Bɔ̀zɛ̃́níriè 4 - Buamu Laa

Dɔfĩn ɓàaníninlɔ́ hɔ̀ hóohũn

¹ Ɛ́ pehɔ̀ máahṹ, ɛ́ ń bĩniɛ huie ɛ́ ń mɔn zĩínù ɲunù dɔ̀ kɛ́ lé ɛ́ hɛ́rɛ hɔ̀ hóohũn. Ɛ́ lépe hán tɛmu lɛ ɛ́ ń hṹn ɲɛ́ kɛ́ lé ɛ́ bie àá mi ɛ́ bĩniɛ zɔn bie lɛ́ mi ǹ kɛ̀a ie bũì lɛ ɛ́ ɓɛ́ ɛ́ pìɛ́ bòo sí ɛ́ nɛ làa: «Ɓen yòó hũ̀nún, nin zɛ̃́ní hɔ́ bòo lɛ ɛ́ sãawi ɛ̀ hɔ̀ wé hɔ́pe sí máahṹ ɛ̀ lɛ́ kɔ ǹ.»

² Ɛ́ mí laà hũn, ɛ́ lé Mɛkɛ̃n-Sãanu ɛ́ siɛ mɔ̀ mi ǹ. Ɛ́ hɔ́pe hóohũn, ɛ́ bɛ́záanú wànlè dɔ̀ ɛ́ wi nin, ɛ̀ lèpe bɛ́záanú wànlè sɔ ádɔ̀ ɛ́ kɛsí lɔ̀n.

³ Àpe lɛ kɛsí pelè lɔ̀n ɛ́ hɛ̀ ɛ́ ɲiiníkɛ kɛ̀a iè hɔ sɛ̃̀nlɛ̀a lɛ yaamu hie hie lɛ ɛ́ ɓɛ́ wóò ve nɛ zasipe àá saraduanɛ. Ɛ̀ lè hóo khɛ̃́nkhɔ́nú dɔ̀ lɛ ɛ́ ɲiiníkɛ kɛ̀a le sɛ̃̀nlè dɔ̀ lɛ yàamu hie hie lɛ ɛ́ ɓɛ́ wóò ve nɛ Emerɔɔde ɛ́ kíríkɛa lèpe bɛ́záanú wànlè sɔ ǹ ɛ́ khie fɔ̀.

⁴ Ɛ̀ bɛ́záanú wànlɛ̀a ɓénlé àá bɔ̀nbɔ̀ nɛ́ dɔ̀ ɛ́ kíríkɛa lèpe bɛ́záanú wànlè sɔ ǹ. Hɔ̀pe bɛ́záanú wànlɛ̀a sɔ ɛ́ nìkíihɛ̃ ɓénlé àá nìɛ ɓɛ̀ nɛ́ ɛ́ kɛsíkɛa lɔ̀n. Ɓɛ̀ ɛ́ zɔn pɔnkɔ̀-può, ɛ̀ ɓɛ̀ yìikɛa hɔ̀ sɛ̃́ní bɛ́záanú múnsénɛ̀a.

⁵ Hóo ɲiiníkɛ̀a àá hóo wíríkɛ̀a àá hóo nɛ̀mɛ́kɛ̀a ɛ́ hàarí zɔn ɛ́ lé àá lépe bɛ́záanú wànlè sɔ hũn. Ɛ̀ pelè híɛhɔ́ ɛ́ pɛ̃̀ntĩ́hĩ́ hùuɲu dɔ̀ ɛ́ cĩ̀ nin. Hɔ̀ iè hɔ̀pe Dɔfĩn Mɛkɛ̃nɛa hùuɲu.

⁶ Lèpe bɛ́záanú wànlè sɔ híɛhɔ́ ɛ́ hɔ́ bòo dɔ̀ ɛ́ wi hũn, lɛ dɛ̃̀ kɛ̀a ie ɲun-bɛhɔ́ lɛ ɛ́ ɲiiníkɛ kɛ̀a dùɓɛ̀lé bòo sí. Ɛ̀ lèpe bɛ́záanú wànlè sɔ ɛ́ ɓɛ́ bìedɔ̀ bìɛ nɛ́ lɛ yìe wi ɛ́ kíríkɛa nin ɓɛ́ tĩ́ihṹ. Peɓɛ̀ máahɛ̃ àá peɓɛ̀ híɛhɛ̃ míkùi ɛ́ tú àá yìe.

⁷ À hán wìe ɛ́ lɔ́ɓán àá zankɛ́wòohṹ, à ńɲuunín ɛ́ dɛ̃̀ kɛ̀a ie nɛ̀bɛ́-zuú, à ńtĩinín híɛhɔ́ ɛ́ dɛ̃̀ kɛ̀a nìnbírɔ híɛhɔ́, à biɛ̀nɛ́lán ɛ́ lɔ́ɓán àá denɓenù lɛ ɛ́ yíe khíi.

⁸ Ɓɛ̀pe bìedɔ̀ bìɛ nɛ́ sɔ lɛ yìe wi ɛ́ hɔ́rɔ ɛ́ wóò dàá hɔ́ ńmáa hùiezĩ́, ɛ̀ hɔ̀pe ńmáa sɔ hũn àá pehɔ̀ máahṹ míkùi ɛ́ tú àá yìe. Ɓɛ̀ ɛ́ bie fúu sṹnúhṹn àá wiɛhɔ́ ɛ́ nɛ làa: Ɲunsɔ Dɔfĩn pànkɛ́ míkùi ɓàasɔ, Kɔ́ hɛ̀ ɛ́ ce, Kɔ́ hɛ̀ ɛ́ ce, Kɔ́ hɛ̀ ɛ́ ce, Kɔ́ hàarí wi, ɛ̀ Kɔ̀ wi, ɛ̀ Kɔ̀ lò vaá-ɓen.

⁹ Ɛ́ pɛ̃̀hṹ yée pɛ̃̀hṹ lɛ kɛ́ ɓɛ́pe bìe bìɛ nɛ́ sɔ ɛ́ ɓen ɛ́ ɔ̀pe lɛ ɛ́ wi le bɛ́záanú wànlè lɔ̀n ɛ̀ ɓàanínin, kɛ́ ɓɛ́ ɛ́ ɔ̀ khóoníkɛ kɛ́ ɓɛ́ ɛ́ piè bɛrikɛ ɛ̀ dé, àpe lɛ yìe wi fúu,

¹⁰ ɛ̀ ɓɛ̀pe nìkĩ́ihɛ̃ ɓénlé àá nìɛ ɓɛ̀ nɛ́ ɛ́ wóò síɛ hùensíkɛ ape lɛ kɛsí lé bɛ́záanú wànlè lɔ̀n híɛhɔ́, ɛ̀ ɓɛ̀ ɓàaní-ɛ̀ ǹ, àpe lɛ yìe wi fúu pɛ̃̀hṹ lɛ yá vé hũn. Ɓɛ̀ wóò yànkɛ ɓɛ́ bɛ́záanú múnsénɛ̀a ɛ̀ síɛ bìsí lépe bɛ́záanú wànlè híɛhɔ́ kɛ́ ɓɛ́ ɛ́ bie ɛ́ nɛ làa:

¹¹ Kè Ɲunsɔ Dɔfin, hɔ̀ pànkɛ́ míkùi ɛ́ bòo sɛ̃̀ kɔ ǹ, Ɛ́ kɔ́ fɔ́ɓán àá hɔ́ ɓàarɔ́, àá hɔ́ khóonírɔ́, Iè hɔ̀ lɛ ɛ́ kɔ́pe ɛ́ te hɔ bòo míkùi ɛ́ mɛ́, Kɔ̀pe ɛ́ temu wɛniɛ nɛ hɔ kań ɛ́ hɔ́ dàa ɛ́ mɛ́ ɛ́ wi yán.