Bɔ̀zɛ̃́níriè 17 - Buamu Laa

Lè wĩ̀i lɛ wɛ̃̀ à hɛ̃́-bɛhɔ́ lɛ wóò yìɛní míte bòohũn

¹ Ɛ́ ɓɛ́ mɛlɛkɛɓɛ hùuɲu lɛ hṹn dàa hɔ ɲunlánɓɛ̀ ɲùuhu ɓɛ́ níhĩ́ hũn tĩ́ihṹ ádɔ̀ ɛ́ ɓɛrɛ lúwiniɛ mi ǹ à zɔn bie lɛ́ mì ǹ ɛ́ nɛ làa: «Ɓen, nín vɛ zɛ̃́ní-ɛ pe hɛ̃́-bɛhɔ́ lɛ wóò yìɛní míte lìe lènlɔ́ bòo kɔ̀ ǹ. Àpe hɛ̃́-bɛhɔ́ sɔ ɛ́ den iè lèpe lɔ́-bɛhɔ́ lɛ ɛ́ wi hɔ vṹuhɛ̃ bɔ̀kùi ɲunù.

² À iè ɔ̀pe ɛ́ ɓɛ́ sṹsùnù bɛ́zɛ̀ɓɛ̀ ɛ́ dàa wɔ́ hɔ́ ńdaaníkɛɓánkũǹ bòo, ɛ̀ hɔ̀ lò iè pe piè ńdaaníkɛɓánkũǹ ɲɛmù ɛ́ ɓɛ́ sṹsùnù nìɛ ɲun ɛ́ tú ɓaakɛa.»

³ Ɛ́ lé Mɛkɛ̃n-Sãanu ɛ́ khie mɔ̀ mi ǹ, á mɛlɛkɛ ɛ́ wo fɔ́ mi ɛ́ dàa cɔ́ van lè ɲi-herà dɔ̀ hũn. Ɛ́ ń van mɔn hṹnu dɔ̀ yán kɛ́ á kɛsí wìlaàsɔ wìmiì dɔ̀ lɔ̀n kɛ́ piè tɛkɛ̀a míkùi ɛ́ tú àá yèhĩ́ dɔ̀ lɛ ɛ́ Dɔfĩn ɛ̀ tòokɛ. Àpe wìlaàsɔ sɔ ɛ́ dàa ɲúuhɛ̃ hùuɲu àá ńwṹa pírú.

⁴ Àpe hṹnu sɔ ɛ́ zɔn lè pɔnkɔ̀-miì dɔ̀ lɛ yàamu hie, à ɛ́ koo hɔ̀ miikɛ sɛ̃́ní, à lò can míte àá hɔ́ líɛrɔ́ lɛ yaamu hie hie àá mí ɲúuhɛ̃ ɲunhɛ̃. À ɛ́ dàa le sɛ̃́ní ɲunlán dìɛ dɔ̀ mí núnú hũn kɛ́ lé tú àá hɔ́ miikɛ bɔ̀làahɛ̃ àá piè te yìɛnírɔ́ yìrá bòo.

⁵ Ɛ̀ piè ɓiì lɔ̀n ɛ́ lé yèrè dɔ̀ ɛ́ wɛ̃́ wi nin; lè yèrè sɔ bòo lɛ ɛ́ lé nɛ̀ ɛ́ tànkɛ̀niɛ; lè yèrè sɔ ɛ́ wɛ̃́ ɛ́ nɛ làa: «Lɔ́-bɛhɔ́ Babilɔɔnɛ, ɓɛ̀ hã́a lɛ wóò yìɛní ɓɛ́te àá hɔ́pe miikɛ bɔ̀làahɛ̃ lɛ wóò wé lé sṹsùnù lɔ̀n míkùi ɓà nín.»

⁶ Ɛ́ ń mɔn kɛ́ ápe hṹnu sɔ ɛ́ hɛ̀ ɲun ɓɛ̀ nìɛ lɛ bòo sɛ̃̀ Dɔfĩn cãani àá ɓɛ́pe lɛ ɛ́ hàarí tɛ̀ ɛ́ húrun ɓɛ́ ńdɛsĩ̀nlɔ́ à Yiezu bòo hũn cãani fúu ɛ́ hɔ́ hɛ̀ ɓaa ɔ̀. Ɛ́ hɔ́ lɛ ɛ́ ń mɔn ɔ̀, ɛ́ hɔ́ hɛ̀ yòokɛa niǹ lɔ̀n àá bɔ̀bín.

⁷ Á mɛlɛkɛ ɛ́ zɔn bie lɛ́ mi ǹ ɛ́ nɛ làa: «Hɔ̀ wiɛ dàa yòokɛa kɔ̀ lɔ̀n? Nín zɛ̃́ní-ɛ pe hṹnu àá ɔ́pe wìlaàsɔ lɛ á kɛsí lɔ̀n peɓɛ̀ bòo lɛ tànkɛ̀niɛ ɛ̀ lɛ́ kɔ ǹ, àpe wìlaàsɔ lɛ ɛ́ dàa hɔ ɲúuhɛ̃ hùuɲu àá hɔ́ ńwṹa pírú.

⁸ Àpe wìlaàsɔ lɛ ɛ́ kɔ́ mɔn ɛ́ pɛ̃̀hṹ dɔ̀ wi, kɛ́ kɛ̀a sáalɛ á wo bĩniɛ mí wɛ̀. À mii siɛ lé àá lé kṹun dɛ̀bɛhɔ́ lɛ fìi mí hũn ɛ̀ dàá yòó lé, kɛ́ á den mii khíi vɛ vĩ́ hĩ́ɔɔn. Ɛ́ ɓɛ́ sṹsùnù nìnbirìe lɛ yèhĩ́ ɛ́ yí wĩ́ lé mɛkɛ̃nì vɛ̃hṹ hũn àá bòo lɛ ɛ́ lé dímíɲɛ́ dàa mɛ́ ɛ́ ɓen mɔn ɔ̀pe wìlaàsɔ, ɛ́ hɔ́ ɓén yòokɛ peɓɛ̀ lɔ̀n iè hɔ̀ lɛ á pɛ̃̀hṹ wi, kɛ́ kɛ̀a sáalɛ á mí wɛ̀; kɛ́ á lò ɓén bĩní khũ̀á ɛ́ wé.

⁹ Ɛ́ lɛ iè lè viì lɛ ɛ́ ɓɛ́ nìnbirìe ɛ́ sãawi ɛ̀ ɓɛ̀ dàá hɔ́ bɔ̀dũmunù nin ɛ̀ dàá dũń hɔ́pe bòo sɔ lɛ ɲún. Hɔ̀pe ɲúuhɛ̃ hùuɲu ɛ́ iè ɓúkùo hùuɲu ápe hṹnu ɛ́ kɛsí lɔ̀n; ɛ̀ hɔ̀ lò bĩniɛ iè bɛ́zɛ̀ɓɛ̀ hùuɲu ɛ́ hɔ́ ɛ́ zɛ̃́ní:

¹⁰ ɛ́ ɓɛ́ bɛ́zɛ̀ɓɛ̀ hùanú bɛ́záahĩ́ ɛ́ khie cɔ́ vɔ́, à wìcóoní ɛ́ wi yán ɛ́ mí bɛ́záanú ɛ̀ dí, à hùuɲulán ɛ́ ɲɛùn mí mí bɛ́záanú hũn wɛ̀, ɛ́ pɛ̃̀hṹ lɛ kɛ́ á ɓɛrɛ mí bɛ́záanú hũn, á yá míi wɛ̀.

¹¹ Ápe wìlaàsɔ lɛ ɛ́ hṹn wi kɛ́ kɛ̀a sáalɛ á mí ɛ́ kùusɔ ɛ́ iè bɛ́zɛ̀ɓɛ̀ hùutĩlán. Àpe bɛ́zuú sɔ ɛ́ lò ɓiɛ̀ ɛ́ wi ɓɛ́pe bɛ́zɛ̀ɓɛ̀ hùuɲu sɔ sí hũn, kɛ́ á vaá-vɛ àá mí vĩ́nlén.

¹² Ɛ̀ hɔ̀pe ńwṹa pírú lɛ ɛ́ kɔ́ mɔn ɛ́ iè bɛ́zɛ̀ɓɛ̀ pírú lɛ ɛ́ ɲɛùn yá ɓɛ́ bɛ́záahĩ́ ɛ̀ dí wɛ̀; kɛ́ ɓɛ́ ɓén yí hɔ́ pànkɛ́ lɛ ɛ́ ɓɛ ɛ̀ dàá dí lé bɛ́záanú àá ɔ́pe wìlaàsɔ, liɛrɛ dìcóoní hũn.

¹³ Ɓɛ̀pe pírú sɔ ɓɛ́kùi ɛ́ bɔ̀lieníkɛà ɛ́ iè dìcóoní, ɓɛ̀ wóò mìí hɔ́ pànkɛ́ àá lé ɲunù lɛ ɛ́ ɓɛ́ dàa ɛ́ dàá tɛ́ ápe wìlaàsɔ tɔnlɔ́.

¹⁴ Ɓɛ̀ ɓén tɛ́ hɔ́ hĩɛ̀ àá ɔ́ Pi-zuú, kɛ́ á Pi-zuú ɛ́ ɓén yí hɔ́ pànkɛ́ peɓɛ̀ lɔ̀n iè hɔ̀ lɛ á iè ɓɛ̀ ɲúuhɛ̃siè ɓɛ́kùi Ɲunsɔ, à lò iè ɓɛ̀ bɛ́zɛ̀ɓɛ̀ ɓɛ́kùi bɛ́zuú. Ɛ̀ ɓɛ̀pe piè nìɛ lɛ á vɔn, lɛ á munɛ, lɛ bɔ̀ à máahṹ àá ɓɛ́ tĩɛ̀ míkùi ɛ́ lò ɓiɛ̀ ɓén yí hɔ́ pànkɛ́ peɓɛ̀ lɔ̀n àá ɔ́.»

¹⁵ Á mɛlɛkɛ ɛ́ bĩniɛ zɔn bie lɛ́ mi ǹ ɛ́ nɛ làa: «Hɔ̀ vṹuhɛ̃ lɛ ɛ́ kɔ mɔn, hɔ̀pe lɛ ápe hṹnu lɛ ɛ́ wóò yìɛní míte ɛ́ kɛsí ɲunù, ɛ́ iè ɓɛ̀ nìzã̀amáa lɛ iè lóoniɛ nìɛ àá ɓɛ́ cɛ̃̀mɛ̀náa nìɛ àá hɔ́ níiɓɛ̀ nìɛ.

¹⁶ Ɛ̀ hɔ̀pe ńwṹa pírú lɛ ɛ́ kɔ́ mɔn àá ɔ́pe wìlaàsɔ kùusɔ ɛ́ ɓén hán ɔ́pe hṹnu lɛ wóò yìɛní míte; ɓɛ̀ ɓén vúa piè bòo míkùi á wo ɛ́ dìń àá mí bùie kíemáà; ɓɛ̀ ɓén lɛ̀ piè taà ɛ̀ hɔ̀ lɛ kɛ́ ɛ́ ɓɛ́ khíi cĩ̀ní àá hɔ́ dṹn.

¹⁷ Dɔfĩn ɛ́ den dɔ́ bòo lɛ ɛ́ Hɔ́ wɛ mii wé peɓɛ̀ tĩɛ̀ hũn nɛ ɓɛ ɛ̀ wé; ɛ́ ɓɛ́ wo ɓén wé ɓɛ́ ɲunù àá dìcóoní ɛ̀ ɓɛ̀ ɛ́ lɛ́ ɓɛ́ bɛ́záanú pànkɛ́ àpe wìlaàsɔ ǹ fúu ɛ̀ Dɔfĩn biehĩ́ ɲunù ɛ̀ vɛ ɛ̀ tí lɔ̀n.

¹⁸ Ápe hṹnu lɛ ɛ́ kɔ́ mɔn ɛ́ iè lè lɔ́-bɛhɔ́ lɛ ɛ́ mí bɛ́záanú ɛ̀ dí lé sṹsùnù bɛ́zɛ̀ɓɛ̀ lɔ̀n.»