Bɔ̀zɛ̃́níriè 16 - Buamu Laa

Hɔ̀ ɲunlánɓɛ̀ hùuɲu lɛ iè Dɔfĩn tĩcĩ̀nín ɛ́ hɔ́ ɛ́ zɛ̃́ní bòo

¹ Ɛ́ ń ɲɛ́ lé tɛn-bɛhɔ́ dɔ̀ kɛ́ lé zɔn ɛ́ tɛ̀ lè Dɔfĩn zũ-bɛhɔ́ hũn ɛ́ bie ɛ̀ lɛ́ ɓɛ́ mɛlɛkɛɓɛ hùuɲu ǹ ɛ́ nɛ làa: «Mì vɛ síɛ hɔ̀nsí hɔ́ Dɔfĩn tĩcĩ̀nín lɛ ɛ́ wi hɔpe ɲunlánɓɛ̀ hùuɲu sɔ hũn lè sṹsùnù lɔ̀n!»

² Á hán mɛlɛkɛ ɛ́ van siɛ hɔ̀rɛ̀sí hɔ̀ bòo lɛ wi mí ɲunlán dìɛ hũn ɛ́ koosí lè sṹsùnù lɔ̀n. Ɛ́ hɔ́ ńcɛ́kɛ́-koohɛ̃ dɔ̀ lɛ wóò vɛ́ cɛ̃̀un ɛ́ yú ɓɛ́ nìnbirìe lɛ ápe wìlaàsɔ bɔ̀zɛ̃́níriè ɛ́ wi nin, ɛ̀ ɓɛ̀ lò hṹn wóò ɓàaní lèpe wɔ̃̀hṹ lɛ ɛ́ ɓɛ́ mɛ́ ɛ́ lé lɔ́ɓán àá ɔ́ ǹ.

³ Á ńɲuunín mɛlɛkɛ ɛ́ van síɛ ɛ́ hɔ̀rɛ̀sí hɔ́ bòo lɛ ɛ́ wi mí ɲunlán dìɛ hũn ɛ́ koo hɔ̀ ɲun-bɛhɔ́ hũn ɛ́ hɔ́ ɲumu ɛ́ yòó dɛ̃̀ kɛ̀a ie nìnbírɔ lɛ ɛ́ ɓɛ́ ɓɔ́ cãani, ɛ́ ɓɛ́ bìe lɛ yìe wi lɛ ɛ́ wi hɔpe ɲun-bɛhɔ́ sɔ hũn ɛ́ húrunkɛ ɓɛ́kùi.

⁴ Á ńtĩinín mɛlɛkɛ ɛ́ van siɛ hɔ̀rɛ̀sí hɔ́ bòo lɛ ɛ́ wi mí ɲunlán dìɛ hũn ɛ́ koo hɔ̀ vṹuhɛ̃ àá hɔ ɲun-kɛ̃hĩ́ hũn. Ɛ́ hɔ́pe míkùi ɛ́ wo wɔ́ hɔ́ cãani.

⁵ Ɛ́ ń wo ɲɛ́ á ɲumu mɛlɛkɛ kɛ́ á bie ɛ́ nɛ làa: «Kɔ́ iè Dɔfĩn lɛ ɛ́ ce, kɔ̀pe lɛ ɛ́ wi, ɛ̀ kɔ̀ lò hàarí wi, kɔ́ iè Dɔfĩn lɛ ɛ́ cã̀aní iè hɔ̀ lɛ ɛ́ kɔ́ lɔ̀ hɔ̀pe lìe kɛ̀a mu.

⁶ Ɓɛ̀ den hàarí koosí ɓɛ́ nìɛ lɛ bòo sɛ̃̀ kɔ̀pe Dɔfĩn cãani àá kɔ́ bɔ̀háaníriè cãani; ɛ́ kɛ̀a sáalɛ ɛ́ kɔ́ wo lɛ́ hɔ́ cãani ɓà ǹ nɛ ɓɛ ɲu, ɛ́ hɔ́ iè bòo lɛ ɛ́ fɔ́ɓán àá ɓɛ́.»

⁷ Ɛ́ ń wo ɲɛ́ lé tɛmu dɔ̀ kɛ́ lé zɔn ɛ́ tɛ̀ ɛ̀ lé àá lépe miyiɛ́ leǹlén dúekéré viì ɛ́ nɛ làa: «Ũun, Ɲunsɔ Dɔfĩn pànkɛ́ míkùi ɓàasɔ, kɔ̀ lìe lènlɔ́ ɛ́ iè bɔ̀berà ɛ̀ hɔ̀ lò ɛ́ cã̀aní!»

⁸ Á mɛlɛkɛ bìɛnɛ́lán ɛ́ hɔ̀rɛ̀sí hɔ́ bòo lɛ ɛ́ wi mí ɲunlán dìɛ hũn ɛ́ koosí lé wurù lɔ̀n. Ɛ́ lépe wurù ɛ́ wo yú lé ɲunù lɛ mii dàá cĩ̀ní ɓɛ́ nìnbirìe àá mí dṹn.

⁹ Ɛ́ ɓɛ́ nìnbirìe ɛ́ hɔ́ sɔmu bɔ̀-bɛbɛhɔ́ ɛ́ cĩníkɛa, ɛ́ ɓɛ́ wo ɛ́ hɔ̀ Dɔfĩn lɛ ɛ́ dàa hɔ pànkɛ́ hɔ́pe bɔ̀sũmúa sɔ lɔ̀n yèrè ɛ̀ yáakɛ àá ɓɛ́ ben-làahɛ̃, ɛ̀ ɓɛ̀ pɛ̃́ ɛ́ yí zɛ̀ní ɓɛ́ tĩɛ̀ ɛ̀ ɓɛ̀ fùansí ɓɛ́ bɔ̀koohɛ̃ wénlɔ́ ǹ, ɛ̀ ɓɛ̀ khíi ɓàaní hɔ́pe Dɔfĩn wɛ̀.

¹⁰ Á mɛlɛkɛ hùanúlán ɛ́ khie van hɔ̀rɛ̀sí hɔ̀ bòo lɛ ɛ́ wi mí ɲunlán dìɛ hũn ɛ́ koosí é wìlaàsɔ bɛ́záanú wànlè lɔ̀n, ɛ́ piè bɛ́záanú ɛ́ yòó wɔ́ síbínú míkùi, ɛ́ ɓɛ́ nìnbirìe ɛ́ hɛ̀ lɔ̀n bɔn fúu ɛ́ ɓɛ́ hɛ̀ ɛ́ ɓɛ́ diɛhĩ́ ɛ̀ lɛ̀;

¹¹ ɛ́ ɓɛ́ wo ɛ́ hɔ̀ Dɔfĩn lɛ ɛ́ wi hɔ hóohũn ɛ̀ tòokɛ iè bòo lɛ ɛ́ peɓɛ̀ lɔ̀n dàa ɛ́ be, àá hɔ́ ńcɛ́kɛ̀a lɛ ɛ́ wi ɓà ǹ bòohũn. Kɛ́ ɓɛ́ den pɛ́wi ɛ́ yí zɛ̀ní ɓɛ́ tĩɛ̀ ɛ̀ ɓɛ̀ fùansí ɓɛ́ bɔ̀koohɛ̃ wénlɔ́ ǹ wɛ̀.

¹² Á mɛlɛkɛ hùiezĩ́lán ɛ́ khie van hɔ̀rɛsí hɔ́ bòo lɛ ɛ́ wi mí ɲunlán dìɛ hũn ɛ́ koo lè vṹn dɛ̀bɛhɔ́ lɛ ɛ́ ɓɛ́ wóò ve nɛ Efarate hũn. Ɛ́ lépe vṹn sɔ ɛ́ yòó hɔn ɛ́ dàa ɛ́ sɛ́sɛ́a lè wṹn ɛ́ lɛ́ ɓɛ́ bɛ́zɛ̀ɓɛ̀ lɛ ɛ́ lé àá lé wurù hànlén.

¹³ Ɛ́ ń mɔn ńɲíkĩ́nìɛ bìɛ tĩ dɔ̀. Ɓɛ̀ ɛ́ dɛ̃̀ kɛ̀a ie ńbíehɛ̃. Àdɔ̀ ɛ́ zɔn lɔ́ àá ɔ́ wìlaàsɔ wìsũmúi ɲunù, àdɔ̀ ɛ́ lɔ́ àá ɔ́ wìlaàsɔ ɲunù, àdɔ̀ ɛ́ lɔ́ àá ɔ́ ɓúo Dɔfĩn bɔ̀háanírɔ ɲunù.

¹⁴ Ɓɛ̀ iè Sitũanɛ ńɲíkĩ́nìɛ lɛ wóò wé hɔ́ yéréké bòo. Ɓɛ̀ wóò vɛ le sṹsùnù míkùi bɛ́zɛ̀ɓɛ̀ viì, ɛ̀ vɛ ve ɓɛ ɛ̀ ɓen kóo ɓánlɔ̀n ɛ̀ dàá tɛ́ hɔ́ hĩɛ̀ àá hɔ́ Dɔfĩn pànkɛ́ míkùi ɓàasɔ, pehɔ̀ wurù dɛ̀bɛhɔ́ zɔn.

¹⁵ Ɲunsɔ ɛ́ bie ɛ́ nɛ làa: «Ɛ́ ń lɛ iè pe wo vaá-ɓen kɛ̀a ie kɛ̃̀míi bòo sí. Ápe lɛ ɛ́ piɛniɛ mí yìe à ɓɛ́ɓɛa mí pɔnkɔ̀nìɛ ǹ bòo lɛ ɛ́ wé à bí vɛ mí bùie kã́amáa ɛ̀ piè lùwiè ɛ̀ lé yíe, ɛ́ pe ɲún ɛ́ tĩ.»

¹⁶ Ɛ́ ɓɛ́pe ńɲíkĩ́nìɛ sɔ ɛ́ van vɔn ɓɛ̀ bɛ́zɛ̀ɓɛ̀ ɛ́ ɓɛrɛ koo ɓánlɔ̀n lè viì lɛ ɛ́ ɓɛ́ wóò ve Hebereɓɛ níi hũn nɛ Arimakedɔn.

¹⁷ Á mɛlɛkɛ hùuɲulán ɛ́ yòó hɔ̀rɛsí hɔ̀ bòo lɛ ɛ́ wi mí ɲunlán dìɛ hũn lè sí kiemáa hũn. Ɛ́ tɛn-bɛhɔ́ dɔ̀ ɛ́ zɔn tɛ̀ lè Dɔfĩn zũ-bɛhɔ́ hũn, lè bɛ́záanú wànlè viì ɛ́ nɛ làa: «Hɔ̀ wo wɔ́ vɔ́.»

¹⁸ Ɛ́ hɔ́ hóo ɛ́ yòó ɛ́ ɲiiníkɛa, ɛ̀ hɔ̀ zɔn wíríkɛa ɛ̀ hɔ̀ zɔn nɛ̀mɛ́kɛa, ɛ̀ lè sṹsùnù ɛ́ siɛ zɛ̀ cɛ̃̀un. Ɛ́ lépe sṹsùnù zànlɔ́ sɔ ɛ́ pànkɛ́ ɛ́ hɛ̀ kɛrɛ cɛ̃̀un fúu ɛ́ lé ɓà ńmàa ɛ́ ɲɛùn yí wé ɛ́ yí mi àá bòo lɛ á nìnbírɔ ɛ́ dàa ɛ́ wi lepe sṹsùnù lɔ̀n.

¹⁹ Ɛ́ lépe lɔ́-bɛhɔ́ ɛ́ zɔn wánkɛa ɛ́ wɔ́ ɲúniɛ̀ hĩ̀ tĩ, ɛ̀ hɔ̀ cɛ̃̀mɛ̀náa míkùi lóoniɛ ɛ́ ɓúukɛa khie siɛ. Ɛ̀ Dɔfĩn ɛ́ yí ninsĩní lépe Babilɔɔnɛ lóo dɛ̀bɛhɔ́ bòo ǹ wɛ̀; kɛ́ Hɔ́ den ɲuuniɛ lèpe Babilɔɔnɛ lóo sɔ àá mí miikɛ tĩcĩ̀nín dɛ̀bɛhɔ́ ɲɛmù lɛ tú mí ɲunlán dìɛ.

²⁰ Ɛ́ hɔ́ vuò lɛ ɛ́ zɔn wi hɔ ɲun-bɛhɔ́ tĩ́ihṹ míkùi àá hɔ́ ɓúkùo ɛ́ vũnunkɛ ɛ́ yí bĩní mi wɛ̀.

²¹ Ɛ́ hɔ́ hóo sɛ̃̀nlɛ̀a lɛ ɛ́ lìkɛ cɛ̃̀un kɛ̀a iè sɛ̃̀n-bɛ̃hɛ̃ bòo sí ɛ́ tè siɛ ɓɛ́ nìnbirìe lɔ̀n. Ɛ́ ɓɛ́ wo ɛ́ Dɔfĩn ɛ̀ tòokɛ hɔ̀pe hóo sɛ̃̀n-bɛ̃hɛ̃ lɛ ɛ́ tè siɛ peɓɛ̀ lɔ̀n bòohũn; iè hɔ̀ lɛ ɛ́ hɔ́pe bɔ̀sũmúa bòo sɔ ɛ́ hɛ̀ hie dɛ̀ khie.