Bɔ̀zɛ̃́níriè 18 - Buamu Laa

Babilɔɔnɛ lóo kùenlɔ́ bòo

¹ Ɛ́ pehɔ̀ máahṹ, ɛ́ ń bĩniɛ mɔn mɛlɛkɛ wìɓuiɛ̀ dɔ̀ kɛ́ á yòó lɔ́ àá hɔ́ hóohũn ɛ́ síɛ. À ɛ́ dàa pànkɛ́ bɔ̀bɛhɔ́, ɛ̀ hɔ̀ ɓàarɔ́ lɛ wi-è ǹ ɛ́ cieniɛ lè sṹsùnù míkùi.

² Á zɔn bérɛ ɛ́ nɛ làa: «Lè Babilɔɔnɛ lɔ́-bɛhɔ́ ɛ́ kùerɛ, lè Babilɔɔnɛ lɔ́-bɛhɔ́ ɛ́ kùerɛ! Lè wo wɔ́ ɓɛ́ ńɲíkĩ́nìɛ zɔǹlén, lè vìi lɛ ɛ́ ɓɛ́ ńɲíkĩ́nìɛ bìkùahɛ̃ wóò vɛ tànkɛ̀níkɛ ɓɛ́te hũn, lè viì lɛ ɛ́ ɓɛ́ ńɲíizàani lɛ lɔn àá ɓɛ́ bìlaàsiè lɛ lɔn, lɛ ɛ́ ɓɛ́ nìnbirìe ɛ́ wóò ɲìí ɛ́ wóò vɛ tànkɛ̀níkɛ ɓɛ́te hũn.

³ Ɓɛ̀ cɛ̃̀mɛ̀náa nìɛ ɓɛ́kùi ɛ́ háa zɔn piè ńdaaníkɛɓán hũn kɛ̀a ie ɲɛmù lɛ ɛ́ ɓɛ́ ɲun ɛ́ ɓaakɛa bòo si, ɛ̀ ɓɛ̀ sṹsùnù bɛ́zɛ̀ɓɛ̀ ɛ́ wɔ́ hɔ́ ńdaaníkɛɓánkũǹ bòo àá ɔ́, ɛ̀ ɓɛ̀ sṹsùnù danliè ɛ́ yú hɔ́ miikɛ yírɛ́ hɔ̀ miikɛ bòo lɛ yàamu hie hie lɛ á dàa bòo hũn.»

⁴ Ɛ́ ń bĩniɛ ɛ́ ɲɛ́ lé tɛmu dɛ̀ɓuɛ̀ dɔ̀ kɛ́ lé yòó ɛ́ tɛ̀ hɔ̀ hóohũn ɛ́ nɛ làa: «Mì zɔ lé lépe lóo sɔ hũn, mìpe niǹ nìɛ, bòo lɛ ɛ́ wé ɛ̀ mì bòo dàá bí kań lépe lóo sɔ bɔ̀koohɛ̃ wénlɔ́ hũn wɛ̀; ɛ̀ hɔ̀ bɔ̀sũmúa lɛ mii ɛ̀ yí lé ɛ̀ dàá bí dɛ̃ miɛ wɛ̀.

⁵ Pelè bɔ̀koohɛ̃ ɛ́ hɛ̀ koo ɓánlɔ̀n fúu ɛ́ van yòó dɛ̃un hɔ̀ hóohũn, ɛ̀ Dɔfĩn yí ninsiní peɓɛ̀ ńbíténírɔ́ bòo ǹ wɛ̀.

⁶ Hɔ̀ bòo lɛ ɛ́ lé wɔ́ àá ɓɛ́lɛ kɛ́ iè pe ɛ́ mí ɓiɛ̀ wé àá lé, ɛ̀ mì wé hɔ́ àá lé fúu yìe hɛ̃̀ ɲu. Ɛ̀ lè hã̀ací lɛ ɛ́ lé dàa màatɛ̃a hɔ̀ ɲɛmù ɛ́ lɛ́ ɓɛ́lɛ kɛ́ ǹ, iè pe ɛ́ mí ɓiɛ̀ dàa màatɛ̃́ hɔ́ ɲɛmù lɛ ɛ́ hiɛ̀ khɛ̀ khɛ̀ fúu yìe hɛ̃̀ ɲu ɛ̀ lɛ́ lè ǹ.

⁷ Ɛ́ kɛ̀a bòo lɛ ɛ́ lepe lóo sɔ ɛ́ dàa ɓàaniɛ míte ǹ, ɛ̀ lè wɔ́ mí mɛkɛ̃nì hɔ̀ bòo lɛ yàamu hie hũn, ɛ́ kɛ̀amu, ɛ́ mí ɓiɛ̀ biení pelè lɔ̀n ɛ̀ mì dé lé lè yúrú hũn. Lè wóò bie mí tĩì hũn nɛ mípe ɛ́ iè bɛ́zuú, nɛ mí yí dɛ̃̀ kɛ̀a mɛ-hṹnu, nɛ yúrú yí dɛ̀ yá wé mí lɔ̀n wɛ̀.

⁸ Ɛ́ sí iè hɔ̀pe, ɛ́ hɔ́pe bɔ̀sũmúa lɛ ɛ́ mii yí lé ɛ́ dàa ɓén síɛ pelè lɔ̀n wú-sɔncóonín; hɔ̀pe bɔ̀sũmúa sɔ ɛ́ iè hɔ̀ húmú àá lé yúrú àá hɔ́ hĩni, ɛ̀ hɔ̀ dṹn ɛ́ ɓén cĩ̀ní lé ɛ́ yáakɛ; iè hɔ̀ lɛ ápe Ɲunsɔ Dɔfĩn lɛ ɛ́ te peɓɛ̀ lìe ɛ́ lɔ̀ ɛ́ iè pànkɛ́ ɓàasɔ.»

⁹ Ɛ́ ɓɛ́pe sṹsùnù bɛ́zɛ̀ɓɛ̀ lɛ ɛ́ wɔ́ hɔ́ ńdaaníkɛɓánkũǹ bòo àá lépe lóo sɔ, ɛ̀ ɓɛ̀ wɔ́ ɓɛ́ mɛkɛ̃nì pelè bòo lɛ yàamu hie hie hũn, pɛ̃̀hṹ lɛ kɛ́ ɓɛ́ loo lepe lóo sɔ cɛ̃̀ ńɲíi kɛ́ hɔ́ ɛ́ hĩ́ní ɛ́ yòó cɔ́, ɛ́ ɓɛ́ ɓén wíríkɛ kɛ́ ɓɛ́ ɛ́ cãamɛkɛ pelè bòohũn.

¹⁰ Ɛ́ ɓɛ́ ɓén khɛ̃̀ún ɛ́ vɛ́ dìń viì ɛ́ niìní lèpe pelè lɔ̀nbiè lɛ ɛ́ ɓɛ́ ɛ́ zán bòo hũn; ɛ̀ ɓɛ̀ wo ɛ́ bie nɛ làa: «Miikɛ bɔ̀sũmúa, miikɛ bɔ̀sũmúa! kɔ̀pe Babilɔɔnɛ lɔ́-bɛhɔ́ lɛ pànkɛ́ wi! Líɛrɛ́ dìcóoní mí dòonún hũn ɛ̀ ɓɛ̀ wo zĩ̀níkɛa lɔ̀ kɔ̀ lìe vɔ́ ɛ́ bieniɛ kɔ̀ lɔ̀n kɛ̀amu!»

¹¹ Ɛ́ ɓɛ́ sṹsùnù danliè ɛ́ lò ɓiɛ̀ ɛ́ wíríkɛ kɛ́ ɓɛ́ ɛ́ cãamɛkɛ pelè bòohũn iè hɔ̀ lɛ ɛ́ nìnbírɔ dɔ̀ ɛ́ bĩniɛ ɛ́ yá peɓɛ̀ bòo ɛ̀ yɛ̀ wɛ̀.

¹² Peɓɛ̀ bɔ̀yìɛníriè sɔ ɛ́ iè hɔ̀ sɛ̃́ní, àá hɔ́ hɛ̃npuò, àá hɔ́ sɛ̃̀nlɛ̀a lɛ ɛ́ yàamu hie àá hɔ́ líɛrɔ́, àá hɔ́ pɔnkɔ̀-níhĩ́ lɛ yàamu hie: hɔ̀dɔ̀ ɛ́ wɔ́ àá hɔ́ ńkúandí, ɛ̀ hɔ̀dɔ̀ ɛ́ ɲiiníkɛ, ɛ̀ hɔ̀dɔ̀ iè bɔ̀miɛ̀; ɛ̀ peɓɛ̀ bɔ̀yìɛníriè dɔ̀ ɛ́ iè hɔ̀ dãahĩ́ àá mí ɲúuhɛ̃ ɲúuhɛ̃ àá hɔ́ tĩ̀ɛ bɔ̀ɓuà dɔ̀ àá mí ɲúuhɛ̃ ɲúuhɛ̃: hɔ̀dɔ̀ ɛ́ wɔ́ àá láahṹ ɲiɛ̀, ɛ̀ hɔ̀dɔ̀ ɛ́ wɔ́ àá dãahĩ́ lɛ yàamu hie, ɛ̀ hɔ̀dɔ̀ ɛ́ wɔ́ àá hɛ̃nlɔ́ lɛ ɛ́ hãaniɛ, ɛ̀ hɔ̀dɔ̀ ɛ́ wɔ́ àá hɛ̃nlɔ́, ɛ̀ hɔ̀dɔ̀ ɛ́ wɔ́ àá hɔ́ sɛ̃̀nlɛ̀a lɛ ɛ́ tan tanlɔ́.

¹³ Ɓɛ̀pe danliè sɔ ɛ́ lò hṹn wóò bĩní yìɛní hɔ́ yurɔ́ lɛ tũnù tĩ àá mí ɲúuhɛ̃ ɲúuhɛ̃, àá hɔ́ vɛ̃̀hɛ̃ ɲɛkɛ̃̀a lɛ tũnù tĩ; ɛ̀ ɓɛ̀ lò yìɛní hɔ̀ divɛ̃n àá hɔ́ yurɔ́ àá hɔ́ dũmu àá hɔ́ bɔ̀vɛ̀riè àá ɓɛ́ nɛ̀ɓɛ̀ àá ɓɛ́ pirìe àá ɓɛ́ záataà àá peɓɛ̀ wòtóhĩ́, àá ɓɛ́ wɔhĩ́ àá ɓɛ́ nìnbirìe lɛ ɛ́ ɓɛ́ ɓaakɛa.

¹⁴ Ɛ́ ɓɛ́pe danliè sɔ ɛ́ wo zɔn bie ɛ́ lɛ́ lépe lɔ́-bɛhɔ́ sɔ ǹ ɛ́ nɛ làa: «Hɔ̀ bòo lɛ ɛ́ kɔ́ tĩì ɛ́ hṹn vɛ́ nin ɛ́ vũnun cɔ́ ɛ̀ hɔ̀ kɛ́ kɔ, ɛ̀ hɔ̀pe kɔ̀ yírɛ́ àá hɔ́pe kɔ̀ bòo lɛ yàamu hie ɛ́ vṹnun lɔ́ kɔ́ vìi ɛ́ kɔ́ wo yá bĩní yí hɔ́ ɛ́ yá mi wɛ̀.»

¹⁵ Ɛ́ ɓɛ́pe danliè lɛ ɛ́ dɛrɛ lèpe lóo sɔ hũn ɛ́ dàa yú ɓɛ́ yírɛ ɛ́ ɓén khɛ̃̀ún ɛ́ vɛ́ dìń viì ɛ́ niìní lèpe pelè lɔ̀nbiè lɛ ɛ́ ɓɛ́ ɛ́ zán bòohũn, ɛ̀ ɓɛ̀ ɛ́ wírí kɛ́ ɓɛ ɛ́ lè yúrú yèrè ɛ̀ tɛ̀,

¹⁶ ɛ́ bie nɛ làa: «Miikɛ bɔ̀sũmúa, miikɛ bɔ̀sũmúa ɛ́ hɛ̀ yú lépe lɔ́-bɛhɔ́ lɛ! Lè hṹn dɛ̃̀ kɛ̀a ie hṹnu lɛ zɔn hɔ̀ ńkúndí tĩ̀ɛ bɔ̀miɛ̀ lɛ yamu hie hie, à lò koo miikɛ líɛrɔ́ lɛ ɛ́ wɔ́ àá hɔ́ sɛ̃́ní àá hɔ́ sɛ̃̀nlɛ̀a lɛ yàamu ɛ́ hie.

¹⁷ Ɛ́ líɛrɛ́ dìcóoní mí dòonún hũn ɛ̀ hɔ̀pe yírɛ́ sɔ sí míkùi ɛ́ wo yáa lɔ́ yán.» Ɛ́ hɔ́ ɲumu wuò bɔ̀bɛ̃hɛ̃ zìeníriè ɓɛ́kùi àá ɓɛ́pe lɛ ɛ́ tɛ́ pehɔ̀ hũn, àá ɓɛ́pe lɛ ɛ́ wóò zɔ hɔpe ɲumu wuò bɔ̀bɛ̃hɛ̃ ɛ̀ dàá vɛ ɓɛ́ wún lɔ̀n, àá ɓɛ́pe lɛ ɛ́ tɛ́ hɔ́pe ɲun-bɛhɔ́ lɔ̀n ɓɛ́kùi, ɛ́ khɛ̃̀nɛ van dɛ̃̀ viì ni;

¹⁸ ɛ̀ hɔ̀ lɛ ɛ́ ɓɛ́ mɔn lèpe lóo lɛ cɛ̃̀ ńɲíi ɛ́ ɓɛ́ ɛ́ wũamɛkɛ ɛ́ nɛ làa: «Lɔ́-bɛhɔ́ dɔ̀ lɛ ɛ́ ɓán yú lépe lóo lɛ ǹ ɛ́ yí wé yí mi wɛ̀!»

¹⁹ Ɛ̀ ɓɛ̀ ɛ́ hɔ̀ tĩ́ní ɛ̀ khui ɛ̀ hɔ̀nkɛ kóo ɓɛ́ ɲúuhɛ̃ lɔ̀n, ɛ̀ ɓɛ̀ ɛ́ wíríkɛ kɛ́ ɓɛ́ ɛ́ lè yúrú yèrè ɛ̀ tɛ̀ kɛ́ ɓɛ́ ɛ́ wũamɛkɛ ɛ́ nɛ làa: «Miikɛ bɔ̀sũmúa, miikɛ bɔ̀sũmúa ɛ́ hɛ̀ yú lépe lɔ́-bɛhɔ́ lɛ! Lèpe lɛ ɛ́ lɛ́ ɛ́ ɓɛ́ nìnbirìe lɛ ɛ́ dàa hɔ̀ ɲumu wuò bɔ̀bɛ̃hɛ̃ hɔ̀ ɲun-bɛhɔ́ lɔ̀n ɓɛ́kùi ɛ́ wo wɔ́ ɓɛ́ bòo ɓàasiè. Ɛ́ líɛrɛ́ dìcóoní mí dòonún hũn ɛ́ hɔ́pe sí míkùi ɛ́ yáa lɔ́ yán.»

²⁰ Ɛ́ kɔ́ wɛní kɔ́te kɔ̀pe hóohũn lèpe lóo sɔ lɛ wuarɔ́ bòo hũn. Ɛ̀ mìpe nìɛ lɛ bòo ɛ́ sɛ̃̀ Dɔfĩn àá mípe Yiezu tɔnkɛriè àá mípe Dɔfĩn bɔ̀háaníriè, mì lò ɓiɛ̀ wɛní míte iè hɔ̀ lɛ ɛ́ Dɔfĩn ɛ́ lɔ̀ pelè lìe hɔ̀ bɔ̀koohɔ́ lɛ ɛ́ lé ɛ́ wɔ́ àá miɛ bòohũn.

²¹ Ɛ́ mɛlɛkɛ lɛ pànkɛ́ wi dɔ̀ ɛ́ khie mɔ̀ lè sɛ̃̀nlè dɔ̀ lɛ ɛ́ lɔ́ɓán àá niihṹ dɛ̀bɛhɔ́ dɔ̀ ɛ́ tɛ́ ɛ́ dɔ́ hɔ́ ɲun-bɛhɔ́ hũn kɛ́ á ɛ́ bie ɛ́ nɛ làa: «Sí iè pe pànkɛ́ lɛ ɓà ńmàa ɛ́ ɓɛ́ dàa ɓén tɛ́ lépe Babilɔɔnɛ lɔ́-bɛhɔ́ ɛ́ vɛ́ síɛní, ɛ́ nìnbírɔ dɔ̀ yìi ɛ́ yá bĩní ɛ́ bè lè lɔ̀n ɛ́ yá mi wɛ̀.

²² Ɛ́ ɓɛ́ cɛ̃́hɛ̃ ɓɛ́riè cɛ̃́hɛ̃ tɛmu, àá ɓɛ́ líɛkɔ́ dɛriè ńlíɛkɔ́ tɛmu, àá ɓɛ́ ńwĩhĩ́ wĩriè ńwĩhĩ́ tɛmu, àá ɓɛ́ bũà pìɛkɛriè bũà tɛmu ɛ́ wo yá bĩní ɛ́ ɲí nin kɔ viì ɛ́ yá mi wɛ̀. Ɛ̀ hɛ̀rí níhĩ́ tɔnlɔ́ dɔ̀ tɔntɛ́ ɛ́ yá bĩní mi kɔ viì wɛ̀, ɛ̀ hɛ̀rí niihṹ tɛmu dɔ̀ ɛ́ lò yá bĩní tɛ̀ ɛ́ ɲí nin kɔ̀ viì wɛ̀.

²³ Ɛ̀ pɛ̃̀ntĩ́ní ńpiemu ɛ́ lò yá bĩní cĩ̀ kɔ̀ hũn, ɛ̀ hɛ́fĩn àá ɓá bɛ́rɔ ɲunù tɛmu ɛ́ lò yá bĩní ɲí nin kɔ̀ viì wɛ̀. Hɔ̀pe sí míkùi ɛ́ ɓén wé kɔ̀ ǹ iè hɔ̀ lɛ ɛ́ kɔ́ danliè ɛ́ temu hṹn pànkɛ́ wi ɛ́ pɔ ɓɛpe lɛ kɛ́ lé sṹsùnù lɔ̀n, ɛ̀ kɔ̀ khɛ̃̀níkɛa hɔ̀ dàa míkùi nìɛ vĩ́iniɛ àá kɔ́ híenú,

²⁴ ɛ̀ hɔ̀ lò iè kɔ̀ viì ɛ́ Dɔfĩn bɔ̀háaníriè cãani ɛ́ kóosí hũn, àá ɓɛpe nìɛ lɛ bòo sɛ̃̀ Dɔfĩn cãani, àá ɓɛ́pe lɛ ɛ́ ɓɛ́ ɛ́ hàarí ɓɔ́ lé sṹsùnù lɔ̀n ɓɛ́kùi cãani.»