Bɔ̀zɛ̃́níriè 20 - Buamu Laa

Bɛ̀ ńdɛsĩ̀rìe bɛ́záanú dínlɔ́ fúu lɔ́líe khĩɛ́-pírú hũn bòo

¹ Ɛ́ ń wo khie mɔn ɔ̀ mɛlɛkɛ dɔ̀ kɛ́ á yòó ɛ́ lɔ́ àá hɔ́ hóohũn ɛ́ dàa ɛ́ síɛ kɛ́ á dàanin le kṹ-bɛhɔ́ lɛ fiì mí hĩì àá lé zɔ̀kɔ̀zɔ́kɔ́ dɛ̀bɛhɔ́ dɔ̀ mí núnú hũn.

² Á ɓɛrɛ ɓaa ɔ̀pe wìlaàsɔ wìsũmúi lɛ iè ɔ̀pe hóonú wìkĩ́i, àpe ɲɛ-ɓúukɛ, àpe Sitũanɛ ɛ́ can àá lé zɔ̀kɔ̀zɔ́kɔ́ ɛ́ mii dĩ̀ní fúu lɔ́líe khĩɛ́-pírú (1 000).

³ Á wo khie van tɛ́-á ɛ́ dɔ́ lépe kṹ-bɛhɔ́ lɛ fiì mí hũn à khie pɔn pelè ɲunù piè ɲún hũn, ɛ́ bɔ̀ lè núnú ɲìnlén pelè lɔ̀n, bòo lɛ ɛ́ wé à bí bĩní yí ɓɛ́ cɛ̃̀mɛ̀náa nìɛ ɛ̀ khɛ̃̀níkɛ vĩ́iní fúu ɛ̀ hɔ̀pe lɔ́líe khĩɛ́-pírú ɲunù ɛ̀ vɛ tí. Ɛ́ pehɔ̀ máahṹ à sãawi à fuen ɛ̀ fùansínin pɛ̃̀hṹ dìkíndíɛ hũn.

⁴ Ɛ́ ń wo mɔn hɔ́ bɛ́záahĩ́ wànlɛ̀a dɔ̀: ɛ̀ ɓɛ̀pe nìɛ lɛ ɛ́ kɛsíkɛ hɔ̀ lɔ̀n ɛ́ Dɔfĩn ɛ́ lɛ́ lé ɲunù nin nɛ ɓɛ dàá lè ɓɛ̀ nìnbirìe lìe. Ɛ̀ ǹ lò bĩniɛ mɔn ɓɛ̀pe nìɛ lɛ ɛ́ ɓɛ́ hàarí ɓɔ́ bɔhĩ́, hɔ̀ bɔ̀berà lɛ ɛ́ peɓɛ̀ bɔ̀werà hàarí ɛ́ zɛ̃́ní-ɛ Yiezu bòohũn àá lé Dɔfĩn bienù bòohũn. Ɓɛ̀ hàarí ɛ́ yí tɛ̀ ɛ̀ ɓàaní-ɛ pe wìlaàsɔ wìsũmúi ǹ àá lépe wɔ̃̀hṹ lɛ ɛ́ ɓɛ́ mɛ́ ɛ́ lé lɔ́ɓán àá ɔ́, ɛ̀ ɓɛ̀ lò hàarí ɛ́ yí yí é pe wìlàasɔ bɔ̀zɛ̃́níriè ɓɛ́ ɓiè lɔ̀n tàá ɓɛ́ níhĩ́ lɔ̀n wɛ̀. Ɛ́ ɓɛ́ wo khũ̀a ɛ́ wi le mɛkɛ̃nì hũn ɛ́ ɓɛ́ ɛ̀ dí lé bɛ́záanú àá ɔ́ Kirisa fúu lɔ́líe khĩɛ́-pírú hũn.

⁵ Ɛ́ sí wo iè hɔ̀ hán nìhiè vìerɔ́. Ɛ̀ ɓɛ̀pe nìhiè lɛ kɛ́ ɛ́ pe yí khũ̀á wé ɓɛ́ mɛkɛ̃nì hũn, fúu kɛ́ yí bòo ɛ́ hɔ́pe lɔ́líe khĩɛ́-pírú (1 000) sɔ ɛ́ ɲunù van ɛ́ tú.

⁶ Ɛ́ ɓɛ́pe nìnbirìe lɛ ɛ́ ɓɛ ɛ̀ yí vìé hɔ́pe hán vìerɔ́ sɔ hũn ɛ́ pe ɲúuhɛ̃ ɛ́ tĩ! Peɓɛ̀ bòo ɛ́ sɛ̃̀ Dɔfĩn, ɛ́ hɔ́ ńɲuunín húmú ɛ́ wo yí dàa pànkɛ́ peɓɛ̀ lɔ̀n wɛ̀; ɛ́ ɓɛ́ wo ɓén wé Dɔfĩn àá ɔ́ Kirisa khɛ̃́ndàariè, ɛ̀ ɓɛ̀ ɛ́ dí lé bɛ́záanú àá ɔ́pe Kirisa fúu lɔ́líe khĩɛ́-pírú (1 000) hũn.

Sĩtũanɛ pànkɛ́ vénlɔ́ bòo

⁷ Ɛ́ pɛ̃̀hṹ lɛ kɛ́ hɔ́pe lɔ́líe khĩɛ́-pírú sɔ ɛ́ ɓen van khie vɔ́, á Sitũanɛ ɛ́ ɓɛ́ ɛ́ leń lé kɛ̀sí hũn ɛ́ fùansí nin,

⁸ á wo ɛ́ khíi vɛ́ khɛ̃̀níkɛ hɔ́pe dàa míkùi nìɛ lɛ ɛ́ wi lepe sṹsùnù míkùi lɔ̀n, hɔ́pe lɛ ɛ́ ɓɛ́ wóò ve nɛ Kɔɔke àá Makɔɔke. Á wo ɓén ve ɓɛ ɛ́ ɓen kóo ɓánlɔ̀n ɓɛ́ ɛ́ dàá tɛ́ hɔ́ hĩɛ̀. Peɓɛ̀ buòrɔ́ ɛ́ ɓén dìń kɛ̀a ie hɔ ɲun-bɛhɔ́ ɲunù hã̀anì bòo sí.

⁹ Ɛ́ ɓɛ́ wo khie saakɛa ɛ́ tú lé sṹsùnù míkùi, ɛ́ van kíríkɛa ɓɛ̀ nìnbirìe lɛ bòo sɛ̃̀ Dɔfĩn àá hɔ́pe lóo lɛ ɛ́ hɔ́pe Dɔfĩn ɛ́ wɛ ǹ. Kɛ́ dṹn dɔ̀ ɛ́ den yòó lɔ́ hɔ́ hóohũn ɛ́ siɛ ɛ́ cĩ̀niɛ ɓɛ̀ ɓɔ́ ɓɛ́kùi.

¹⁰ Á Sitũanɛ lɛ ɛ́ hṹn te ɓɛ ɛ́ khɛ̃̀níkɛ ɛ́ ɓɛ́ ɓaa ɛ́ khie van tɛ́ dɔ́ hɔ́ dṹn-bɛhɔ́ lɛ ɛ́ hɔ́ cìrìbí ɛ́ wi hũn, lèpe viì lɛ á wìlaàsɔ àá ɔ́pe ɓúo bɔ̀háanírɔ ɛ́ zɔn wi hũn. Ɛ́ peɓɛ̀ lɔ̀n ɛ́ hɛ̀ ɓén be sṹnúhṹn àá wiɛhɔ́ fúu pɛ̃̀hṹ lɛ ɛ́ yá vé hũn.

Hɔ̀ máahṹ lɔ̀n lìe lènlɔ́ bòo

¹¹ Ɛ́ ń wo mɔn lè bɛ́záanú wànlè dɛ̀bɛhɔ́ dɛ̀puiè dɔ̀ àá ɔ́pe lɛ ɛ́ kɛsí pelè lɔ̀n. Ɛ́ lé sṹsùnù àá lé hóohũn ɛ́ vṹnun lɔ́ piè híɛhɔ́, ɛ́ nìnbírɔ dɔ̀ ɛ́ wo yí bĩní mi hɔ wɛ̀.

¹² Ɛ́ ń wo mɔn ɓɛ̀ nìnbirìe lɛ hṹn húrunkɛ, ɓɛ̀ nìnbí-bɛ̃hɛ̃ àá ɓɛ́ nìnbí-cíini kɛ́ ɓɛ́ dɛ̃̀ lè bɛ́záanú wànlè híɛhɔ́. Ɛ̀ hɔ̀ vɛ̃hɛ̃ dɔ̀ ɛ́ hánkɛa, ɛ̀ lè vɛ̃hṹ dɛ̀ɓuiɛ̀ dɔ̀ ɛ́ ɓiɛ̀ ɛ́ khie hɛ́rɛ, lèpe ɛ́ iè lè mɛkɛ̃nì vɛ̃hṹ. Ɛ́ ɓɛ́pe hṹn húrun lìe ɛ́ ɓɛ́ lɔ̀ ɛ́ ɓáaniɛ ɓán àá bòo lɛ ɛ́ ɓɛ́ wɔ́, kɛ̀a bòo lɛ ɛ́ hɔ́ dàa ɛ́ wɛ̃́ lépé vɛ̃hɛ̃ sɔ hũn.

¹³ Ɛ́ hɔ́ ɲun-bɛhɔ́ ɛ́ lɛ́ ɓɛ́ nìhiè lɛ ɛ́ hṹn wi pehɔ̀ hũn; ɛ̀ hɔ̀ húmú àá hɔ́ húmú lóo ɛ́ ɓiɛ̀ lɛ́ ɓɛ́ nìhiè lɛ hṹn wi ɓɛ́ hũn. Ɛ́ ɓɛ́pe ɓɛ́kùi lìe ɛ́ lɔ̀ ɛ́ ɓáaniɛ ɓán àá bòo lɛ ɛ́ hɔ́rɔ wɔ́.

¹⁴ Ɛ́ hɔ́ húmú àá hɔ́ húmú lóo ɛ́ ɓɛ́ khuie táa koo hɔ̀ dṹn-bɛhɔ́ hũn. Hɔ̀pe dṹn-bɛhɔ́ sɔ ɛ́ temu iè hɔ̀pe ńɲuunín húmú.

¹⁵ Ɛ́ nìnbírɔ yée nìnbírɔ lɛ yèrè ɛ́ yí wĩ́ lépe mɛkɛ̃nì vɛ̃hṹ hũn ɛ́ ɓɛ́ tɛ́ dɔ́ hɔ́pe dṹn-bɛhɔ́ hũn.