀tĩ san-cóoní ɛ́ húrun. Ɛ̀ hɔ̀ ɲumu wuò ńsankɛà hĩ̀tĩ ɛ́ san-cóoní ɛ́ cɛ̃̀.

¹⁰ Á mɛlɛkɛ ńtĩnin ɛ́ zɔn pìɛ mí bũì. Ɛ́ ńpĩ́inàwiì dɛ̀bɛhɔ́ dɔ̀ lɛ ɛ́ cĩ̀ kɛ̀a ie hɔ dṹn pɔnù bòo sí ɛ́ kuerɛ siɛ hɔ̀ vṹuhɛ̃ ńsankɛà hĩ̀tĩ san-cóoní lɔ̀n àá hɔ́ ɲun-kɛ̃hĩ́ lɔ̀n.

¹¹ Lè ńpĩ́inàwiì sɔ yèrè ɛ́ ɓɛ́ nɛ bɔ̀hɛnù. Ɛ́ hɔ́ ɲumu ńsankɛà hĩ̀tĩ san-cóoní ɛ́ ɓɛrɛ hiɛ̀ ɛ́ ɓɛ́ nìnbí-kuì lɛ ɛ́ ɲun hɔ̀ ɛ́ húrunkɛ iè hɔ̀ lɛ ɛ́ hɔ́ hiɛ̀.

¹² Á mɛlɛkɛ bìɛnɛ́lán ɛ́ zɔn pìɛ mí bũì. Ɛ́ lé wurù àá lé ńpĩ́ihṹ àá hɔ́ ńpĩ́inàwuò ńsankɛà hĩ̀tĩtĩ san-cóohɛ̃ ɛ́ hɔ́ zɔn nin fúu ɛ́ hɔ́ vĩ́iniɛ mí ńsankɛa hĩ̀tĩ san-cóohɛ̃ ńpiemu; ɛ́ lé wiɛhɔ́ ńsankɛà hĩ̀tĩ san-cóoní àá hɔ́ sṹnúhṹn ńsankɛà hĩ̀tĩ san-cóoní ɛ́ wo yí bĩní dàá ńpiemu wɛ̀.

¹³ Ɛ́ ń bĩniɛ yòó húie ɛ́ ń mɔn ɔ̀ denɓenù dɔ̀ lɛ ɛ́ yòó ɛ́ yíe khíi sɔ́nsɔ́n hɔ́ hóohũn kɛ́ á ɛ́ bie àá tɛn-bɛhɔ́ ɛ́ nɛ làa: «Mì yìi ɓén mi hɔ! Mì yìi ɓén mi hɔ! Mì yìi ɓén mi hɔ! Mìpe sṹsùnù nìɛ, pɛ̃̀hṹ lɛ kɛ́ ɓɛ́pe mɛlɛkɛɓɛ bìɛ tĩ lɛ ɛ́ kɛ́ ɛ́ ɓen zɔn pìɛkɛa ɓɛ́ bũà!»