Bɔ̀zɛ̃́níriè 19 - Buamu Laa

Ɓɛ̀ nìnbí-dũmu lɛ ɛ́ Dɔfĩn ɛ̀ ɓàanínin hɔ̀ hóohũn bòo

¹ Ɛ́ pehɔ̀ máahṹ, ɛ́ ń bĩniɛ ɲɛ́ tɛmu dɔ̀ hɔ̀ hóohũn kɛ́ lé ɛ́ tɛ̀ kɛ̀a ie miikɛ nìnbí-dũmu tɛmu ɛ́ bie ɛ́ nɛ làa: «Aleluya! Nɛ Dɔfĩn yèrè ɓàaní! Lè fuerɛ̀ àá hɔ́ ɓàarɔ́ àá hɔ́ pànkɛ́ míkùi ɛ́ bòo sɛ̃̀ kè Dɔfĩn!

² Iè hɔ̀ lɛ ɛ́ Hɔ́ wóò lè hɔ̀ lìe àá mí híɛhɔ́ hɔ̀ bɔ̀berà hũn. Ɛ́ Hɔ́ wo lɔ̀ àpe hɛ̃́-bɛhɔ́ lɛ ɛ́ wóò yìɛní míte lìe, àpe lɛ ɛ́ hṹn lè sṹsùnù ɛ̀ yáakɛ àá mí ńdaaníkɛɓánkũǹ bòo. Ɛ́ Dɔfĩn ɛ́ wo dìe mí tɔntɛ́riè lɛ á koosí cãani bòo àá ɔ́ ɛ́ dàa dù peɓɛ̀ yúà.»

³ Ɛ́ ɓɛ́ bĩniɛ zɔn bie ɛ́ nɛ làa: «Aleluya! Nɛ Dɔfĩn yèrè ɓàaní! Lèpe lɔ́-bɛhɔ́ sɔ lɛ cɛ̃̀ ńɲíi ɛ́ hĩ́ní ɛ̀ yòó fúu pɛ̃̀hṹ lɛ ɛ́ yá vé hũn!»

⁴ Ɛ́ ɓɛ́ nìkĩ́ihɛ̃ ɓénlé àá nìɛ ɓɛ̀ nɛ́ àá ɓɛ́pe bìedɔ̀ bìɛ nɛ́ lɛ yìe wi ɛ́ siɛ lúkɛsí ɓɛ́ nunkɛ́yìe lɔ̀n ɛ̀ ɓɛ̀ ɛ́ Dɔfĩn lɛ ɛ́ kɛsí mí bɛ́záanú wànlè lɔ̀n ɛ̀ ɓàanínin kɛ́ ɓɛ́ bie ɛ́ nɛ làa: «Amiina! Aleluya!»

À Pi-zuú yaamu sɛ́rí bòo

⁵ Ɛ́ tɛmu dɔ̀ ɛ́ zɔn tɛ̀ ɛ́ lɔ́ àá lé bɛ́záanú wànlè viì ɛ́ nɛ làa: «Mì ɓàaní ké Dɔfĩn, mìpe piè tɔntɛ́riè mìkùi, mìpe lɛ ɛ́ Hɔ̀ zán, mìpe nìnbí-cíini àá mípe nìnbí-bɛ̃hɛ̃!»

⁶ Ɛ́ ń bĩniɛ ɲɛ́ lé tɛmu dɔ̀ lɛ ɛ́ kɛ kɛ̀a ie nìnbí-dũmu tɛmu, ɛ̀ lè hɛ̀ ɛ́ tɛ̀ kɛ̀a ie ɲun-bɛhɔ́ lɛ ɛ́ cáa tɛmu, kɛ̀a ie miikɛ hóo nɛ̀mɛ́kɛà tɛmu. Ɛ̀ lè wo ɛ́ bie ɛ́ nɛ làa: «Aleluya! Nɛ Dɔfĩn yèrè ɓàaní! Kè Ɲunsɔ Dɔfĩn pànkɛ́ bɛhɔ́ ɓàasɔ ɛ́ mí bɛ́záanú ɛ̀ dí.

⁷ Ɛ́ mí nɛ ke wɛní kéte, Ɛ̀ kè kań lé tĩwiɛ̀ dɛ̀bɛhɔ́ hũn, Ɛ̀ kè lɛ́ hɔ́ ɓàarɔ́ Hɔ̀ ǹ, Iè hɔ̀ lɛ á Pi-zuú yaamu sɛ́rí ɛ́ ɓɛrɛ dɛ̃un, Ɛ́ ɓà hṹnu ɛ́ wo ɛ́ sɛ́sɛ́a míte vɔ́.

⁸ Ɛ̀ ɓɛ̀ lɛ́ lé pɔnkɔ̀rɔ́ dɔ̀ lɛ ɛ́ ɲiiníkɛ ɛ̀ lè lò ɛ́ ce ɔ̀ ǹ, á ɛ́ zɔn.» Lèpe pɔnkɔ̀rɔ́ sɔ ɛ́ iè ɓɛ̀ nìnbirìe lɛ bòo sɛ̃̀ Dɔfĩn bɔ̀tente lɛ ɛ́ ɓɛ́ ɛ́ wɔ́ bòo ɛ́ lé ɛ́ zɛ̃́ní.

⁹ Á mɛlɛkɛ ɛ́ wo zɔn bie ɛ́ lɛ́ mi ǹ ɛ́ nɛ làa: «Síɛ wĩ́ ɛ̀ bie nɛ làa: Ɓɛ̀lɛ ɛ́ ɓɛ́ vɔn ɔ̀ Pi-zuú yaamu sɛ́rí díe dínlén ɛ́ ɲúuhɛ̃ ɛ́ tĩ.» À bĩniɛ zɔn ɛ́ bie sĩiniɛ ɛ́ nɛ làa: «Hɔ̀pe lɛ ɛ́ hɛ̀ iè pe Dɔfĩn biehĩ́ àá bɔ̀bín.»

¹⁰ Ɛ́ ń wo kuerɛ síɛ piè híɛhɔ́ ɛ́ nín síɛ ɓàaní-ɛ̀ ǹ; kɛ́ á den zɔn bie lɛ́ mi ǹ ɛ́ nɛ làa: «Ɓaà kɔ̀te ɛ̀ kɔ̀ bí wé hɔ́ wɛ̀. Ǹpe ɛ́ iè mì ńkɔnù lɛ ɛ́ Dɔfĩn tɔnlɔ́ ɛ̀ tɛ́ kɛ̀a kɔpe àá mì zɛ̀ɓɛ̀ lɛ ɛ́ ɓɛ́ɓɛa Yiezu bòo lɛ á zɛ̃́niɛ ɛ́ lɛ́ kiè ǹ. Kɛ́ Dɔfĩn iè pe ɛ́ kɔ́ wóò huensí híɛhɔ́ ɛ̀ ɓàanínin.» Lèpe bɔ̀berà bienù lɛ á Yiezu ɛ́ zɛ̃́niɛ iè pe ɛ́ ɓɛ́ Dɔfĩn bɔ̀háaníriè biehĩ́ ɛ́ wóò zɔ lé hũn.

Àlɛ ɛ́ yòo ɔ̀ záatiɛ̀ wì-puiè bòo

¹¹ Ɛ́ ń wo mɔn lè hóohũn kɛ́ lé hɛ́rɛ, ɛ́ záatiɛ̀ wì-puiè dɔ̀ ɛ́ ɓen lɔ́ dɛ̃̀. À nìnbírɔ lɛ ɛ́ yòo ɔ̀ ɛ́ yèrè «Cãànírɔ́ àá Bɔ̀berà»; à wóò lè hɔ̀ lìe, à tɛ́ hɔ́ hĩɛ̀ àá mí híɛhɔ́.

¹² Piè yìe ɛ́ dɛ̃̀ kɛ̀a ie dṹn pɔnù, ɛ̀ piè ɲún ɛ́ hɔ́ bɛ́záanú múnsénɛ̀a bɔ̀kùi dɔ̀ ɛ́ wi lɔ̀n. Ɛ̀ yèrè dɔ̀ ɛ́ wɛ̃́ wi piè lɔ̀n lɛ ɛ́ hɛ̀rí nìnbírɔ dɔ̀ ɛ́ yí dũ kɛ́ ápe mí dòonún ɛ́ ɓen bòo mí.

¹³ À ɛ́ zɔn lè mùakú dɔ̀ lɛ líiniɛ hɔ̀ cãani hũn. Ɛ̀ piè yèrè ɛ́ ɓɛ́ nɛ «Dɔfĩn Bienù».

¹⁴ Ɛ́ ɓɛ́ hóohũn hĩtɛ́riè ɛ́ bɔ̀ piè máahṹ, ɓɛ̀ yòo ɓɛ̀ záataà bìpuò ɛ̀ ɓɛ̀ zɔn hɔ̀ pɔnkɔ̀nìɛ bɔ̀può lɛ sãa sãa ɛ̀ hɔ̀ lò ɛ́ ce.

¹⁵ Ɛ́ khɛ̃́n-tɔ́nú dɔ̀ lɛ ɲiɛ̀ wi ɛ́ zɔn ɛ́ lé àá piè ɲunù ɛ́ mii dàá nà hɔ dàa míkùi nìɛ. À ɓén sie ɓɛ àá hɛ̃nlɔ́ lànlè, à ɛ́ fɔ̀n ɓɛ́ kɛ̀a ie hɔ divɛ̃n ńɲiɛ̀ fɔ̀nlɔ́ bòo sí, Dɔfĩn pànkɛ́ míkùi ɓàasɔ tĩcĩ̀nín ńɲiɛ̀ fɔ̀nlén kṹ-bɛhɔ́ hũn.

¹⁶ Ɛ̀ piè mùakú lɔ̀n àá piè bunbuì lɔ̀n ɛ́ lé yèrè dɔ̀ ɛ́ wɛ̃́ wi nin ɛ́ nɛ làa: «Bɛ́zɛ̀ɓɛ̀ peɓɛ̀ Bɛ́zuú àá ɲunhɛ̃siè peɓɛ̀ Ɲunsɔ.»

¹⁷ Ɛ́ ń bĩniɛ mɔn ɔ̀ mɛlɛkɛ dɔ̀ kɛ́ á dɛ̃̀ lè wurù hũn. À zɔn bérɛ àá tɛn-bɛhɔ́ ɛ́ lɛ́ ɓɛ́ ńɲiizàani lɛ ɛ́ wóò yòó vɛ yíe khíi sɔ́nsɔ́n hɔ́ hóohũn ɓɛ́kùi ɛ́ nɛ làa: «Mì ɓen, ɛ̀ ɓen kóo ɓánlɔ̀n Dɔfĩn sɛ́-bɛhɔ́ díe dínlén!

¹⁸ Mì ɓen lɛ̀ ɓɛ̀ nìnbirìe lɛ ɛ́ ɓɛ́ ɓɔ́ ɓɛ́kùi taà: ɓɛ̀ bɛ́zɛ̀ɓɛ̀ àá ɓɛ́ sɛ̃̀nɛ̀dɔ́síɓɛ́ ɲúuhɛ̃siè taà, ɓɛ̀ pànkɛ́a ɓàasiè taà, ɓɛ̀ záataà àá ɓɛ́pe lɛ yòo ɓɛ̀ taà, ɓɛ̀lɛ te ɓɛ́te àá ɓɛ́ wɔhĩ́ taà, ɓɛ̀ nìnbí-cíini àá ɓɛ́ nìnbí-bɛ̃hɛ̃ taà.»

¹⁹ Ɛ́ ń wo ɛ́ mɔn ɔ̀pe wìlaàsɔ àá lé sṹsùnù bɛ́zɛ̀ɓɛ̀ àá ɓɛ́ hĩtɛ́riè kɛ́ ɓɛ́ koo ɓánlɔ̀n ɛ́ ɓɛ ɛ̀ tɛ́ hɔ́ hĩɛ̀ àá ɔ́pe lɛ ɛ́ yòo ɔ̀ záatiɛ̀ wì-puiè àá mí hĩtɛ́riè.

²⁰ Ápe wìlàasɔ ɛ́ ɓɛ́ ɛ́ ɓaa àá ɔ́pe ɓúo bɔ̀háanírɔ lɛ ɛ́ hàarí ɛ́ wɔ́ hɔ́ yéréké bòo ɛ́ dàa ɛ́ vĩ́iniɛ ɓɛ̀lɛ ɛ́ hàarí yú ó pe wìlaàsɔ bòo zɛ̃́nílán ɓɛ́ tɛkɛ̀a lɔ̀n, ɛ̀ ɓɛ̀ ɛ́ ɓàaniɛ lèpe piè wɔ̃̀hṹ lɛ ɛ́ ɓɛ́ mɛ́ ɛ́ lɔ́ɓán àá ɔ́. Ápe wìlaàsɔ àá ɔ́pe ɓúo bɔ̀háanírɔ ɓɛ́ ɲúunáa ɛ́ ɓɛ́ táa koo hɔ̀ dṹn-bɛhɔ́ lɛ ɛ́ hɔ́ cìrìbí wi hũn kɛ ɓɛ́ yìe ɛ́ wi.

²¹ Ɛ́ ɓɛ́pe lɛ kɛ́ ɛ́ lé khɛ̃́n-tɔ́nú lɛ ɛ́ lé àá ɔ́pe lɛ ɛ́ yòo ɔ̀ záatiɛ̀ wì-puiè ɲunù ɛ́ khie ɓɔ́. Ɛ́ ɓɛ́pe ńɲiizàani ɓɛ́kùi ɛ́ wo khie lɛ̀ peɓɛ̀ taà ɛ́ tù.