Bɔ̀zɛ̃́níriè 7 - Buamu Laa

Dɔfĩn nìɛ lɛ ɛ́ yú hɔ́pe Dɔfĩn núnú ɲìnlɔ́ bòo

¹ Ɛ́ pehɔ̀ máahṹ, ɛ́ ń mɔn mɛlɛkɛɓɛ bìɛ nɛ́ dɔ̀ kɛ́ ɓɛ́ dɛ̃̀ lè sṹsùnù sɛhĩ́ɛ bɔ̀nbɔ̀ nɛ́ lɔ̀n. Ɓɛ̀ ɛ́ ɓaakɛa lè sṹsùnù pinpihĩ́ bɔ̀nbɔ̀ nɛ́ ɛ́ dìniɛ, bòo lɛ ɛ́ wé ɛ̀ hɔ̀ bí zè lè sṹsùnù lɔ̀n, ɛ̀ hɔ̀ lò bí zè hɔ̀ ɲun-bɛhɔ́ lɔ̀n, ɛ̀ hɔ̀ lò bí zè hɔ̀ vɛ̃̀hɛ̃ hũn wɛ̀.

² Ɛ́ ń bĩniɛ mɔn ɔ̀ mɛlɛkɛ wìɓùiɛ dɔ̀ kɛ́ á siɛ lɔ́ àá lé wurù hànlén ɛ́ yòó, kɛ́ á dàa hɔ̀ Dɔfĩn lɛ yìe wi núnú ɲìnlán dìɛ mí núnú hũn. Á zɔn bérɛ ɓɛ̀pe mɛlɛkɛɓɛ bìɛ nɛ́ ǹ, ɓɛ̀pe lɛ ɛ́ lé ɲunù ɛ́ lɛ́ nin nɛ ɓɛ yáakɛ lé sṹsùnù àá hɔ́ ɲun-bɛhɔ́. À bérɛ ɛ́ nɛ làa:

³ «Mì bí hɛ le sṹsùnù àá hɔ́ ɲun-bɛhɔ́ àá hɔ́ vɛ̃̀hɛ̃ ǹ, fúu kɛ́ yí bòo ɛ́ ké bɔ̀ lè Dɔfĩn núnú ɲìnlɔ́ piè tɔntɛriè ɓiè lɔ̀n vɔ́.»

⁴ Ɛ́ ń ɲɛ́ ɓɛ́pe nìnbirìe lɛ ɛ́ yú lépe Dɔfĩn núnú ɲìnlɔ́ ɓɛ́ ɓiè lɔ̀n ɲún: ɓɛ̀ hàarí iè nìnbirìe muasie ɓɛrɛ hùuɲu àá bɔ̀nbɔ̀ nɛ́ (144 000), lɛ ɛ́ lɔ́ ɓɛ̀pe Yizarayɛɛle dàa nìɛ ɓɛ́kùi hũn:

⁵ à Zuda dàa ɛ́ iè nìnbirìe muasie píru àá bɔ̀nbɔ̀ ɲu (12 000) ɛ́ tenu yú lépe Dɔfĩn núnú ɲìnlɔ́, à Rubɛɛnɛ dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Kaade dàa ɛ́ iè nìnbirìe muasie píru àá bɔ̀nbɔ̀ ɲu (12 000);

⁶ à Azɛɛre dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Nɛfitalii dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Manasee dàa ɛ́ iè nìnbirìe muasie píru àá bɔ̀nbɔ̀ ɲu (12 000);

⁷ à Simiɲɔn dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Levii dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Yisakaare dàa ɛ́ iè nìnbirìe muasie píru àá bɔ̀nbɔ̀ ɲu (12 000);

⁸ à Zabulɔn dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Zozɛɛfu dàa ɛ́ iè nìnbirìe muasie píru àá bɔ̀nbɔ̀ ɲu (12 000), à Bɛ̃nzamɛn dàa ɛ́ iè nìnbirìe muasie píru àá bɔ̀nbɔ̀ ɲu (12 000).

Ɓɛ̀ nìnbí-dũmu lɛ dɛ̃̀ lè bɛ́záanú wànlè híɛhɔ́ bòo

⁹ Ɛ́ hɔ́pe sí máahṹ, ɛ́ nin húi ɛ̀ lɛ iè miikɛ nìnbí-dũmu lɛ ɛ́ nìnbírɔ ɛ́ yí dɛ̀ ɛ́ yá mì ɛ́ dũń ɲún. Ɓɛ̀ hàarí iè hɔ̀ cɛ̃̀mɛ̀náa míkùi nìɛ àá hɔ́ dàa míkùi nìɛ àá hɔ́ lóoniɛ̀ míkùi nìɛ àá hɔ́ níiɓɛ̀ míkùi nìɛ. Ɓɛ̀ hàarí dɛ̃̀ lè bɛ́záanú wànlè àá ɔ́ Pi-zuú híɛhɔ́ kɛ́ ɓɛ́ zɔn hɔ̀ pɔnkɔ̀-può ɛ̀ ɓɛ̀ dàa hɔ̀ tèín ńnɛhɛ̃ ɓɛ́ níhĩ́ hũn.

¹⁰ Ɓɛ̀ hàarí ɛ́ wũamɛkɛ àá tɛn-bɛhɔ́ ɛ́ nɛ làa: «Lè fuerɛ̀ ɛ́ lé àá ké Dɔfĩn viì, Hɔ̀pe lɛ ɛ́ wi mí bɛ́záanú wànlè lɔ̀n, ɛ̀ lè lò ɛ́ lé àá ɔ́ Pi-zuú viì.»

¹¹ Ɛ́ ɓɛ́ mɛlɛkɛɓɛ ɓɛ́kùi ɛ́ dɛ̃̀ kíríkɛa lè bɛ́záanú wànlè ǹ àá ɓɛ́pe nìkĩ́ihɛ̃ àá ɓɛ́pe bìedɔ̀ bìɛ nɛ́ sɔ lɛ yìe wi ǹ. Ɓɛ̀ hàarí siɛ ɓúnkɛasí ɓɛ́ híɛhɛ̃ lɔ̀n lè sṹsùnù ɛ́ dàa ɛ́ Dɔfĩn ɛ̀ ɓàanínin,

¹² kɛ́ ɓɛ́ ɛ́ bie ɛ́ nɛ làa: «Amiina! Hɔ̀ khóonírɔ́ àá hɔ́ ɓàarɔ́ àá hɔ́ bɔ̀dũmunù àá hɔ́ bɛrikɛ dénlɔ́ àá hɔ́ sénkɛrɔ́ àá hɔ́ pànkɛ́-bɛhɔ́ àá hɔ́ pànkɛ́ ɛ́ bòo ɛ́ sɛ̃̀ kè Dɔfĩn fúu pɛ̃̀hṹ lɛ ɛ́ yá vé hũn. Amiina!»

¹³ Ɛ́ ɓɛ́pe nìkĩ́ihɛ̃ tĩ́ihṹ ádɔ̀ ɛ́ zɔn nìn dìenin ɛ́ nɛ làa: «Ɓɛ́pe nìɛ sɔ lɛ ɛ́ zɔn hɔ̀ pɔnkɔ̀-può iè ɓɛ̀ bɛ́sɔ, ɛ̀ ɓɛ̀ lɔ́ àá yí?»

¹⁴ Ɛ́ ń zɔn kɔ̃niɛ ɔ̀ ɛ́ nɛ làa: «Niǹ ɲúnsɔ, kɔ̀pe ɛ́ temu dũ hɔ.» Á wo zɔn bie lɛ́ mi ǹ nɛ làa: «Ɓɛ̀ iè ɓɛ̀lɛ ɛ́ khie àá lé miikɛ lɔ̀nbe-bɛhɔ́. Ɓɛ̀ tiɛ ɓɛ́ pɔnkɔ̀nìɛ à Pi-zuú cãani hũn ɛ́ hɔ́ wo ɛ́ ce.

¹⁵ Ɛ́ sí iè pe temu lɛ́ ɛ́ ɓɛ́ dàa ɛ́ dɛ̃̀ hɔ̀ Dɔfĩn bɛ́záanú wànlè híɛhɔ́ ɛ́ hɔ̀pe Dɔfĩn ɛ̀ ɓàanínin sṹnúhṹn àá wiɛhɔ́ pehɔ̀ zũ-bɛhɔ́ hũn. Ɛ́ hɔ́pe Dɔfĩn lɛ ɛ́ wi mí bɛ́záanú wànlè lɔ̀n ɛ́ ɓén híɛ ɓà ǹ àá mí ńtìɛrún.

¹⁶ Ɛ́ hɔ́ hĩni àá hɔ́ ɲɛ-hĩni ɛ́ wo yá bĩní ɓé ɓɛ́, ɛ̀ lè wurù ɛ́ lò yá bĩní ɲí ɓɛ́, ɛ̀ hɔ̀ sɔmu ɛ́ lò yá bĩní ɓaà ɓɛ̀ wɛ̀.

¹⁷ Iè hɔ̀ lɛ á Pi-zuú lɛ ɛ́ wi le bɛ́záanú wànlè tĩ́ihṹ ɛ́ ɓén wé peɓɛ̀ sierɔ, á wo ɓén dàá ɓɛ́ ɛ́ dàa vɛ le mɛkɛ̃nì ɲun-kɛ̃nù viì. Ɛ̀ Dɔfĩn ɛ́ ɓén sùukɛ peɓɛ̀ yìncuò míkùi ɛ́ lé peɓɛ̀ híɛhɛ̃.»