Bɔ̀zɛ̃́níriè 22 - Buamu Laa

¹ Á mɛlɛkɛ ɛ́ khie zɛ̃́niɛ lè vṹn dɔ̀ mi ǹ; lèpe vṹn sɔ ɲumu ɛ́ wóò lɛ́ lé mɛkɛ̃nì, ɛ̀ hɔ̀pe ɲumu sɔ ɛ́ hɛ̀ ɛ́ ɲiiníkɛ kɛ̀a ie dùɓɛ̀lé bòo sí, ɛ̀ hɔ̀ zɔn vĩ̀ ɛ̀ lé àá Dɔfĩn àá ɔ́ Pi-zuú bɛ́záanú wànlè vìi.

² Ɛ̀ lèpe lóo fɔ́nú tĩ́ihṹ lɛ wi lepe vṹn sɔ sɛhĩ́ɛ bɔ̀nbɔ̀ ɲu tĩ́ihṹ, ɛ́ lé vɛ̃̀hṹ lɛ ɛ́ wóò lɛ́ lé mɛkɛ̃nì ɛ́ zɔn wi hũn. Lè wóò hɛ yìe pírú àá bɔ̀nbɔ̀ ɲu lɔ́lɔ́-kùi hũn, ńpĩ́n-kùi yée ńpĩ́n-kùi, ɛ̀ lè wóò hɛ mí biè. Ɛ̀ pelè ɲɛkɛ̃̀a lɛ ɛ́ wóò wiɛní hɔ́ dàa míkùi nìɛ.

³ Ɛ́ hɛ̀rí dánkɛ́nín dɔ̀ ɛ́ yá ɓén bĩní ɛ́ wé yán wɛ̀. Dɔfĩn àá ɔ́pe Pi-zuú bɛ́záanú wànlè ɛ́ ɓén kań hɔ́pe lóo hũn, ɛ̀ Dɔfĩn tɔntɛ́riè ɛ́ wóo ɓén ɓàaní hɔ́pe Dɔfĩn ǹ.

⁴ Ɓɛ̀ wóo ɓén mi piè híɛhɔ́, ɛ̀ piè yèrè ɛ́ ɓén wĩ́ dìń peɓɛ̀ ɓiè lɔ̀n.

⁵ Ɛ́ sṹnúhṹn ɛ́ wo yá ɓén bĩní ɛ́ wé wɛ̀; ɛ̀ peɓɛ̀ mɛ̀kóo ɛ́ wo yá ɓén kań pɛ̃̀ntĩ́ní ńpiemu àá wurù ńpiemu ǹ wɛ̀; iè hɔ̀ lɛ ɛ́ Ɲunsɔ Dɔfĩn ɛ́ ɓén ciení ɓà ǹ. Ɛ́ ɓɛ́ wo ɛ́ ɓén dí lé bɛ́záanú fúu pɛ̃̀hṹ lɛ ɛ́ yá vé hũn.

Yiezu Kirisa khũ̀á ɓenlɔ́ bòo

⁶ Ápe mɛlɛkɛ ɛ́ zɔn bie lɛ́ mi ǹ ɛ́ nɛ làa: «Hɔ̀pe biehĩ́ sɔ lɛ ɛ́ iè bòo lɛ bɔn, ɛ́ hɔ́ fɔ́ɓán ɛ̀ hɔ̀ ɛ̀ dɛsĩ̀nin. Ɲunsɔ Dɔfĩn lɛ ɛ́ te mí Mɛkɛ̃ni ɛ́ wóò lɛ́ mí bɔ̀háaníriè ǹ, ɛ́ tɔrɛ mí mɛlɛkɛ nɛ a ɓen zɛ̃́ní hɔ́ bòo lɛ ɛ́ sãawi ɛ̀ hɔ̀ wé hũ̀nún àá bìcínbóo ɛ̀ lɛ́ mí tɔntɛ́riè ǹ.»

⁷ Yiezu ɛ́ nɛ làa: «Mì húi, ń vaá-ɓen hũ̀nún àá bìcínbóo. Á nìnbírɔ lɛ ɛ́ ɓɛ́ɓɛ́a hɔ̀pe Dɔfĩn bòo háanírɔ́ biehĩ́ lɛ ɛ́ wɛ̃́ wi lepe vɛ̃hṹ sɔ lɛ hũn, ɛ́ ɲún ɛ́ tĩ.»

⁸ Hɔ̀ iè ǹpe Zãn ɛ́ te hɔpe bòo sɔ lɛ ɛ́ ɲɛ́ ɛ̀ ǹ lò mɔn hɔ̀. Ɛ́ hɔlɛ ɛ́ ń ɲɛ́ hɔ́ ɛ̀ ǹ lò mɔn hɔ̀, ɛ́ ń kuerɛ siɛ àpe mɛlɛkɛ lɛ ɛ́ te hɔ ɛ́ zɛ̃́ní ɛ̀ lɛ́ mi ǹ híɛhɔ́ ɛ́ nin síɛ ɓàaní-ɛ̀ ǹ.

⁹ Kɛ́ á den zɔn bie lɛ́ mi ǹ ɛ́ nɛ làa: «Bí wé hɔ́pe sí wɛ̀. Ǹpe ɛ́ ɓiɛ̀ iè Dɔfĩn tɔntɛ́ kɛ̀a kɔpe àá mì zɛ̀ɓɛ̀ Dɔfĩn bɔ̀háaníriè; àá ɓɛpe lɛ ɛ́ ɓɛ́ɓɛa lèpe vɛ̃hṹ sɔ lɛ biehĩ́ ǹ ɓɛ́kùi. Kɛ́ Dɔfĩn iè pe ɛ́ kɔ́ wóo hùensí híɛhɔ́ ɛ̀ ɓàanínin.»

¹⁰ Á bĩniɛ zɔn bie lɛ́ mi ǹ ɛ́ nɛ làa: «Bí tànkɔ̀ní hɔ́pe biehĩ́ lɛ ɛ́ Dɔfĩn zɛ̃́niɛ lɛ́ kɔ̀ ǹ lèpe vɛ̃hṹ sɔ lɛ hũn wɛ̀; iè hɔ̀ lɛ ɛ́ lé pɛ̃̀hṹ lɛ ɛ́ hɔ́pe bòo sɔ sí mii wé hũn ɛ́ wo tan ɓɛrɛ dɛ̃un.

¹¹ Ɛ́ nɛ alɛ ɛ́ ie nìkùanù ɛ̀ tán mí fɔnù à wé mí nìkùámu bòo, àlɛ ɛ́ lɔn ɛ̀ tán mí fɔnù à wookɛ liení míte, àlɛ ɛ́ cã̀aní ɛ̀ ɓiɛ̀ bĩní wookɛ ɛ̀ wé hɔ́ cã̀anírɔ́ bòo, àlɛ ɛ́ ce ɛ̀ ɓiɛ̀ bĩní wookɛ ɛ̀ kań hɔ́ ceremú hũn.»

¹² Ɛ́ Yiezu ɛ́ bĩniɛ zɔn bie ɛ́ nɛ làa: «Ɛ́ mí húi, lɛ iè ǹpe ɛ́ wo vaá-ɓen hũ̀nún àá bìcínbóo. Ń dàa hɔ bòo lɛ ɛ́ nin dàá sàaní ɓɛ́ nìnbirìe ɛ́ dàa vaá-ɓen, ɛ́ nin ɓen sàaní hɔ́rɔ ɛ̀ ɓáaníɓán àá bòo lɛ á wɔ́.

¹³ Ǹpe ɛ́ temu iè ɔ̀pe Alifa àá ɔ́ Omeka, àpe hándí àá ɔ́ mɛ́ndí, hɔ̀ bòo míkùi fìi ɓánlén àá pehɔ̀ vénlén.»

¹⁴ Ɛ́ ɓɛ́pe nìnbirìe lɛ ɛ́ wóò tiɛ ɓɛ́ pɔnkɔ̀nìɛ ɛ̀ hɔ̀ ce ɛ́ ɲúuhɛ̃ ɛ́ tĩ. Dɔfĩn ɛ́ ɓén lɛ́ lé ɲunù ɓà ǹ nɛ ɓɛ ɛ̀ lɛ̀ lè vɛ̃̀hṹ lɛ ɛ́ wóò lɛ́ lé mɛkɛ̃nì biè, ɛ̀ ɓɛ̀ ɛ̀ zɔ le lóo hũn àá lépe lóo zĩínú ɲunù.

¹⁵ Kɛ́ ɓɛ́ ɓen kɛ́ ɓɛ́ bɔhĩ́ àá ɓɛ́ híe àá ɓɛ́ ńdaaníkɛɓánkũǹ nìɛ àá ɓɛ́ nìɓériè àá ɓɛ́ wɛ̃̀hɛ̃ ɓàasiè àá ɓɛ́pe ɓɔ́ɓúukɛriè ɓɛ́kùi lɛ ɛ́ wɛ hɔ ɓúo bòo wénlɔ́, ɛ̀ ɓɛ̀pe ɓɛ́kùi ɛ́ ɓén kén lépe lóo máahṹ.

¹⁶ «Ǹpe Yiezu ɛ́ te niǹ mɛlɛkɛ ɛ́ tɔrɛ nɛ a ɓen khɛ́ hɔ́pe sí míkùi ɛ̀ lɛ́ miɛ ǹ hɔ̀ Dɔfĩn zĩhĩ́ɛ hũn. Ǹpe ɛ́ iè ɔ̀ bɛ́zuú Daviide ɓà dàa hũn zuú, ǹpe ɛ́ iè lè ɲɛǹbín ńpĩ́inàwiì lɛ ɛ́ ɲiiníkɛ.»

¹⁷ Ɛ́ lé Mɛkɛ̃n-Sãanu àá ɔ́ hɛ́fĩn ɛ́ zɔn bie ɛ́ nɛ làa: «Ɓen!» Ɛ́ nɛ alɛ ɛ́ ɲɛ́ hɔ́pe sí ɛ̀ ɓiɛ̀ zɔ bie nɛ làa: «Ɓen!» Nɛ alɛ ɛ́ hɔ́ ɲɛhĩni ɛ́ ɓé ɛ̀ ɓen; nɛ alɛ ɛ́ hɔ̀ ɲumu lɛ ɛ́ wóò lɛ́ lé mɛkɛ̃nì ɛ̀ cɛ̀ ɛ̀ ɓen fé hɔ́ kã́amáa.

Víeníkɛlán tɛmu

¹⁸ Ɛ́ ɓɛ́ nìnbirìe ɓɛ́kùi lɛ ɛ́ hɔ̀pe biehĩ́ lɛ ɛ́ Dɔfĩn zɛ̃́niɛ lèpe vɛ̃hṹ sɔ lɛ hũn ɛ̀ ɲí, ɛ́ ńpe Zãn ɛ́ zeǹ lɔ̀n ɛ̀ ɲì ɛ́ nɛ làa: Kɛ́ nìnbírɔ dɔ̀ ɛ́ yòó sĩiniɛ bòo dɔ̀ hɔ̀pe biehĩ́ sɔ lɔ̀n, ɛ́ Dɔfĩn ɛ́ ɓén lɛ́ ɛ́ hɔ́pe bɔ̀sũmúa bòo lɛ bòo bie lèpe vɛ̃hṹ sɔ lɛ hũn ɛ́ yí ɓàasɔ.

¹⁹ Ɛ̀ kɛ́ nìnbírɔ dɔ̀ fɛ́rɛ bòo dɔ̀ ɛ́ lɔ́ hɔ́pe biehĩ́ sɔ lɛ ɲunù, hɔ̀pe lɛ ɛ́ Dɔfĩn ɛ́ zɛ̃́niɛ lèpe vɛ̃hṹ sɔ lɛ hũn, ɛ́ Dɔfĩn ɛ́ ɓiɛ̀ ɛ́ vúa ɓàasɔ hɔ́n vɛ̃̀hṹ biè lɛ ɛ́ wóò lɛ́ lé mɛkɛ̃nì, ɛ̀ ɓàasɔ ɛ́ lò yá zɔ lepe Dɔfĩn lóo, hɔ̀pe sí míkuì lɛ bòo bie lèpe vɛ̃hṹ sɔ lɛ hũn.

²⁰ Ápe lɛ temu ɛ́ zɛ̃́ní kɛ́ hɔ́pe bòo sɔ sí ɛ́ bɔn ɛ́ zɔn bie ɛ́ nɛ làa: «Ũun, ń vaá-ɓen hũ̀nún àá bìcínbóo!» Amiina, nɛ hɔ wé kɛ̀amu! Ɓen, Ɲunsɔ Yiezu!

²¹ Nɛ Ɲunsɔ Yiezu ɛ̀ wé mí hiì àá mípe mìkùi.