Bɔ̀zɛ̃́níriè 14 - Buamu Laa

À Pi-zuú àá ɓɛ́ nìɛ lɛ ɛ́ Dɔfĩn ɛ́ yɛ̀ ɲún bòo

¹ Ɛ́ ń bĩniɛ yòó húie, ɛ́ ń mɔn ɔ̀ Pi-zuú kɛ́ á dɛ̃̀ lè Sĩyɔn ɓúkìe lɔ̀n, ɛ̀ nìnbirìe muasíe ɓɛ́rɛ́ hùuɲu àá bɔ̀nbɔ̀ nɛ́ (144 000) lɛ ɛ́ piè yèrè àá ɓà yàá yèrè ɛ́ wɛ̃́ ɓiè lɔ̀n ɛ́ dɛ̃̀ yán àá ɔ́.

² Ɛ́ ń ɲɛ́ lé tɛmu dɔ̀ lɛ yòó ɛ́ tɛ̀ hɔ̀ hóohũn kɛ́ lé ɛ́ tɛ̀ kɛ̀a ie ɲun-bɛhɔ́ lɛ ɛ́ cáa siɛ tɛmu, kɛ̀a ie miikɛ hóo nɛ̀mɛ́kɛà tɛmu. Ɛ́ lépe tɛmu lɛ ɛ́ ń ɲɛ́ ɛ́ den dɛ̃̀ kɛ̀a ie cɛ̃́hṹ ɓɛ́riè lɛ ɛ́ ɓɛ́ cɛ̃́hɛ̃ ɛ̀ ɓɛ́ tɛmu.

³ Ɛ́ ɓɛ́pe nìnbí-kuì sɔ sí ɛ́ hṹn lè yánbénu dɛ̀fĩì dɔ̀ ɛ̀ bé lé bɛ́záanú wànlè híɛhɔ́, ɓɛ̀pe bìedɔ̀ bìɛ nɛ́ lɛ yìe wi híɛhɔ́ àá ɓɛ́pe nìkĩ́ihɛ̃ híɛhɔ́. Ɛ́ hɛ̀rí nìnbírɔ dɔ̀ lɛ ɛ́ dɛ̀ lèpe yánbénú sɔ ɛ́ kennin ɛ́ mí, kɛ́ ɓɛ́pe nìnbirìe muasíe ɓɛ́rɛ́ hùuɲu àá bɔ̀nbɔ̀ nɛ́ (144 000) lɛ ɛ́ Dɔfĩn ɛ́ yɛ̀ ɲún ɛ́ lɔ́ lé sṹsùnù ɛ́ ɓen bòo mí.

⁴ Ɓàasiè ɛ́ iè ɓɛ̀pe lɛ ɛ́ yí liení ɓɛ́te àá ɓɛ́ hã́a wɛ̀; ɛ́ ɓɛ́ wo ɛ́ ce. Ɓɛ̀ wóo bì-e Pi-zuú máahṹ ɛ̀ dàá vɛ hɔ vuò lɛ á wóò vɛ hũn míkùi. Ɓɛ̀ iè ɓɛ̀pe ɛ́ hɔ́ Dɔfĩn ɛ́ yɛ̀ ɲúǹ ɓɛ̀ nìnbirìe tĩ́ihṹ nɛ ɓɛ wé ɓɛ́ hán nìɛ lɛ ɛ́ lɛ́ hɔ́pe Dɔfĩn àá ɔ́ Pi-zuú ǹ.

⁵ Ɛ́ peɓɛ̀ ɲihĩ́ɛ ɛ́ hɛ̀rí ɓúo dɔ̀ ɛ́ yá mi hũn wɛ̀; ɛ̀ hɛ̀rí ńwékhemù dɔ̀ ɛ́ mí ɓà ǹ wɛ̀.

Ɓɛ̀ mɛlɛkɛɓɛ bìɛ tĩ bòo lɛ ɛ́ ɓɛ́ ɛ́ buie

⁶ Ɛ́ ń bĩniɛ mɔn ɔ̀ mɛlɛkɛ dɔ̀ kɛ́ á van yòó ɛ́ yíe khíi sɔ́n sɔ́n hɔ́ hóohũn; à dàa le Bentĩnu dɔ̀ lɛ ɛ́ yá vé yá mi ɛ́ mii buie ɛ̀ lɛ́ ɓɛ́ sṹsùnù nìɛ ǹ, hɔ̀ cɛ̃̀mɛ̀náa míkùi nìɛ àá hɔ́ dàa míkùi nìɛ àá hɔ́ níiɓɛ̀ míkùi nìɛ àá hɔ́ lóoniɛ̀ míkùi nìɛ.

⁷ Á zɔn ɛ́ bie àá tɛn-bɛhɔ́ ɛ́ nɛ làa: «Mì zán Dɔfĩn ɛ̀ mì lɛ́ hɔ́ ɓàarɔ́ Hɔ̀ ǹ! Iè hɔ̀ lɛ ɛ́ lé pɛ̃̀hṹ lɛ ɛ́ Hɔ́ mii dàá lè ɓɛ̀ nìnbirìe lìe ɛ́ ɓɛrɛ dɛ̃un. Ɛ́ mí wo ɓàaní hɔ́pe Dɔfĩn lɛ te hɔ hóohũn àá lé sṹsùnù àá hɔ́ ɲun-bɛhɔ́ àá hɔ́ ɲun-kɛ̃hĩ́ ɛ́ mɛ́.»

⁸ Ɛ́ mɛlɛkɛ wìɓuiɛ̀ dɔ̀ lɛ iè ɔ̀ ńɲuunín ɛ́ zɔn lɔ́ bɔ̀ àpe hán mɛlɛkɛ máahṹ kɛ́ á ɛ́ bie ɛ́ nɛ làa: «Lè Babilɔɔnɛ lóo ɛ́ ɓúo khie siɛ, lèpe Babilɔɔnɛ lóo dɛ̀bɛhɔ́ ɛ́ ɓúo khie siɛ! Lèpe Babilɔɔnɛ lóo sɔ ɛ́ den lɛ́ ɛ́ hɔ́ cɛ̃̀mɛ̀náa míkùi nìɛ ɛ́ hɛ̀ háa zɔn hɔ̀ ńdaaníkɛɓán hũn kɛ̀a ie ɲɛmù lɛ ɛ́ ɓɛ́ ɲun ɛ́ ɓaakɛa bòo si!»

⁹ Ɛ́ mɛlɛkɛ wìɓuiɛ̀ dɔ̀ lɛ iè ɔ̀ ńtĩinín ɛ́ zɔn lɔ́ bɔ̀ ɓɛ̀pe bìɛ ɲu sí máahṹ kɛ́ á ɛ́ bie àá tɛn-bɛhɔ́ ɛ́ nɛ làa: «Nìnbírɔ lɛ kɛ́ á ɓàaniɛ ɔ̀ wìlaàsɔ ǹ àá lépe wɔ̃̀hṹ lɛ ɛ́ ɓɛ́ mɛ́ ɛ́ lé lɔ́ɓán àá ɔ́, à lò yú piè bɔ̀zɛ̃́níriè mí ɓiì lɔ̀n tàá mí núnú lɔ̀n,

¹⁰ ɛ́ ɓàasɔ ɛ́ ɓiɛ̀ ɓén ɲu Dɔfĩn tĩcĩ̀nín ɲɛmù lɛ ɛ́ yiɛ koo pehɔ̀ tĩcĩ̀nín ɲunlán dìɛ hũn ɛ́ lé tú kɛ́ hɔ́ yí lùnkɛ wɛ̀; ɛ́ ɓàasɔ wo lɔ̀n ɛ́ ɓén be hɔ dṹn àá hɔ́ cìrìbí hũn, Dɔfĩn mɛlɛkɛɓɛ híɛhɔ́ àá ɔ́ Pi-zuú híɛhɔ́.

¹¹ Ɛ́ ɓɛ́pe lɛ ɛ́ ɔ́ wìlaàsɔ àá lépe wɔ̃̀hṹ lɛ ɛ́ ɓɛ́ mɛ́ ɛ́ lé lɔ́ɓán àá ɔ́ ɛ̀ ɓàanínin àá ɓɛ́pe lɛ ɛ́ yú piè bɔ̀zɛ̃́níriè ɓɛ́ lɔ̀n, peɓɛ̀ lɔ̀nbiè ńɲíi ɛ́ wo ɓén hĩ́ní ɛ́ yòó fúu yìi lɛ ɛ́ yá vé hũn. Ɛ́ ɓɛ́ wo yá ɓén vũùní yá mi ɓɛ́ lɔ̀nbiè hũn sṹnúhṹn àá wiɛhɔ́ míkùi.»

¹² Ɛ́ lɛ iè lèpe vìi lɛ ɛ́ ɓɛ́ nìnbirìe lɛ bòo sɛ̃̀ hɔ̀ Dɔfĩn ɛ́ fɔ́ɓán ɛ̀ ɓɛ̀ cɛ ɓɛ́ kuò cɛ̃̀un hũn, ɓɛ̀pe lɛ ɛ́ ɓɛ́ɓɛa hɔ̀ Dɔfĩn biehĩ́ ǹ ɛ̀ ɓɛ̀ ɛ́ dũmuasɛ̃̀ à Yiezu ǹ.

¹³ Ɛ́ ń wo ɲɛ́ lé tɛmu dɔ̀ hɔ̀ hóohũn hũn kɛ́ lé ɛ́ bie ɛ́ nɛ làa: «Síɛ wĩ́ ɛ̀ bie nɛ: “Kɛ̀a sáalɛ ɛ́ ɓɛ́lɛ lɛ ɛ́ húrunkɛ kɛ́ ɓɛ́ ɛ́ dũmuasɛ̃̀ Ɲunsɔ ǹ ɛ́ ɲúuhɛ̃ ɛ́ tĩ!” — “Ũun lè Mɛkɛ̃n-Sãanu nɛ peɓɛ̀ ɲúuhɛ̃ ɛ́ tĩ. Ɛ́ ɓɛ́ iè pe wo ɛ́ vũùní ɓɛ́ tɔnlɔ́ hũn iè hɔ̀ lɛ ɛ́ peɓɛ̀ bòo lɛ ɛ́ ɓɛ́ wɔ́ bɔ̀ peɓɛ̀ máahṹ.”»

Lè sṹsùnù bɔ̀díe mìirɔ́ bòo

¹⁴ Ɛ́ ń yòó huie ɛ́ ń mɔn dùndùí dɛ̀puiè dɔ̀; ɛ̀ lèpe dùndùí sɔ lɔ̀n ɛ́ wìedɔ̀ ɛ́ kɛsí nin kɛ́ á lɔ́ɓán àá nìnbírɔ. À yìe bɛ́záanú múnséré sɛ̃́ní dìɛ, à dàa khɛ̃́nkhɔ́nú lɛ ɲiɛ̀ wi mí núnú hũn.

¹⁵ Ɛ́ mɛlɛkɛ wìɓuiɛ̀ dɔ̀ ɛ́ zɔn lɔ́ lé Dɔfĩn zũ-bɛhɔ́ hũn kɛ́ á ɛ́ ɔ̀pe lɛ ɛ́ kɛsí lé dùndùí lɔ̀n ɛ̀ bénkɛnin ɛ́ nɛ làa: «Hóoní kɔ́ khɛ̃́nkhɔ́nú ɛ́ kɔ̀ khè hɔ̀ bɔ̀díe; hɔ̀ bòo mìirɔ́ pɛ̃̀hṹ ɛ́ wo ɓɛrɛ dɛ̃un, lè sṹsùnù bɔ̀díe ɛ́ wo bɔn ɛ́ kɛ́ mìírɔ́.»

¹⁶ Ápelɛ ɛ́ kɛsí lé dùndùí lɔ̀n ɛ́ wo siɛniɛ mí khɛ̃́nkhɔ́nú lè sṹsùnù, ɛ́ lé sṹsùnù bɔ̀díe míkùi ɛ́ wo mɔ̀.

¹⁷ Ɛ́ mɛlɛkɛ wìɓuiɛ̀ dɔ̀ ɛ́ bĩniɛ zɔn lɔ́ lé Dɔfĩn zũ-bɛhɔ́ lɛ yòó wi hɔ hóohũn, kɛ́ ápe ɛ́ lò ɓiɛ̀ dàanin kɛ̃́nkhɔ́nú lɛ ɲiɛ̀ ɛ́ wi ǹ.

¹⁸ Ɛ́ mɛlɛkɛ wìɓuiɛ̀ dɔ̀ lɛ ɛ́ dàa hɔ pànkɛ́ hɔ̀ dṹn lɔ̀n ɛ́ zɔn lɔ́ àá lé miyiɛ́ leǹlén dúekéré viì, à zɔn bérɛ àpe lɛ dàa le khɛ̃́nkhɔ́nú lɛ ɛ́ ɲiɛ̀ wi ǹ ɛ́ nɛ làa: «Hóoní kɔ́ khɛ̃́nkhɔ́nú lɛ ɲiɛ̀ wi, ɛ̀ kɔ̀ khé lé sṹsùnù divɛ̃n ńɲiɛ̀ ńkùsúɓɛ́; hɔ̀pe divɛ̃n ńɲiɛ̀ sɔ ɛ́ wo bɔn dɛ̃̀.»

¹⁹ Ápe mɛlɛkɛ sɔ ɛ́ siɛniɛ mí khɛ̃́nkɔ́nú lè sṹsùnù, à wo khɔ́ lé sṹsùnù divɛ̃n ńɲiɛ̀ míkùi ɛ́ khie van lɔ́ koo Dɔfĩn tĩcĩ̀nín ńɲiɛ̀ fɔ̀nlén kṹ-bɛhɔ́ hũn.

²⁰ Ɛ́ hɔ́pe ńɲiɛ̀ sɔ ɛ́ ɓɛ́ van lɔ́ fɔ̀rɛ́ pehɔ̀ fɔ̀nlén kṹun sɔ hũn lè lóo máahṹ; ɛ́ hɔ́ wɔ́ cãani ɛ́ temu zɔn lɔ́ hɔ́pe ńɲiɛ̀ fɔ̀nlén kṹun sɔ hũn ɛ́ lɔ́ vɛ̃̀ fúu van dɛ̃un kílɔ́nɓɛ̀ khĩɛ́-tĩ (300), ɛ̀ kɛ́ záataà ɛ́ zɔn dɛ̃̀ pehɔ̀ hũn ɛ́ hɔ́ ɛ́ yòó dɛ̃ peɓɛ̀ ɲihĩ́ɛ.