Bɔ̀zɛ̃́níriè 13 - Buamu Laa

À wìlaàsɔ lɛ ɛ́ siɛ lɔ́ àá hɔ́ ɲun-bɛhɔ́ hũn bòo

¹ Ɛ́ pehɔ̀ máahṹ, ɛ́ ń mɔn ɔ̀ wìlaàsɔ dɔ̀ kɛ́ á siɛ lɔ́ hɔ́ ɲun-bɛhɔ́ hũn ɛ́ yòó. À ɛ́ dàa wṹa pírú àá ɲúuhɛ̃ hùuɲu, ɛ̀ hɔ̀pe wṹa pírú sɔ ɛ́ yìikɛa bɛ́záanú múnsénɛ̀a; ɛ̀ hɔ̀pe ɲúuhɛ̃ hùuɲu sɔ lɔ̀n ɛ́ hɔ́ yèhĩ́ dɔ̀ lɛ ɛ́ Dɔfĩn ɛ̀ tòokɛ ɛ́ wɛ̃́ wi lɔ̀n.

² Àpe wìlaàsɔ lɛ ɛ́ ń mɔn ɛ́ lɔ́ɓán àá dànwiè, piè zehĩ́ ɛ́ lɔ́ɓán àá maa bɔnù zehĩ́, ɛ̀ pie ɲunù ɛ́ lɔ́ɓán àá zankɛ́wòohṹ ɲunù. Ápe wìlàasɔ wìsũmúi ɛ́ khie lɛ́ mí pànkɛ́ àá mí bɛ́záanú wànlè àá hɔ́ miikɛ pànkɛ́ bɔ̀bɛhɔ́ ɔ̀ ǹ.

³ Ápe wìlaàsɔ ɲún dìcóoní dɔ̀ ɛ́ dɛ̃̀ kɛ̀a dìɛ lɛ ɛ́ ɓɛ́ ɓooniɛ nin á mii hí. Kɛ́ lépe piè ńɓóonín lɛ hṹn mii ɓí-é ɛ́ yòó wan. Ɛ́ ɓɛ́ sṹsùnù nìɛ ɓɛ́kùi ɛ́ hɔ́ hɛ̀ yòokɛa lɔ̀n ɛ́ ɓɛ́ wo khie bɔ̀ àpe wìlaàsɔ máahṹ.

⁴ Ɛ́ nìnbiriè ɓɛ́kùi ɛ́ khie ɛ́ ɔ̀pe wìlaàsɔ wìsũmúi ɛ̀ ɓàanínin iè hɔ̀ lɛ á lɛ́ hɔ́ pànkɛ à wìlaàsɔ ǹ. Ɛ̀ ɓɛ̀pe ɓɛ́kùi ɛ́ lò khie ɛ́ ɔ̀pe wìlaàsɔ ɛ̀ ɓàanínin kɛ́ ɓɛ́ ɛ́ bie ɛ́ nɛ làa: «Á wieni ɛ́ temu lɔ́ɓán àá ɔ́pe wìlaàsɔ? Á wieni ɛ́ temu dɛ̀ ɛ́ síɓán àá ɔ́?»

⁵ Ápe wìlaàsɔ ɛ́ ɓɛ́ lɛ́ lé ɲunù nin nɛ a dàá bie mí yèncànlè biehĩ́, ɛ̀ tòokɛ Dɔfĩn; á wo yú hɔ́ pànkɛ́ lɛ ɛ́ wé hɔ́pe sí fúu ńpĩ́ihɛ̃ dɛ̀wɛ́ àá bɔ̀nbɔ̀ ɲu.

⁶ Á wo zɔn ɛ́ Dɔfĩn ɛ̀ tòokɛ, kɛ́ á pehɔ̀ yèrè ɛ̀ yaa à lò ɛ́ lè viì lɛ ɛ́ hɔ́pe Dɔfĩn wi hũn ɛ̀ yáakɛ, ɛ̀ khíi páa ɓɛ́pe lɛ ɛ́ yòó wi hɔ hóohũn ɓɛ́kùi.

⁷ Ɛ́ ɓɛ́ lɛ́ lé ɲunù ɔ̀ ǹ nɛ a tɛ́ hɔ́ hĩɛ̀ àá ɓɛ́ nìnbirìe lɛ bòo sɛ̃̀ hɔ́ Dɔfĩn á yí hɔ́ pànkɛ́ peɓɛ̀ lɔ̀n. Hɔ̀ pànkɛ́ míkùi ɛ́ lɛ́ à ǹ hɔ̀ dàa míkùi nìɛ lɔ̀n àá hɔ́ lóoniɛ̀ míkùi nìɛ lɔ̀n àá hɔ́ níiɓɛ̀ míkùi nìɛ lɔ̀n àá hɔ́ cɛ̃̀mɛ̀náa míkùi nìɛ lɔ̀n.

⁸ Ɛ́ ɓɛ́ sṹsùnù nìɛ ɓɛ́kùi ɛ́ wo ɓén ɓàaní-ɛ̀ ǹ; ɓɛ̀pe lɛ yèhĩ́ ɛ́ yí wĩ́ lé mɛkɛ̃nì vɛ̃hṹ hũn, ɛ̀ dàá vɛ mìí àá lé dímíɲɛ́ fìi ɓánlɔ́, lèpe mɛkɛ̃nì vɛ̃hṹ lɛ bòo ɛ́ sɛ̃̀ à Pi-zuú lɛ ɛ́ ɓɛ́ hàarí ɓɔ́ ǹ.

⁹ «Ɛ́ nìnbírɔ kɛ́ á dàa ɲɛkɛ̃̀a ɛ́ dàá ɲí bòo, à ɲí hɔ́.

¹⁰ Kɛ́ nìnbírɔ dɔ̀ ɛ́ sãawi à wé kɛ̀sí nùún, á ɓiɛ̀ ɓén vɛ́ zɔ lepe kɛ̀sí; àlɛ ɛ́ ɓɛ́ sãawi ɛ̀ ɓɛ̀ ɓé àá lé khɛ̃́nlé ɛ́ lépe khɛ̃́nlé ɛ́ ɓiɛ̀ te ɛ́ ɓén ɓé. Ɛ́ sí iè hɔ̀ pe ɛ́ ɓɛ́pe nìnbirìe lɛ ɛ́ bòo sɛ̃̀ hɔ̀ Dɔfĩn ɛ́ dàa sãawi ɛ̀ ɓɛ̀ wookɛ cɛ ɓɛ́ kuò cɛ̃̀un hɔ̀ ńdɛsĩ̀nlɔ́ hũn.»

À wìlàasɔ lɛ ɛ́ siɛ lɔ́ àá lé sṹsùnù lɔ̀n bòo

¹¹ Ɛ́ pehɔ̀ máahṹ, ɛ́ ń bĩniɛ mɔn wìlaàsɔ wìɓuiɛ̀ dɔ̀ kɛ́ á siɛ ɛ́ lɔ́ àá lé sṹsùnù ɛ́ yòó. À hàarí dàa ńwṹa bɔ̀nbɔ̀ ɲu lɛ ɛ́ lɔ́ɓán àá pi-zuú ńwṹa, à hàarí ɛ́ bie kɛ̀a ie wìlaàsɔ wìsũmúi bòo sí.

¹² Ápe hán wìlaàsɔ lɛ hṹn siɛ lɔ́ àá hɔ́ ɲun-bɛhɔ́ hũn pànkɛ́ míkùi iè pe á ɛ́ zɛ̃́ní piè yìe hũn, á wo khie mɛmɛ́kɛa lèpe sṹsùnù míkùi nìɛ ɛ́ ɓɛ́ ɛ́ ɔ̀pe hán wìlaàsɔ ɛ̀ ɓàanínin, àpe lɛ hṹn ɓooniɛ nin á mii hí kɛ́ piè ńɓóonín sɔ ɛ́ wan.

¹³ Ápe wìlàasɔ lɛ ɛ́ siɛ lɔ́ àá lé sṹsùnù ɛ́ hɛ̀ hṹn hɔ̀ miikɛ yéréké bòo ɛ̀ wé; à yɛ̀rɛ́ hṹn lɛ́ ɛ́ hɔ́ dṹn ɛ́ wóò yóò lé hɔ́ hóohũn ɛ̀ ɓen siɛ lé sṹsùnù ɛ̀ ɓɛ̀ nìnbirìe ɛ̀ mi.

¹⁴ À hṹn ɓɛ̀ sṹsùnù nìɛ ɛ̀ khɛ̃̀níkɛ ɛ̀ vĩ́iní àá hɔ́pe yéréké bòo lɛ ɛ́ ɓɛ́ hṹn lɛ́ á dɛ̀ ɛ́ wé, àpe hán wìlaàsɔ yìe hũn. À hṹn bie àá ɓɛ́ sṹsùnù nìɛ nɛ ɓɛ mí lé wɔ̃̀hṹ dɔ̀ lɛ ɛ́ lɔ́ɓán àá ɔ́pe hán wìlaàsɔ lɛ ɛ́ hṹn ɓóoniɛ nin àá lé khɛ̃́ntɔ́nú kɛ́ á yí hí wɛ̀.

¹⁵ Ápe ńɲuunín wìlaàsɔ ɛ́ ɓɛ́ lɛ́ hɔ́ pànkɛ́ nin nɛ á dé lé mɛkɛ̃nì lèpe wɔ̃̀hṹ lɛ ɛ́ ɓɛ́ mɛ́ ɛ́ lɔ́ɓán àá ɔ́pe hán wìlaàsɔ, bòo lɛ ɛ́ wé ɛ̀ lèpe wɔ̃̀hṹ sɔ ɛ̀ dàń bie, ɛ̀ lè ɛ̀ ɓé ɓɛ́pe lɛ ɛ́ yá lè ɓàanínin ɓɛ́kùi.

¹⁶ Ápe wìlaàsɔ ɛ́ hṹn ɓɛ̀ nìnbirìe ɓɛ́kùi ɛ̀ mɛmɛ́kɛ, ɓɛ̀lɛ mìníkɛa àá ɓɛ́lɛ ɓàakɛa, ɓɛ̀ bòo ɓàasiè àá ɓɛ́ nìkherà, ɓɛ̀ nìnbirìe lɛ ɛ́ te ɓɛ́te àá ɓɛ́ wɔhĩ́, nɛ ɓɛ bè hɔ̀ bɔ̀zɛ̃́níriè dɔ̀ hɔ́rɔ ńdóonín núnú lɔ̀n tàá piè ɓiì lɔ̀n.

¹⁷ Ɛ́ nìnbírɔ dɔ̀ ɛ́ wo yí dɛ̀ bòo ɛ́ yá yɛ̀, à lò yí dɛ̀ bòo ɛ́ yá yìɛní lɛ kɛ́ lépe bɔ̀zɛ̃́níriè sɔ ɛ́ mí ɓàasɔ ǹ wɛ̀; lèpe bɔ̀zɛ̃́níriè sɔ ɛ́ iè ɔ̀pe wìlaàsɔ yèrè tàá hɔ̀ mìnlɔ́ bi-zɛ̀ɓɛ̀ lɛ ɛ́ piè yèrè sɔ ɛ̀ zɛ̃́ní.

¹⁸ Ɛ́ lɛ den iè lè viì lɛ ɛ́ ɓɛ́ nìnbirìe ɛ́ sãawi ɛ̀ ɓɛ̀ dàá hɔ́ bɔ̀dũmunù nin. Ɛ́ nɛ alɛ ɓen hɛ́círí wi à dũń ɔ́pe wìlaàsɔ yèrè mìnlɔ́ bi-zɛ̀ɓɛ̀ bòo lɛ ɛ́ hɔ́ ɛ́ zɛ̃́ní, iè hɔ̀ lɛ ɛ́ hɔpe mìnlɔ́ bi-zɛ̀ɓɛ̀ sɔ ɛ́ iè nìnbírɔ ɛ́ hɔ́ nɛ̀. Ɛ́ hɔ́pe mìnlɔ́ bi-zɛ̀ɓɛ̀ sɔ ɛ́ iè khĩmí-huiezĩ àá ɓaàtĩ àá bòo hùiezĩ (666).